Dimatekenu 38 - O Mikanda Ikola

Juda ni Tamale

¹ Anga ki bhita-phe kuila, mu kubhanga izuua, bhu thembu ienhoio, Juda u xa phange jê u kulumuka, anga u tula bhu bhata dia mukua Adulamu, dijina diê Hila.

² Anga u mona-bhu kilumba a mu ixana Suua, monʼa mukua Kanana; anga u mu sola, u mu sakana;

³ Muhatu anga uimita, u vuala monʼa diiala; anga u mu luka dijina diê Hele.

⁴ Anga uimita dingi, u vuala monʼa diiala, anga u mu luka dijina diê uixi Onano.

⁵ Anga u ta-ku o kuvuala mona ua mukuâ ua diiala, u mu luka dijina diê uixi Xelah; Juda u kala bhu Kezibhe, kioso muhatu kia vuala o mona iú.

⁶ Juda anga u sota muhatu phala Hele, monʼê ua phande-kumbi, dijina diê Tamale.

⁷ Hele-phe, monʼa Juda ua diiala ua phande-kumbi, u kala muthu ua bhukumuka ku mesu a Jihova; Jihova anga u mu jibha.

⁸ Juda anga u ambela Onano, uixi: Lundula mukajiʼa kota dié, u bhange ndûndu kala kia tokala o kiubha kia diiala, phala phangʼié ka kambe mona.

⁹ Onano-phe ua kʼijiia kuma monʼó ka kala uê; o ku izuua kia kala mu bokona ku muhatuʼa kota diê, u texiʼê o mbutu bhoxi, phala ki bhu kale kuvuala.

¹⁰ Kiene kia mu bhangʼiki, anga ki iibha ku mesu a Jihova; anga u mu jibha ue.

¹¹ Bhenhobho Juda u ambela Tamale, mukajiʼa monʼê uixi: Kala kiá u mutudi ku bhata dia phaienu, katé monʼami Xelah kia kula; kuma uambe, uixi: Imoxi u fua ue, kala kia fu o makotʼê. Tamale anga uia, u kala ku bhata dia phaiʼâ.

¹² Mu kubhanga izuua ia vulu, monʼa Suua, muhatu ua sakana ni Juda, o monʼê ua muhatu, anga u fua; Juda-phe kia zubha kudila o thambi, u banda ku Timinahe, kuala kubhutisa o jimbudi jê, ni muene ni kamba diê Hila mukua Adulamu ela kumoxi.

¹³ Anga a ki kunda Tamale, exi: Ukoué uala kuia ku Timinahe mu bhutisa jimbudi jê.

¹⁴ Tamale anga u zula izuatu iê ia utudi, u di ta véu iê, u di futa, u xikama bhu phambu ia Enaimi, muene mu njila ia Timinahe; kuma ua mono Xelah ua kulu kiá, maji muene ka mu bhana kusakana-nê.

¹⁵ Juda-phe kia mu mono, ua fika kidianzunga, kuma ua di futu ni pholo.

¹⁶ Anga u bhambuka bhuoso bhua xikama, uixi: Iza-ze, ngi ku bokone; kuma ka kʼijiia kuila mukajiʼa monʼê. Kuala muhatu: U ngi bhana-hi phala ku ngi bokona?

¹⁷ Uixi: Ngi ku bhana seseme ku ilunga iami ia jihombo. Kuala muhatu: Kíximbi kiahi ki u ngi bhana, katé ki u i tumikisa?

¹⁸ Juda uixi: Ngi ku bhana-phe kíximbi kiahi? Kuala muhatu: U ngi bhana o nela ié ia sineta, ni dilesu ni mbasá i ua kuata bhu lukuaku. Diiala anga u mu bhana-iu, u mu bokona, muene anga uimita.

¹⁹ Muhatu anga u balumuka, u tunda-bhu, u zula véu ia di tele, u zuata dingi izuatu iê ia utudi.

²⁰ Juda anga u tumikisa o seseme ia hombo, iende ni kamba diê mukua Adulamu, phala a tambule o kíximbi ku muhatu; muene-phe ka mu mono.

²¹ Anga uibhula mala akua bhata, uixi. O kidianzunga iú kuebhi, uakexile bhu phambu ia Enaimi? Exi: Kunu ki kua bhiti kidianzunga.

²² Muene anga u vutuka kua Juda, uixi: Muhatu ki nga mu mono; ni mala akua bhata exi: Kunu ki kua bhiti kidianzunga.

²³ Juda uixi: Kuabhu-phe, a bhake; phala ka tu kuatese jisonhi; ua mono seseme nga i tumikisa, maji eie kua mu mono.

²⁴ Ki bhua zubha kubhita mbeji jitatu, a ki kunda Juda exi: Mukajiʼa monʼé Tamale ua di bhange ndumbu; ua mono uala ni divumu dia lumbula mu undumbu. Juda uixi: Mu tubhudienu, a mu ohe mu túbhia.

²⁵ Kia zubha ku mu tubhula-phe, u tuma kuambela ukouê, uixi: Diiala uoso mukua imbamba iii, muene ua ngi bhana divumu; uixi, dingi: Tongolola kiambote, nga ku diondo, mba nela iii ia sineta, ni dilesu, ni mbasá, iangene ia nanhi?

²⁶ O Juda kia iedi sui, u i ẋikina, uixi: Muene ua lungu; ki ngi lungu eme; mukonda nga kambe ku mu sakanesa ni monʼami Xelah. Tunde kienhókio Juda ua-di hunji, ka tona dingi ku mu bokona.

²⁷ Mu kuiza-ku-phe, bhu thembu iê ia kuvuala, mu divumu mua mu kala akua-ndu-mba.

²⁸ Kia kala-phe mu kutala hadi ni mika ia kuvuala, sai ni iú ua tubhula o lukuaku, mama uala ku mu vualesa, anga u kuta ludinha lua kusuka mu lukuaku lua tundisa o kamona, uixi: Lulu luene lua dianga kutunda.

²⁹ Kithangana-phe lukuaku ua lu sunga, o mukuâ anga u dianga kutunda; mama uala kuvualesa, uixi: Eie ua bulu kiebhi phala mukuenu u mu diangele kutunda? Mukonda dia kienhiki u mu luka Peleji.

³⁰ Mukuâ anga u tunda kiua, uala ni ludinha lua kusuka mu lukuaku; anga a mu luka dijina dia Zelahe.