Dimatekenu 33 - O Mikanda Ikola

Iza ú ni Jakobo a takana

¹ Jakobo anga u zambula mesu, u mona Izaú iú uiza iuná uala mu kuiza kumoxi ni hama jiuana ja makuenze. Ana anga ua uanena kua Liia ni kua Lakele ni ku akâma aiadi.

² Akâma ni anʼâ ua a tuamekesa ku pholo, kua kaiela Liia ni anʼê, o Lakele ni Zuze ene kiá a sukidila-ku.

³ O muene anga u a bhita ku pholo ene oso, uia ni kudiunda, ua bhetama lusambuadi ku mavu katé kia zukama kua kota diê.

⁴ Izaú anga u lenga mu kutakana-nê, u mu bhubhala, u mu bhana jibejo; anga a ta nzôngo a dila kiiadi kiâ.

⁵ Izaú anga u zambula, mesu, u mona ahatu ni ana; uibhula, uixi: Enʼiá akua-hi uala kuendela-nâ kumoxi? Jakobo u vutula, uixi: ene ana, Nzambi mu henda iê, a bhana kua selevende ié.

⁶ Kienhókio akâma anga a zukama ni anʼâ, hé a diunda.

⁷ Ni Liia ue ni anʼê a zukama, hé a diunda; a sukidila-ku Zuze ni Lakele, a diunda uâ.

⁸ Izaú-phe, uixi: Ua bhange kiebhi o kilômbo kioso ki nga takana na-kiu mu njila, lomboluelu diê diahi? Jakobo-phe, uixi: Phala ngi bonge kiadi bhu mesuʼé, ngana iami.

⁹ Izaú anga u amba, uixi: Eme i ngala na-iu, phangʼiami, ia ngi soko: eie ioso ue i uala na-iu, bhaka mbe eie.

¹⁰ Jakobo-phe uixi: Lémbua, ki kiene, nga ku diondo, se nga bongo kiadi bhu mesu mé, ki ngalʼiki, tambula ujitu iú ku lukuaku luami; kuma nga mono pholo ié, mukuâ ni muthu kia mona o pholo ia Nzambi, eie ua ngi tambulula kiambote.

¹¹ Uixi: Tambula nga ku diondo, o ujitu u nga ku tumikisa; mukonda Nzambi ua ngi bhandulula, mukonda ue ima ioso ngala na-iu. Anga u jiza katé Izaú kia ẋikina.

¹² Izaú-phe, uixi: Tu kuate dingi mu njila, tuietu, eie u ngi tuamene ku pholo.

¹³ Jakobo uixi: Ngana iami, eie uejiia kuma ana kiluua a kola, ni ibhaku ia jimbudi ni jingombe, iala ni anʼâ; se a i kombola lusolo, né mu kizuua kimoxi ngoho, ibhaku ioso i fua.

¹⁴ Tuamenʼé, ngana iami, bhu pholo ia selevende ié, eme ngi thothe kimuanu, ngi fikise mu uendelu ua ibhaku i ngʼambata, ni mu uendelu ua anandenge, katé ki ngi bhiẋila kua ngana iami ku Seíle.

¹⁵ Izaú, uixi: Ngi ku xile-phe makuenze ku iá ngende-nâ. Muene-phe uixi: Phalahi ngó? Ki nga bhindamena muthu; kabasa nga sange kiá ngalasa ku mesu a ngana iami.

¹⁶ Kala kiki, Izaú ua vutuka kizuua kienhókio, uela njila ia Seíle.

¹⁷ Jakobo anga uenda katé bhu Sukote, anga u tunga-bhu inzo iê, ni itelembe ia ibhaku iê; kiene kiʼexanena kididi kiokio exi Sukote.

Jakobo u bhiẋila bhu Xikeme u tunga-bhu Kalatódio

¹⁸ Jakobo anga u bhiẋila ni paze mu mbonge ia Xikeme, moxi ia Kanana, kia zubha kutunda bhu Padalane; anga u ta kibangu kiê bhua zukama ni mbonge.

¹⁹ O mavu bhua ximbika o balaka iê, anga u a sumba kua anʼa Hamolo, tatʼâ Xikeme, mu hama ia itadi ia phalata.

²⁰ Anga u tunga-bhu kalatódio, u kʼexana: Nzambi, Nzambi ia Izalaiele.