Dimatekenu 29 - O Mikanda Ikola

Jakobo u bhiẋila bhu kixima kia Halane

¹ Jakobo anga u kuata makanda mu njila, katé ki bhiẋila mʼoxi ia ana a mutundidla-kumbi.

² Mu kutala kuala mu kuila, u mona kixima mu mukáu, o bhu mbandu ia kixima bhua zeka ilunga itatu ia jimbudi; kuma mu kiximʼumu muene muene kuteka menha a kunuisa o ibhaku; o ditadi dia xiti-ku ku thandu dia dikota muene.

³ Bhene bhene mu bhongoloka o ilunga ioso, anga a katula o ditadi ku kixima, a nuisa jimbudi, anga a ta dingi ditadi ku kixima bhu kididi kiê.

⁴ Jakobo anga u a ambela, uixi: Enu, phange jami, mu akua kuebhi, a kuetu? Exi: Etu tu akua Halane.

⁵ U a ambela dingi, uixi: Labano dia Naholo mua mu ijiia? Exi: Tua mu ijiia.

⁶ U a ambela, uixi: Muene uala kiambote? Exi: Uala kiambote muene; o monʼê ua muhatu, Lakele, muene ua mu kuizʼú, uala ku kombola o jimbudi.

⁷ Muene, uixi: Kumbi di dié hanji, ki thembu luua ia kubhongolola ibhaku; ki mu tekela-hi, ni mu nuisa o jimbudi, jiie dingi mu kúdia?

⁸ Exi: Ki tu tena, katé ilunga ioso ki i bhongoloka; kiene kia katula o ditadi ku kixima, ni tu nuise kiua o jimbudi.

Jakobo u sanga Lakele

⁹ Kioso-phe kia mu zuela ni iá, Lakele u tula ni jimbudi ja tatʼâ; kuma muene ua kexile kabhila uala ku jʼinga.

¹⁰ Bhenhobho-phe, Jakobo kioso kia zubha kumona Lakele, monʼa Labano, phange ia manhâ, ni jimbudi ja sekuluʼé Labano, phange ia manhâ, Jakobo u bhiẋila bhu kixima, u kundumuna o ditadi diala-ku, u tekela o kilunga kia Labano, phange ia manhâ, anga u ki nuisa.

¹¹ Jakobo anga u bhana beju kua Lakele, u zangununa o dízui diê ni kudila.

¹² Jakobo anga u tangela Lakele uixi: Ngi ndandu ia tatʼenu, ngi mona a phange iê ia muhatu Bebeka; Lakele anga u lenge kutudila tatʼâ.

¹³ Labano-phe kia zubha kuívua hundu ia Jakobo, monʼa phangʼiê ia muhatu, uiza ni kulenga mu takana-nê, u mu bhubhala, u mu bhana jibejo, u mu bheka ku bhata diê. Muene anga u kundila Labano ima ioso ia bhiti na-iu.

¹⁴ Bhenhobho Labano-phe uixi: Kidi kiene, eie u kifuba kiami, u xitu iami. Anga u kala-nê mbeji ia muvimba.

¹⁵ Kia zubha kubhita thembu ienhoio, Labano anga u ambela Jakobo, uixi: Né-mbe u phange iami, kífua u ngi kalakela mu ngoho? Amba hanji, se uandala ngi ku futa kikuẋi?

¹⁶ Labano anga u kala ni anʼê aiadi a ahatu: dikota dijina diê Liia, o ndenge dijina diê Lakele.

¹⁷ Liia o mesu a mu fefetela; o Lakele-phe ua uabha o pholo ni mukutu ua tula kiambote o jithalu.

¹⁸ Jakobo anga u uabhela Lakele; anga u zuela, uixi: Ngi ku bhikila mu sambuadi dia muvu, phala u ngi bhane monʼé Lakele, monʼé ua ndenge.

¹⁹ Labano u mu vutuila, uixi: Kota muene nga ku bhana-nê eie, ki ngi mu bhane ku diiala diengi; tu kadietu.

²⁰ Kienhokio Jakobo anga u bhika sambuadi dia muvu mu kilembu, mukonda dia kuzola Lakele; anga u i fika kala tu izuua ngó mukonda dia ku mu zola kua mu zolele kiavulu.

Labanu u tobhesa Jakobo

²¹ Jakobo anga u ambela Labano, uixi: Ngi bhane kiá muhatuʼami, kuma izuua iami ia tena kiá, phala ngi sakane-nê.

²² Labano anga u bhongolola akua bhata oso, u bhanga fesa.

²³ Anga ki bhita-phe kuila, kutula mu ngoloxi, u zangula monʼê ua muhatu, Liia, u mu bhekela-nê; anga u bokona kua muene.

²⁴ Labano anga u bhana kahatu kê Nzídipa kua Liia, phala a kale kahatu kê.

²⁵ Kúkia ni kimene, Jakobo kia mono kuma Liia a mu bhana-nê, u ambela Labano, uixi: Ua ngi bhangelaʼhi kiki? Manhi ki ngi ku bhikila mu ku ngi bhana Lakele? Eie-phe ua ngi tobheselaʼhi?

²⁶ Labano, uixi: Mukonda kʼoxi ietu ki kiene-ku kuila u bhana o ndenge mu kusakana, dikota nʼa xale kuema.

²⁷ Kumbidila hanji o semana ia iú, phala mukuá ue tu ku bhane-nê mu sambuadi dia muvu diamukuâ di u ngi kalakela.

Jakobo u sakana ni Lakele

²⁸ Jakobo anga u ki bhanga, u kumbidila hanji o semana ia dikota; o ki iabhu, Labano anga u mu bhana dingi Lakele dia monʼê mu kala muhatuʼê.

²⁹ Labano anga u bhana kua Lakele kahatu kê Bila, phala a kale kahatu kê.

³⁰ Jakobo anga u bokona ue kua Lakele, hé u zola-phe kiavulu Lakele, Liia ndenge; anga u mu bhikila dingi sambuadi dia muvu diamukuâ.

³¹ Jihova phe kia mono kuma Liia a mu zembe, u jikula divumu diê; Lakele-phe ua mu bhange kisûla.

Jakobo u kala ni kuinhi dia mona ni kiiadi a mala, ni mona umoxi ua muhatu

³² Liia anga uimita, u vuala monʼa diiala, u mu luka Lubene: kuma uambe, uixi: Jihova ua ngi suu mu kusebuluka kuami; kiki munumʼiami ua-nda ku ngi zola.

³³ Anga uimita dingi, u vuala monʼa diiala; anga u amba, uixi: Mukonda Jihova ua kʼivu kuma a ngi zembe, ua ngi bhana dingi iú, anga u mu luka, uixi: Ximinhá.

³⁴ Anga uimita dingi, u vuala monʼa diiala; anga u amba uixi: Kiki ni eme ni munumʼiami tua-nda kutakana kiambote, kuma nga mu vualele ana kitatu; kala kiki dijina diê ua mu luku Levi.

³⁵ Anga uimita dingi, u vuala monʼa diiala; anga u amba, uixi: Luamukuâ lulu nga-nda ku ximana Jihova; kiene kia mu bhekesa ku mu luka dijina dia Juda; anga u ximba kiá o kuvuala.