Dimatekenu 31 - O Mikanda Ikola

Jakobo a mu tuma kuvutuka ku Kanana

¹ Jakobo anga u ívua kiala kuzuela anʼa Labano a mala, kuila: Jakobo ua bhundu ioso ia kexile ia tatʼetu; o ku jimbongo joso ja tatʼetu kuene muene kua bhongolola o umonhi uoso iú.

² Jakobo anga u tala ue o pholo ia Labano kuma ki ia mu kala dingi ni ngalasa kala mʼokulu.

³ Jihova anga u ambela Jakobo, uixi: Vutuka kiá kʼoxi ia jitata jé kua ku vualela, ni ku jindandu jé; eme ngi kala kumoxi ni eie.

⁴ Bhenhobho Jakobo u tuma kuixana Lakele, ni Liia, hé a mu sanga mu mukáu bhuala kilunga kia ibhaku iê.

⁵ Muene anga u a ambela, uixi: Nga mono o pholo ia tatʼenu, ki ia ngi kala dingi ni ngalasa kala mʼokulu, maji-phe o Nzambi ia tatʼetu uala ni eme.

⁶ Enu ue mua kʼijiia kuma tatʼenu nga mu kalakela ni nguzu ioso.

⁷ Maji muene-phe ua ngi nganala, futu iami i tua bângana, ua i lungulula mu lukuinhi luosʼulu; Nzambi-phe ka mu ehela ku ngi bhanga kiaiibha.

⁸ Kuma se muene uamba kuila o ibhaku ia mabaka iene i kala o futu ié ia kunganhala, ibhaku ioso-phe i kala mu vuala tuana tuezala mabaka; o muene se uambe kuma ibhaku ia mixinda iene i kala ié ia kunganhala, ibhaku ioso-phe i kala mu vuala ia mixinda ioso.

⁹ Kala kiki, Nzambi ua katula o ibhaku ia tatʼenu, iú ua ngi bhana-iu eme.

¹⁰ Kuma ki nga kexile, mu thembu ia ibhaku kuimita, ngʼanjiua jinga nzoji anga ngi mona kuma o jindumbe ja jihombo jala mu tukila o akaji ku kilunga, jala mixinda, jala mathonginina, jala mabaka, ni mikete.

¹¹ O Anjo ia Jihova anga u ngʼambela ku nzoji, uixi: Jakobo; eme ngixi-phe: Emʼiú, Ngana.

¹² Muene uixi: Zambula o mesu, u mone; isutu ia jihombo ioso iala mu tukila akaji ku ilunga, iala mixinda, iala mabalangânga, iala mabaka, iala mikete; kuma eme nga mono ioso ia ku bhange Labano.

¹³ Eme ngi Nzambi ia Betele, bhu ua tele maji ku philadi, bhu ua di hambelela kokuʼami; kiki-phe balumuka, mʼoxi mumu u tunde-mu, u vutuke kʼoxi kua ku vualela.

¹⁴ Lakele ni Liia anga a kumbulula, exi: Mu dibhata dia tatʼetu etu tuala-mu dingi ni mbandu iahi, mba undundu uahi?

¹⁵ Muene ka mu tu tala kiá kala tu athu engi? Kuma ua tu sumbisa, o itadi ietu ioso muene iú ua i di.

¹⁶ Jimbongo joso ja tambula Nzambi kua tatʼetu, jene kiá o jetu, ni anʼetu; kala kiki, kioso kia ku ambela Nzambi, kiene ki u bhanga.

¹⁷ Kienhokio Jakobo anga u balumuka, u ta anʼê ni akajiʼê ku jikamelo;

¹⁸ hé uambata ni ibhaku iê ioso ni jimbongo jê joso ja bhongolola, o ibhaku ia nganhala, ia bhongolola bhu Padalane, u katuka na-iu mu kuia kua Izake, tatʼâ, mʼoxi ia Kanana.

¹⁹ Kienhiki-phe kuma Labano ku bhata kala-ku, uaii mù bhuta o jimbudi jê, Lakele u nhana o iteka ia tokala mʼonzo ia tatʼâ.

²⁰ Jakobo anga u omboloka Labano dia mukua Sídia, sé muene ku kʼijiia kuma ka mu lekela.

²¹ Anga u lenga ni dibhata diê dioso; kuila ua lu lenga, u kuata mu kuenda, hé u zauka o ngiji ia dikota, u lunga o pholo iê ku mulundu ua Ngiliiade.

Labano u kaiela Jakobo uomboloka

²² Mu kizuua kia katatu anga a ki kunda Labano kuila Jakobo ua lenge.

²³ Muene anga u kasa o phange jê ku bhata, u kaiela Jakobo mu sambuadi dia izuua; anga u mu kuatela mu mulundu ua Ngiliiade.

²⁴ Nzambi anga uiza kua Labano, mukua Sídia, ku nzoji mu usuku, uixi: Aiuka kioso ki ua-nda kubhanga, Jakobo kana kuzuela-nê kiauabha mba kiaiibha.

²⁵ Labano anga u kuatela Jakobo mu njila. Kienhókio Jakobo ua te o kibangu kiê mu mulundu ku sámbua; Labano-phe ni jiphange jê a te ue o kibangu kiâ mu mulundu ua Ngiliiade.

²⁶ Labano anga u ambela Jakobo, uixi: Ua bhange kiebhi? Uombolokela-hi kala kiki sé eme ku kʼijiia, ni anʼami a ahatu ua ambata kala jihutile ja xibhata?

²⁷ Ua lengela-hi kiki, ni kuomboloka sé ku ngi lekela, eme hinu ngeji ku ku sulula ni fesa ni mimbu ni kuxika ngoma ni mbanza?

²⁸ Ni kubhana ngó jibejo ku anʼami a mala ni a ahatu kua ngehela; Mu kubhanga kiki, ua bhange uoua muene.

²⁹ O nguzu-phe ngala na-iu mu lukuaku luami phala ku mi bhanga kiaiibha; maji o Nzambi-phe ia tatʼenu ua ngi zuelesa mu usuku ua mazá, uixi: Aiuka kioso ki ua-nda kubhanga; Jakobo kana kuzuela-nê kiauabha mba kiaiibha.

³⁰ Né-mbe-pbe hanji kiene, eie ua solo kuié mukonda dia ngunzu ia dibhata dia tatʼenu, Phalahi o ku ngi nhana o jinzambi jami?

³¹ Jakobo anga u vutuila Labano, uixi: Mukonda uoma ua ngi kuata, kuma nga banze ngixi anʼé a ahatu u ngi tambula-nâ ni kusuina.

³² O uoso-phe u mu kuata ni jinzambi jé, ka laie dingi; phange jé jimbangi; sota muene kima kioso ki ngala na-kiu kia ku tokala eie, u ki tambudié. Kuma Jakobo ka kʼijidile kuila Lakele muene ua i nhana.

³³ Labano anga u bokona mu balaka ia Jakobo, ni mu balaka ia Liia, ni mu balaka ja tuhatu tuiadi, ka i mono. Anga u tunda mu balaka ia Liia, u bokona mu balaka ia Lakele.

³⁴ Lakele-phe ua dianga kukatula o iteka, iú ua i sueka mu dikombola dia kamelo, iú ua i xikama ku thandu. Labano anga u xaxata o ima ioso iala mu balaka maji o iteka ka i mono.

³⁵ Lakele anga u ambela tatʼâ, uixi: Ku ngi mone, ngana, kubhuma, nga kambe kuimana bhu pholo ié; kuma o kífua kia ahatu kia ngi kuata. O muene anga u solokota muene, maji iteka ka i mono.

³⁶ Jakobo anga njinda i mu kuata, u zoka ni Labano, uixi: Mulonga uami uebhi? Kituxi kiahi ki nga ku te? Ki ua ngi kaiela ni kunjandamana kuosʼuku?

³⁷ Ua babata o imbamba iami ioso, ihi ki ua ngi kuata na-kiu kia tundu mʼonzo ié? Tula-kiu bhabha bhu pholo ia jiphange jami ni jiphange jé, ene a tu fundise ni eie ni eme.

³⁸ Nga bhange makuinhi aiadi a mivu osoʼâ mu bhata dié, ni jimama jê ja jimbudi ni jimama ja jihombo ki ja seluka, o ilumbe ié ia jimbudi ki nga i di.

³⁹ Ia kuaẋiua ku iama ki ngi ku bhekela na-iu; ia bhiti ku konda iami; o iònhane ue mu muanha mba iònhane mu usuku, eie ua ngi futisa-iu.

⁴⁰ Eme nga kolokota jinga, munza ua ngi di mu muanha ua kixibhu, o mu usuku nga teketa ni mbambi, kilu nga ki lémbua ku mesu.

⁴¹ Nga bhange kienhiki makuinhi aiadi a muvu osoʼâ mu bhata dié; nga ku bhikila mu kuinhi dia muvu ni iuana mu kulemba anʼé aiadi a ahatu, mivu isamanu mu kunganhala ibhaku; maji eie, o futu iami i tua bângana, ua i lungulula lukuinhi luosʼulu.

⁴² Se o Nzambi ia tatʼetu, o Nzambi ia Mbalahamu, a mu mu kuatela uoma kuala Izake, ua kambele ku ngi bhângela, eie hinu ua ngi kaie maku a hatu. Nzambi ua tongolola o hadi iami i nga tale, ni kukalakala kua makuʼami, kiene kia ku bazelela mu usuku ua mazá.

Kikutu kia Labano ni Jakobo mu Ngiliiade

⁴³ Labano anga u vutuila Jakobo, uixi: Anʼa ahatu iá, eme nga a vuala, o anʼa mala iá anʼami, o ibhaku iii ibhaku iami, iene ioso i ua mono eie iami-eme; leluʼidi ngi tena ku bhanga kima kiahi, ku anʼami a ahatu mba ku aláula a ngi vualela?

⁴⁴ Ndoko, zá tu te kikutu ni eme ni eie; ki kale umbangi bhu kaẋi kʼami-eme ni eie.

⁴⁵ Jakobo anga u kuata ditadi, hé u dʼimika mù kala philadi.

⁴⁶ Jakobo anga u ambela phange jê, uixi: Bhongololenu matadi; anga a kuata matadi a bhanga lumu, anga a dila bhenhobho ku thandu diê.

⁴⁷ O mvumbu ienhoio Labano anga u ixana, uixi: Jingale-Sahadiutha o Jakobo-phe ua ixana uixi: Ngalede.

⁴⁸ Labano anga u zuela, uixi: Lumu iii i kale mbangi bhu kaẋi kami ni eie, kizuua kia lelu. Kiene kia ixanena dijina dia Ngalede,

⁴⁹ a ixana ue exi: Mizpah, kuma uambe, uixi: Jihova a tu lange ni eme ni eie, kioso ki tu di sandula makanga.

⁵⁰ Eie ku uia, ki ua kà tatesa anʼami a ahatu, ki ua kà xa anʼami mù bhenga dingi ahatu amukuâ, bhabha-phe ki bhuala dingi dilemba uala ni etu; iala-ze, Nzambi a kale mbangi bhu kaẋi kamiʼeme ni eie.

⁵¹ Labano anga u ambela dingi Jakobo, uixi: Ua mono-ze o lumu iii, ua mono-ze o philadi iii i ngʼemika bhu kaẋi kamiʼeme ni eie?

⁵² O lumu iii i kale mbangi, philadi iii i kale mbangi, kuma eme hádia ki ngi somboka o lumu iii, eie ue ku somboka o lumu iii ni philadi iii, mu ku di bhanga kiaiibha.

⁵³ Nzambi ia Mbalahamu, Nzambi ia Naholo, Nzambi ia tatʼâ, a tu tetulule mudietu. Jakobo anga u loka mu Uoma ua tatʼâ Izake.

⁵⁴ Jakobo anga u jibha ibhaku, u bhanga sata mu mulundu muenhomo, hé uixana phange jê mu kúdia kizokola.

⁵⁵ Kúkia ni kimene, mu kalaji ngó, Labano u balumuka, u bhana jibejo ku anʼê a mala ni a ahatu, anga u a benzela, u katuka, u vutuka ku bhata diê.