Dimatekenu 28 - O Mikanda Ikola

Izake u sulula Jakobo mu kuia ku Padalane

¹ Izake anga u ixana Jakobo, u mu bhana dibesá, hé u mu tendelela, uixi: Eie kana kusakana muhatu ku ana-ilumba ia akua Kanana.

² Balumuka, uie ku Padalane, ku dibhata dia Betuuele, tata ia manhenu, ua kà sole muhatu koko ku anʼa Labano, phange ia manhenu.

³ Nzambi, Uatena-Ioso, a ku zediuise, a ku bhane kuvuala, a ku sokolole, u di bhange u mundu ua ifuẋi ia athu.

⁴ A ku bhane dibesá dia Mbalahamu, ni eie ni mbutu ié; phala u lundule o ixi ia inhunginu ié mu uala kunhungina, ia bhana Nzambi kua Mbalahamu.

⁵ Izake anga u sulula Jakobo; muene anga uia katé ku Padalane kua Labanu, monʼa Betuuele mukua Sídia, phange ia Bebeka uavu anʼâ kiiadi Izaú ni Jakobo.

⁶ Izaú-phe kia zubha kumona kuila Izake ua bhana kizediuise kua Jakobo, iú ua mu sulula mu kuila ku Padalane, mu kusola muhatu koko; kuma kia mu bhana dibesá ua mu tendelela, uixi: Kana kusakana muhatu ku ana-ilumba ia akua Kanana;

⁷ Jakobo iú ua tumaka tatʼâ ni mamʼâ, iú ua katuka iú uai muene ku Padalane.

⁸ Izaú-ue kia mu tetulukila kuma ahetu a Kanana tatʼâ Izake ka mu uabhela;

⁹ anga Izaú uia kua Ijimaiele; ku hongo iala na-iu kiá ia ahatu aiadi, u banda-ku dingi Mahalata monʼa Ijimaiele, monʼa Mbalahamu, phangeʼa Nebaiote.

Jakobo u mona kisunji kia xikata ku nzoji

¹⁰ Jakobo anga u katuka bhu Bele-seba mu kuia bhu Halane.

¹¹ Mu kuenda anga u tula kididi, u zekela bhobho, mukonda kumbi dia mu fuila; ku matadi ala-bhu anga u katula-bhu dimoxi, u di ta dia kubhetuila, u zeka bhu kididi kienhoko uia ku kilu.

¹² Ku kilu anga u anjiua nzoji, u mona xikata aʼimika bhoxi ku mavu, maji o sungu iê ia tuta ku diulu; o ji-anjo ja Nzambi ji banda ji kulumuka ku xikata kuenhuku,

¹³ o bhu zoko-zoko diê anga u mona Jihova uala-bhu, uixi; Eme ngi Jihova, ngi Nzambi ia tatʼenu Mbalahamu, ngi Nzambi ia Izake; oxi iene i ua zekʼiii, hinu ngi ku bhana-iu, ni eie ni mbutu ié;

¹⁴ mbutu ié i sokoloka kala fufuta ia bhoxi, ia kà di zala ni ku luiji hi ku thunda, ni ku suku ni ku sulu; ko kué ni ku mbutu ié kuene kua kà bhandulukila miiji ioso mu ngongo.

¹⁵ Talesa eme muene ngala ni eie, ngi kulanga ku ididi ioso ku uia, hinu ngi ku bhangesa kuvutuka dingi mʼoxi muenhumu; kuma ki nga-nda ku ku ehela katé ki nga kà kumbidila ima ioso i nga ku ambela.

¹⁶ Jakobo anga u thathumuka ku kilu, uixi; Ni kidi kiene Jihova uala muene bhu kididi kienhiki, eme-phe ki nga kʼijidile.

¹⁷ Anga u kala ni uoma, uamba uixi: Kididi kiki ki kôla! Kiki ki kididi kiengi, kana, iene o inzo ia Nza mbi, iú uene o muelu ua diulu.

Philadi ia Betele

¹⁸ Jakobo anga u balumuka mu kimenemene, u kuata ditadi diene dia bhetuilile, u dʼimika kala philadi, u lundulula maji ku thandu diê.

¹⁹ Kididi kienhokio anga u ki luka Betele; mʼokulu-phe o dibhata diala-bhu a di lukile Luze.

²⁰ Jakobo anga u di hambelela, uixi: Se Nzambi u kala ni eme, nʼa ngʼendese mu njila i ngala kuilʼiii, nʼa ngi bhane o mbolo ia kúdia ni kizuatu kia kuzuata,

²¹ Eme hinu ni ngi bhongoloka dingi ku bhata dia tatʼetu ni kutululuka; Jihova-phe u kala Nzambi iami.

²² O ditadi didi di ngʼemika kala philadiʼdi, di kala inzo ia Nzambi, o ku jimbongo joso ji u ngi bhana, ngi ku bakuila-ku mbandu ia kakuinhi.