Dimatekenu 37 - O Mikanda Ikola

Zuze a mu sumbisa kuala jiphange jê

¹ Jakobo anga u tunga mʼoxi ia inhunginu ia tatʼâ, mʼoxi ia Kanana.

² Didi diene o dilunda dia muiji ua Jakobo. Zuze kiala hanji mu kuinhi dia muvu ni sambuadi, u kala mu kuinga ibhaku ni jiphange jê; kuma muene ua kexi hanji monʼa ndenge, u kala kumoxi ni anʼa Bila ni anʼa Nzídipa, o akaji a tatʼâ; Zuze anga uia ni ku a tanga kua tatʼâ kuila ala mu bhanga kiaiibha.

³ Izalaiele-phe u beta kuzola Zuze, anʼê amukuâ oso ndenge, mukonda ua mu vualela kiá mu ukukilu uê; iú ua mu tungila divunga dia lebha, dia mu tuluka katé mu inama, dia mabalangânga.

⁴ O jiphange jê ki a mono kuma tatʼâ ua beta ku mu zola muene, o jiphange jê joso ndenge, a mu zemba, o mu kuzuela aia ni ku mu handulukila, ka tena ngó ku mu kunda ni paze.

⁵ Zuze anga uanjiua nzoji, o nzoji anga u i tangela jiphange jê; ene-phe a mu zemba dingi kiavulu.

⁶ Muene u a ambela, uixi: Ivenu, nga mi diondo, o nzoji iii i ngʼanjiua:

⁷ Tua kexile mu kuta ita ku mukáu, bhenhobho ngi mona o kita kiami kia bhetuka, hé kʼimana nzánza; enu-phe o ita ienu ia kondoloka anga i kala mu diundila o kita kiami kiala mu kaẋi.

⁸ Kuala jiphange jê, exi: Uixi kiebhi? Mbé kifua eie kiá u sobha ua-nda kuia ni ku tu tumina? Kidi kiene, kifua eie u tu tambula ungana nʼu kala mu ku tu tumina etu? Anga a mu zemba dingi kiavulu mukonda dia jinzoji jê, ni kuzuela kuê.

⁹ Anga uanjiua dingi nzoji iamukuâ, anga u i tangela phange jê, uixi: Ivenu-ze, ngʼanjiua dingi nzoji iamukuâ, nga mono ni dikumbi ni mbeji ni kuinhi dia théthembua ni imoxi, iala mu ku ngi diundila eme.

¹⁰ Anga u i tangela tatʼâ ni jiphange jê, tatʼâ anga u mu bazela, uixi: Nzoji iahi i kala kiki? Kifua ni eme ni manhenu, ni jiphange jé, tua kèza muene mu ku ku diundila eie?

¹¹ Jiphange jê anga a mu kala ni luma; maji o tatʼâ-phe ua bhake maka enhá ku muxima uê.

Zuze a mu sumbisa ku Iiitu

¹² Jiphange jê anga aia mu disa ibhaku ia tatʼâ bhu Xikeme.

¹³ Iza-laiele-phe u ambela Zuze, uixi: Phange jé kala mu disa ibhaku bhu Xikeme? Izá ngi ku tume kua ene. Kuala muene: Emʼiú.

¹⁴ Uixi: Ndé-phe, ua kà tale se jiphange jé ala kiambote, ni ibhaku se iala kiambote; uize, u ngi tudile. Kala kiki, ua mu katula mu dikôlo dia Hebolone, muene iú ua bhiẋila mu Xikeme.

¹⁵ Anga bhu kala diiala kuenhoko, u mu sanga uala kubungana mu mukáu; diiala anga u mu ibhula, uixi: Ua mu sota-hi?

¹⁶ Muene u vutula uixi: Nga mu sota o phange jami; nga ku diondo ngi tangele-ze, mba o ibhaku ala ku i disila kuebhi?

¹⁷ Diiala uixi: Mumu a tundu-mu; nga evu kuzuela exi tuia bhu Dotane. Zuze anga u kaiela phange jê, u a sanga bhu Dotane.

¹⁸ Ene-phe anga a mu muena dikanga, kuala kuijiia, kioso kiluua a bhiẋila bhuala ene, a mu ta kikutu kia ku mu kanena kiá, phala ku mu jibha.

¹⁹ Anga a di ambela mudiâ, exi: Na ka jinzoji-ze iú uizʼó!

²⁰ Ndokuenu tu mu jibhe, tu mu takuile mu dikungu, ku makungu enhá, tua kèla kuma kiama kia makandaʼngu kia mu di; tu tale hanji se ku jinzoji jê ku tunda-hi?

²¹ Lubene anga u kʼivua, u mu kudila bhu maku mâ, uixi: O muenhu uê ki tu mu katule-u, kana.

²² Lubene u a ambela dingi, uixi: Ki mu ẋamune manhinga! Mu tákuidienu mu dikungu diodio mu kaẋi ka mukáu; kana ku mu zengela lukuaku luenu ni ku mu kuama ngó; ua ki zuelela phala ndunge ia ku mu tambula bhu makuʼâ ene, nʼa mu bheke kua tatʼâ.

²³ Anga ki bhita kuila, Zuze-phe kiedi ngó u tula bhuala o phange jê, a mu zula o divunga diê, o divunga dia lebha dia mabalangânga, dia zuata.

²⁴ A mu ambata, a mu takuila mu dikungu; mu dikungu-phe mualʼé ngó, ki muala menha.

²⁵ Anga a xikama mu kudia. O kia bhetula mesu-phe a mona diendu dia jingenji, akua Ijimaiele, ala kutunda ku Ngiliiade ni jikamelo jâ, a ji longo uasu ua dizumba, ni mubafu, ni mirra, ala mu kuia kuta uenji mu Ijito.

²⁶ Juda anga u ambela phange jê, uixi: Tu bhanduluka kima kiahi se tua jibha Phangʼietu anga tu sueka o manhinga mê?

²⁷ Zenu, tu mu sumbisiʼê ku akua Ijimaiele, ki tu mu kuame ngó ni kuaku luetu, kuma muene uala Phangʼietu, o xitu iene imoxi. Jiphange jë anga a mu ivua muene, hé a tumaka.

²⁸ Bhenhobho, o jingenji, akua Midiiana, anga a kala mu bhita; ene anga a sunga Zuze, a mu katula mu dikungu, Zuze anga a mu sumbisa ku akua Ijimaiele mu makuinhi aiadi a itadi ia phalata. Enhá anga Zuze a mu ambata, a mu bheka mu Ijito.

²⁹ Lubene kia vutukila bhu dikungu, u sanga Zuze kala-mu dingi mu dikungu; bhenhobho u tandujula izuatu iê.

³⁰ Anga uiza dingi bhuala o jiphange jê, uixi: Mona ka moneka dingi: eme-phe ki ngalʼiki ngi di tela kuebhi?

³¹ Ene-phe bhenhobho a kuata kandumbe ka hombo, a ka jibha, o kizuatu kia Zuze kia lebha kia kijingo kia idifua-idifua a ki teka ni manhinga,

³² anga a ki tumikisa kua tatʼâ, exi: Kizuatu kiki tua ki bongo; tongolola na kiu mba kiene kizuatu kia monʼé, mba kana?

³³ Muene anga u kʼijiia, uixi: Kiene o kizuatu kia monʼami; sai kiama kiaiibha kia mu kuata, ki bhuala phata, Zuze ua diua muene.

³⁴ Jakobo anga u tandujula izuatu iê, u di ta kidinhaji mu mbunda (malombo), u kala mu dila monʼê mu izuua iavulu.

³⁵ Ni anʼê oso a mala ni a ahatu a balumuka mu ku mu konda malamba; muene-phe nguaiê ku mu konda malamba, uixi: Ngiia muene ni masoxi kuʼalunga kuaii monʼami. Tatʼâ anga u kala muene ni ku mu dila kienhiki.

³⁶ Akua Midiiana-phe Zuze a mu sumbisa mu Ijito kua Potifale, fixiiadi ia Falaó, kabhitangu ka kilangidilu.