Dimatekenu 34 - O Mikanda Ikola

Dinah a mu ta kituxi

¹ Dinah monʼa Liia, monʼa muhatu a mu vuala ni Jakobo, anga u tunda mu ku di mona ni anʼa ahatu a akuaʼxi.

² Xikeme monʼa Hamolo, mukua Hivi, sobha iaʼxi ienhoio, monʼê ua diiala, kia mono Dinah, ua mu uabhela; anga u mu nhana, u zeka-nê u mu katula ujitu.

³ Muxima uê anga u naminina kua Dinah, monʼa Jakobo ua muhatu, u zola kilumba kienhiki, o kia mu mono ua luuala, u mu zuelesa ni henda.

⁴ Xikeme anga u zuela kua tatʼâ Hamolo, uixi: U ngi tambuila kilumba kiki mu ku kala muhetuʼami.

⁵ Jakobo-phe kioso kia kʼivu kuila Dinah, monʼê ua muhatu a mu te kituxi, ua di xibhʼê ka zuela kima, kuma anʼê a mala a kexile mu kuinga o ibhaku mu iangu; Jakobo anga u di xibhʼê muene, katé ene ki eza ku bhata.

⁶ Hamolo, tatʼâ Xikeme anga uia kua Jakobo phala ku di kunda-nê.

⁷ Anʼa Jakobo a mala kioso kia tundu mu iangu, ia eza ku bhata, kia zubha ku kʼivua, kia iibhila kiavulu; anga a kala ni njinda ia vulu, mukonda ió ua bheka kisunji mua Izalaiele, mù zeka ni monʼa Jakobo ua muhatu, kima ki ki tokala ku ki bhanga.

⁸ Hamolo anga u zuela-nâ, uixi: Muxima ua Xikeme, monʼami ua diiala, uala kuinda kiavulu monʼenu ua muhatu; nga mi diondo mu mu bhane-nê ku mu sakana.

⁹ Inda tu di sakane mudietu, tu kale tu jindandu; mu tu bhane anʼenu a ahatu, mu bhenge ue anʼetu a ahatu,

¹⁰ mu tunge ni etu kumoxi. Ixi ioso ii-ié iiii; enʼuenu mu mona bhuoso bhu mu tunga, mu te mauenji, mu fune jimbongo, mu kale-mu ni kienu kia mi tokala.

¹¹ Xikeme anga u zuela kua tata ia monʼa muhatu, ni ku jiphange jê ja mala, uixi: Ngi sange ngalasa ku mesuʼenu; ioso i mu xinda, ngi i bhana.

¹² Né mua ngi xindi kilembu kiahi kiosuʼiki, ni ujitu, ngi i bhana muene ioso i mua zuela; kabasa mua ngi bhana kilumba ku mu sakana.

¹³ Anʼa Jakobo a mala anga a vutuila Xikeme ni tatʼâ Hamolo ni kudimbikiza, mukonda muene ua te kituxi ni phange iâ ia muhatu.

¹⁴ Anga a ambela, exi: Ki tu tena ku ki bhanga, o kubhana phagiʼetu ia muhatu ku diiala a kambe ku mu saia; kiókio ki kala kala tua sebuluka.

¹⁵ O ku mʼivua ki kala mu bhanga kima kimoxi: kala mu kala, kala ki tualʼetu; mala oso mudienu a a saia.

¹⁶ Se mu ẋikina tu mi bhana anʼetu, etu ue tu bhenga anʼenu a ahatu, tu tunga kumoxi, tu kala tu kifuẋi kimoxi.

¹⁷ Se nguenu-phe ku tu ivua, phala ku mi saia, tuambata monʼetu ua muhatu, tuia kuengi.

¹⁸ Maka enhá anga a uabhela Hamolo, ni Xikeme monʼa Hamolo.

¹⁹ Munzangala iú ua diiala ka kokoloka dingi mu kubhanga kioso kia mu xindi, mukonda dia kuuabhela kiavulu o monʼ a Jakobo ua muhatu; o muene ue, mu bhata dia tatʼâ, muene dikota uala ku pholo.

²⁰ Hamolo-phe, ni monʼê Xikeme, anga eza bhu muelu ua kimbaka kia dibhata diâ, a ta maka ni mala a akua bhata, exi:

²¹ Athu iá tua di tambulula-nâ kiambote ku paze; kala kiki, a-nda ku tunga-phe moxi ietu, nʼa te mauenji; kuma oxi iakuluʼê, ia soko ue ni ene; tu kale mu bhenga anʼâ a ahatu, tu a bhane ue anʼetu a ahatu, mu ku sakana ni ene.

²² Maji mala ió-phe a tu xindi kima kimoxi mu ku tu ẋikina o kutunga-nâ, ni tu kale tu kifuẋi kimoxi; kikale mala oso mudietu a tu saia, kala kia a sàie ene.

²³ Manhi o jingombe jâ joso, ni jimbongo, ni ibhaku iâ ioso, ki ia-nda ku kala ietu? Tu a ẋikinienu, phala tu tunge-nâ kumoxi.

²⁴ Ene oso akua bhata ene kubhita bhu muelu ua kimbaka, anga evua Hamolo ni monʼê Xikeme; mala oso a akua bhata anga a a saia, ni oso ene kubhita bhu muelu ua kimbaka kiâ.

²⁵ Anga ki bhita-phe kuila mu kubhiẋila, mu kizuua kia katatu, kioso kia temanana ku jiphoko, anʼaiadi a Jakobo, Ximinhá ni Levi, jiphange ja Dinah, a maneka kala muthu xibhata iê, eza bhu bhata ni kubhua-uoma, a kuata kujibha mala oso.

²⁶ Ni Hamolo muene, ni monʼê ua diiala Xikeme a a jibha ue ku mazu a xibhata, Dinah a mu katula mʼonzo ia Xikeme, aia-nê.

²⁷ Anʼa Jakobo anga a tula bhua jibhʼabha, dibhata dioso a di bhunda, mukonda a te kituxi ni phange iâ ia muhatu.

²⁸ Anga a kuata jimbudi jâ, ni jingombe, ni jijumentu, ni jiji jala ku bhata, ni jiji jala mu mukáu, a ji ambata.

²⁹ Anga ambata ue ni jimbongo jâ joso, ni anʼâ ni ahatu a a kuta, kífua mbole iâ, mu jinzo ka xi-mu dingi kima.

³⁰ Jakobo anga u ambela Ximinhá ni Levi, uixi: Mua balumuna mvunda, mua ngi nuhisa kiaiibha ku akuaʼxi, o Makanana ni Mapelezi; eme nga tolo makuenze, a-ndu ngi bhongolokela mu kubhânga, hé a ngi beta; ni eme-phe ni dibhata diami a tu buidisa.

³¹ Ene-phe, exi: Kífua phangiʼetu ia muhatu, a mu bhanga kala kidianzunga?