Dimatekenu 32 - O Mikanda Ikola

¹ Jakobo ue u katuka mu kuila njila iê, o kutula mu njila u takana ni ji-anjo ja Nzambi.

² O kia zubha ku a mona, Jakobo, uixi: Kiki kilômbo kiangene kia Nzambi. O kididi kienhókio anga u ki luka Mahanaíme.

Jakobo u tuma jiphunga kua Izaú

³ Jakobo anga u tuma jiphunga mu ku mu tuamenena kua Izaú phangʼiê, kʼoxi ia Seíle, o ixi ia Idomo.

⁴ Anga u a tendelela, uixi: Mua kà zuela kienhiki kua ngana iami Izaú, muixi: selevende ié Jakobo uambe kuma, nga tundu mu kunakina kua Labano kala ngi nzuá-ngiza, kuene ku nga bhange mivu katé ni kiki;

⁵ ngeza ni jingombe, ni jijumentu, ni jimbudi, ni jihombo, ni abhika a mala ni a ahatu; eme nga i tumikisa phala ku ku tudila eie u ngana iami, phala ngi bonge ngalasa ku mesuʼé.

⁶ Jiphunga mu kuvutuka a sanga Jakobo, exi: Tua bhiẋila kua kota dié Izaú, muene-phe iú uiza ku ku batuila, ni hama jiuana ja makuenze jala kuiza na-ju.

⁷ Jakobo bhenhobho uoma ua mu kuata kiavulu, u kala ni hele; anga u uana o povo iê ni ibhaku iê ia jimbudi ni jingombe, ni jikamelu, mu ibuka iiadi:

⁸ Kuma uixi: Izaú se ueza u beta-bhu kilombo kimoxi, kiamukuâ kixala, kibhuluka.

⁹ Jakobo anga u amba, uixi: Eie u Nzambi ia tatʼetu Mbalahamu, u Nzambi ia Tatʼetu Izake, u Jihova ua ngʼambela uixi: Vutuka kʼoxi ienu, ni ku undandu uenu, eme ngi kala mu ku ku bhanga mbote;

¹⁰ ngi muthu ki nga fuama, né kòfele, ku ngi bhanga jihenda josoʼiji, ni kidi kioso ki ua ngi bhanga, ngi mubhikʼé; kuma ki nga zaukile Njolodá mueniú, ngʼambatele ngó mbangala; kiki phe nga di bhange ngi ilombo iiadi.

¹¹ Ngi kudile, nga ku diondo, bhu lukuaku lua kota diami, o lukuaku lua Izaú; kuma nga mu kala ni uoma mba uiza u ngi kuama, ni mama ni ana kumoxi.

¹² Eie-phe uambe kuma: Kidi muene ngà ku bhanga mbote, ngi sokolola o mbutu ié i soka ni museke bhu ndundu ia kalunga, ki u ẋikina ku u kuata konda mukonda dia kuvula.

¹³ Anga u zeka bhenhobho usuku uenʼió, anga u kuata ku ibhaku iê ujitu ua kutumikisa kua kota diê Izaú;

¹⁴ u kuata hama jiiadi ja jimama ja hombo, ni makuinhi aiadi a isutu, ni hama jiiadi ja jimama ja jimbudi, ni makuinhi aiadi a ilumbe.

¹⁵ Makuinhi atatu a jimama ja jikamelu, jala kiá ni ana, makuinhi auana a jimama ja ngombe, ni kuinhi dia ndumbe, ni makuinhi aiadi a jimama ja jumentu, ni kuinhi dia seseme.

¹⁶ Anga u i tula bhu maku a selevende jê, kala kilunga kia di kalela, anga u ambela selevende jê, uixi: Ngi tuamenenienu ku pholo, kala kilunga mu ta-bhu kadikanga bhu kaẋi.

¹⁷ Uoso ua tuamena anga u mu tendelela, uixi: Kota diami Izaú, kioso ki u takaka-nê, kia ku ibhula, kuila: Eie ua tokala kua nanhi? Uia kuebhi? Ibhaku iii ia nanhi i uala kukombola?

¹⁸ Bhenhobho eie ua kèla kuma: Ibhaku iangene ia selevende ié Jakobo; ujitu ua tumikisa ngana iami Izaú; muene ue iú uiza ku dima kuenhuku.

¹⁹ Anga u tendelela ue ua ka iadi ni katatu, ni akuâ oso a kaiela-ku uixi: Kienʼiki ki mua kà zuela ni Izaú, kioso ki mua kà takana-nê;

²⁰ mua kèla kuma: Muene selevende ié Jakobo, iú uiza ku dima kuenhuku. Kuma uambe, uixi: Ngi mu luulula hanji ni ujitu ua tuamena, ngi mone kiua o pholo iê; imoxi u ngi tambulula.

²¹ Kala kiki ujitu ua zaúka, ua mu tuamena ku pholo, muene anga u zekela-bhu hanji bhenhobho ni kilombo kioso.

Jakobo u zaúka honga ia Jaboke, u fula kilu ni ku di ẋina ni anjo

²² Jakobo anga u balumuka mu usuku uenhó, u kuata akajiʼê aiadi, ni akâma aiadi, ni kuinhi dia mona ni kamoxi, anga a zaúka bhu tabhu dia Jaboke.

²³ Muene ua a katula, anga u a zaukisa ku sámbua dia honga, u zaúkisa ue ni imbamba iê ioso.

²⁴ Jakobo anga u xala ku sámbua koko ubheka uê; anga bhu kala diiala u di ẋina-nê katé kuáki.

²⁵ O kia mono kuma ka mu tolola, u mu bhabha ku disokuelu dia kinama mu mbunda, disokuelu dia kinama kia Jakobo anga di ẋingumuka kioso kiala ku di ẋina-nê.

²⁶ O muenhú anga u amba, uixi: Ngehe kiá ngiie, kuma ku kúkia kiá. Muene-phe, uixi: Ki nga-nda ku ku ehela kuia, se u kamba ku ngi bhana o dibesá.

²⁷ Muene uixi: O dijina dié eie nanhi? Uixi: Eme Jakobo.

²⁸ Uixi dingi: Dijina dié ki di kala dingi Jakobo, di kala kia Izalaiele; kuma ua bhânge ni Nzambi, ua bhânge ni athu, ene oso ua a lende.

²⁹ Jakobo anga u mu ibhula, uixi: Ngi tangele ue dijina dié, nga ku diondo. Muene uixi-phe: Phalahi u ngʼibhula o dijina diami? Anga u mu bhana o dibesá bhenhobho.

³⁰ Jakobo anga u ixana kididi kienhókio, uixi: Peniiele: kuma uambe uixi: Nga mono Nzambi pholo ni pholo, maji muenhu uami iú-ué.

³¹ Dikumbi anga di mu tundila kioso kia katuka mu kubhita bhu Peniiele, kuma uala kuia ni kutenguna mukonda dia disokuelu dia kinama.

³² Mukonda dia kiki anʼa Izalaiele kene kúdia muxibha ua kinama ua disokuelu dia mbunda, katé mu kizuua kia lelu; mukonda Jakobo a mu bhabhele ku disokuelu dia mbunda, ku muxibha ua kinama mu ditabela.