Dimatekenu 3 - O Mikanda Ikola

Eva a mu diangula, muthu u di bhala

¹ Tala, o nhoka-phe i beta kudimuka, jixitu joso ja iangu ndenge, ja bhanga Jihova Nzambi. Nhoka anga i ambela muhatu, ixi: Kifua Nzambi ua mi kidika kudia ku miẋi ioso ia díbhia?

² Muhatu u ambela o nhoka, uixi: Ku ibundu ia miẋi ioso mu díbhia tudietu;

³ maji muẋi ngó umoxi uala mu kaẋi ka díbhia, uene ua tu kidika kudia ibundu iê; kuma Nzambi uambe, uixi: Kana kudia-ku, mba kukuata-ku ngó, phala ki mu fue.

⁴ Nkoka-phe anga u ambela muhatu, uixi: Makutu, ki mua-nda kufua.

⁵ Mukonda Nzambi ua kʼijiia kuma kizuua ki mu dia-ku, mua-nda kutona mesu, mu sokela ni Nzambi, mu ijiia kiauabha ni kiaiibha.

⁶ O muhatu-phe kia mono kuma muẋi ua mbote phala kudia, ua uabha ue ku mesu, u bhekela vondadi mukonda dia kuijidisa, u kanza-ku kimbundu anga u dia, u bhana ue muadi ue, muene ue anga u dia.

⁷ Bhenhobho ene oso kiiadi kiâ anga a jikuka o mesu, a di tongolola kuila ala tuẋi; a tunga máfue ma mufiku, anga a ma kutila mu mbunda ni jiphonda ja iudika.

⁸ Anga evua o dízui dia Jihova Nzambi uala kunhunga mu díbhia, mu kumbi dia kutambula mulenge; ni diiala ni muhatuʼê anga a lenga o pholo ia Jihova Nzambi, a suama mu miẋi ia díbhia.

⁹ Jihova Nzambi anga u ixana Adá, uixi: Adá eie kuebhi?

¹⁰ Muene uetaia, uixi: Ngevu dízui dié mu díbhia, uoma iú ua ngi kuata, kuma ngala tuẋi; eme nga suama.

¹¹ Kuala Nzambi: Nanhi ua ku tangela-kiu, kuma eie uala tuẋi? O kuila uadi ku muẋi u nga ku kidika, ngixi kana kudia-ku?

¹² Bhenhobho diiala uixi, o muhatu ua ngi bhana kukala-nê, muene ua ngi bhana ku muẋi, eme nga di.

¹³ Jihova Nzambi anga u ambela muhatu, uixi: Eie phalaʼhi ua bhange kiki? Kuala muhatu; o nhoka ia ngi tobhesa, eme nga di.

Nzambi u kufundisa

¹⁴ Jihova Nzambi anga u ambela o nhoka, uixi: Mukonda ua bhange kiki a ku te mázui, a ku tungula mu ibhaku ioso ni iama ioso ia iangu; u huhuta jinga ni mala bhoxi, u dia mavu izuua ioso ia muenhu ue.

¹⁵ Nga-nda kuta unguma bhu kaẋi ké eie ni muhatu, ni bhu kaẋi ka mbutu ié-eie ni mbutu iê-muène; muene ua kà ku bula o mutue, eie ua kà mu numata o kasende.

¹⁶ Anga u ambela o muhatu, uixi: Nga-nda ku ku vudisa o hadi mu kuimita kué; o ana u a vuala ni misusu; u kala jinga mu kuinda muadi ue, o muene-phe ua kà ku tumina.

¹⁷ Anga u ambela Adá, uixi: Mukonda eie uevu dízui dia muhetuʼé, eie ua di ku muẋi u nga ku kidika, ngixi kana kudia-ku; mavu-phe a a te mázui mukonda diʼeie, u dia-ku ni lamba, izuua ioso ia muenhu ué;

¹⁸ mavu a ku sabhukila jinga minha ni holokoso, eie muene-phe o kudia kué, idima i tunda mu mavu;

¹⁹ ku suualu ia pholo ié kuene ku ua kà dia o mbolo ié, katé ki ua kà vutuka ku mavu; mukonda kuene ku ua tundile; kuma eie uala u mavu, ku mavu kuene ku ua kà vutukila.

²⁰ Adá anga u luka muhatuʼé o dijina dia Eva; kuma muene mama ia athu oso a muenhu.

²¹ Ngana Nzambi anga u tungila Adá ni mukajiʼê, jimbinza ja ibha, anga u a zuika.

²² Ngana Nzambi anga u zuela, uixi: Tala, muthu ua di bhange kiá kala mukuetu, mu kuijiia kiauabha ni kiaiibha; kala kiki-phe, amoxi u sunununa lukuaku luê, u nomona ue ku muẋi ua muenhu, u dia, nʼa kale ni muenhu ua kambe dizubhilu;

²³ mukonda dia kiki, Jihova Nzambi ua mu kaie mu díbhia dia Edene, phala aie mu dima o mavu kua mu katuile.

²⁴ O muthu kia zubha o ku mu kaia, Nzambi u ta jixelube ku mutundila-kumbi ua kadíbhia ka Edene, ni xibhata ia mulengu u lunga kuku, u lunga koko, mu kuxita o njila iia ku muẋi ua muenhu.