Dimatekenu 35 - O Mikanda Ikola

Jakobo u tubhula iteka mʼonzo, uia bhu Betele

¹ Kienhókio Nzambi u ambela Jakobo, uixi: Balumuka, u bande bhu Betele, u tunge bhobho; ua kà iudike kalatódio kuenhoko ka Nzambi ua ku tukulukila kizuua ki ua lenga o pholo ia kota dié Izaú.

² Jakobo bhenhobho anga u ambela dibhata diê, uixi: Tubhulenu jinzambi ja matumbu joso ji muala-na-ju, mu di bonze mu zuate izuatu iazele.

³ Phala bhabha tu tunde-bhu, tu bande ku Betele; nga kà iudike kuenhoko kalatódio ka Nzambi, ua ngʼitaia bhu kizuua kiami kia kubhondalala, anga uia ku ngi bheka njila ioso ioio i nga kuatele.

⁴ Anga a bhana kua Jakobo o mahamba oso a kexi na-u, ni jibixa jala na-ju mu mátui, Jakobo anga u a fukena bhu kota dia muẋi ua mukalavalu uala bhenhobho bhu Xikeme.

⁵ Anga a katuka, Nzambi anga u ta uoma uavulu ku thandu dia madiembu mâ a kala mu jimbandu, ki bhuala ua tena kukaiela ana a Jakobo.

⁶ Kienhókio Jakobo ni muene ni athu oso aia-nê kumoxi, anga a bhiẋila bhu Luze, a mu ila Betele, mʼoxi ia Kanana.

⁷ Anga u tungila-bhu kalatódio, anga u luka-bhu, uixi: El-beth-El; mukonda Nzambi bhene bhua mu tukulukile kioso kiala mu lenga pholo ia kota diê.

Kúfua kua Debola

⁸ Debola, kiledi kia Bebeka, anga u fua, anga a mu funda bhu Betele, bhu muẋi ua kalavalu; anga exana-bhu, exi, bhu Alone-bakuta.

⁹ Nzambi anga u tukulukila dingi Jakobo bhenhobho, kia zubha kutunda bhu Padalane, anga u mu bhana kuzediua.

¹⁰ Nzambi anga u mu ambela, uixi: Dijina diê eie Jakobo, maji dijina dié ki di kala dingi Jakobo, di kale kiá Izalaiele; anga u mu luka kiá Izalaiele.

¹¹ Nzambi anga u mu ambela dingi, uixi: Eme ngi Nzambi, Muteni-a-Ioso; vuala, u sokoloke; u kala u kifuẋi, ni junda ia ifuẋi, ia kà tunda ku musala ué, makota a jinganga a kà tunda mu mukutu ué.

¹² O ixi i nga bhana jinga kua Mbalahamu ni kua Izake, eie muene ue nga-nda ku ku bhana-iu, ni mbutu ié ia kà ku bhingana, nga kà a bhana o ixi ienhiʼii.

¹³ Nzambi anga u bandela bhu kididi kienhókio, kia zubha kuzuela-nê.

¹⁴ Jakobo anga u imika philadi bheniobho, bhua zuelela ni Nzambi, philadi ia ditadi; hé u lunduluila-ku kiamenga, anga u texila-ku ni maji.

¹⁵ Jakobo anga u luka-bhu, bhu kididi kienhókio bhua mu zuelesela Nzambi, uixi: Betele.

Bejamí a mu vuala, Lakele úfua

¹⁶ Anga a tunda bhu Betele, o mu kuia bhu Efalata, kua kambe ngó kadikanga mu kubiẋila, Lakele u vuala, anga u tala hadi iavulu mu kuvuala.

¹⁷ Kioso-phe kiala mu tala hadi, mama uala ku mu vualesa, uixi: Ku kale ni uoma; kuma ua-nda ku kala ni monʼé dingi uamukuâ ua diiala.

¹⁸ Mu kuiza-ku-phe, kioso kiala mu lekela, kuma kufua kua mu iza, mona u mu luka dijina dia Ben-oni; maji o tatʼâ-phe u mu luka, uixi: Bejamí.

¹⁹ Lakele anga u fua, hé a mu fundila mu njila ia Efalata (bhene bhu Beleme).

²⁰ Jakobo anga u imika dingi philadi ku thandu dia mbila iê; iene o philadi ia Mbila ia Lakele katé mu kizuua kia lelu.

²¹ Izalaiele anga u katuka dingi, u ta kibangu kiê ku pholo, o mbonge ia matala ia Kathôndo ka Edele ua i xisa kuema.

O anʼa Jakobo

²² Anga ki bhita-phe kuila, kioso Izalaiele kia tungu hanji mʼoxi muenhomo, Lubene uia u zeka ni Bila, mukamʼa phaiʼâ; Izalaiele anga u kʼivua. O anʼa Jakobo-phe a mala a kala kuinhi dia muthu ni kiiadi;

²³ O anʼa Liia: Lubene, thungunu ia Jakobo, Ximinhá ni Levi ni Juda, ni Isakale, ni Nzebulone;

²⁴ O anʼa Lakele: Zuze ni Bejamí;

²⁵ A nʼa Bila, kahatu ka Lakele, Dane ni Nafitali.

²⁶ Anʼa Nzídipa, kahatu ka Liia, Ngadi ni Asele; enhá ene anʼa Jakobo, a a vualela bhu Padalane.

O ufilu ua Izake

²⁷ Jakobo anga uiza bhua tungile tatʼâ Izake, bhu Mamele, bhu Kidiata-halaba, muene mu Hebolone, mua kexile Mbalahamu ni Izake mu inhunginu iâ.

²⁸ Izuua ia Izake anga i tena hama ia muvu ni makuinhi nake,

²⁹ Izake anga u batuka muenhu, u fua, a mu bhongolola kuʼaia malembʼê, ua kuka ua kukidila, izuua ia mu kumu. O Izaú ni Jakobo, anʼê a mala, ene a mu fundu.