Dimatekenu 27 - O Mikanda Ikola

Izake u tuma Izaú ku mu lambela xitu

¹ Anga ki bhita kuila, mu kukala-kukala-phe, Izake ua kuka kiá, mu mesu mua mu kala kavunda, ka tena dingi kumona, u ixana Izaú, monʼe ua kota, uixi: Monʼami! Mona uetaia uixi: Emeʼiú.

² Muene u mu ambela uixi: Ua ngi mono-ze, nga kuka, ki ngejiia kizuua kiami kia ufuilu;

³ ndoko, kindala u maneke, ni kizu kié kia misongo ia mufula, ni mufula, uie mu iangu, u ngʼasele xitu;

⁴ o ki uiza, u ngi lambele o guizado iatouala, iene ku ngi uabhelʼoio, u ngi bhekele-iu, ngi die; phala o muenhu uami u ku bhane dibesá, kiosuʼiki kiluua ngi fua.

⁵ O Bebeka-phe anga u kala kuividila, hé u kʼivua kia zuela Izake ni monʼê lzaú. Izaú anga uia mu iangu mu seia xitu ianda kuiza na-iu ku bhata.

Bebeka ni Jakobo a nganala Izake

⁶ Bhenhobho Bebeka u ambela monʼê Jakobo, uixi: Ngevu-ze phaienu uala kuzuela ni phangiʼiê Izaú, uixi:

⁷ Ngi bhekele xitu ia kitumba, u ngi lambele guizado iatouala, phala ngi die, ngi ku bhane dibesá bhu pholo ia Jihova, kiosoʼiki kiluua ngi fua.

⁸ Kiki-phe, monʼami tumaka dízui diami kioso ki ngi ku tuma.

⁹ Ndeie ku ibhaku, u ngi bhekele-ku seseme jiiadi ja jihombo ja nete kiambote eme ngi lambe o ngizado iatouala phala phaienu, iene muene iene ku mu uabhelʼoio,

¹⁰ eie phala u i bheke kua phaienu, a die, a ku bhane dibesá kiosu-iki ka fu luua.

¹¹ Jakobo anga u ambela manhʼâ Bebeka, uixi: Tala, o phange iami lzaú-ze mukua kindemba, eme-phe nga txanana.

¹² Imoxi phaietu u ngi babata, u ngi mona ngi mukua makutu; mu kubhanga kiki nga-nda ku dibhekela mázui ku thandu diami, kana dibesá.

¹³ Kuala manhʼâ: Monʼami! Mázui mé ma kale ku thandu diami, eie tumaka ngó o dízui diami, ndeie u ngi bhekele-ju.

¹⁴ Muene anga uia, u ji takana, u tudila manhʼâ, muene hé u bhanga o guizado iatouala, iene mu uabhela phaiʼiâ.

¹⁵ Bebeka anga uia u katula o izuatu ia makembu ia Izaú, monʼê ua kota, iala na-iu mʼonzo anga u zuika Jakobo monʼê ua ndenge;

¹⁶ o ibha ia jiseseme ja jihombo, iene ia mu zuika mu maku, ni mu xingu mua txanana.

¹⁷ Anga o guizado iatouala ni mbolo ia zubha ku iudika u i bhana bhu maku a monʼê Jakobo.

¹⁸ O muene anga u bhiẋila kua phaiʼiâ, uixi: Phaphai; kuala phaiʼiâ, Eme iú; eie nanhi, mona mi?

¹⁹ Jakobo anga u ambela tatʼâ, uixi: Eme Izaú, monʼé ua phande-kumbi; nga bhange kioso ki ua ngi tumu; bhetuka-phe kiá, u xikame, u die xitu iami ia unhanga, phala o muenhu ué u ngi bhane dibesá dié dia muxima.

²⁰ Izake anga u ambela monʼê, uixi: O mbole ua i mono-phe kiá kienhiki kindalʼiki monʼami? Muene-phe, uixi: Mukonda o Jihova dia Nzambi ié muene ua ngi bhana kibhuku.

²¹ Izake anga u ambela Jakobo, uixi: Bhiẋila kunu, nga ku diondo, ngi ku babate, monʼami, mba eʼmuene u monʼami Izaú, mba kana.

²² Jakobo anga u zukama kua Izake, tatʼâ; u mu babata, uixi: O dízui, dízui dia Jakobo, maji maku, maku a Izaú muene.

²³ Kala kiki ka mu tongolola mukonda ku makuʼâ kua mu kala kindemba kala maku a phangʼiê Izaú; anga u mu bhana dibesá.

²⁴ Uixi: Ni kidi muene, eʼmuene u monʼami Izaú? Uixi: Eme muene.

²⁵ Uixi: Beka kunu, ngi die ku xitu ia monʼami ia unhanga, phala ngi ku bhane o dibesá dia muxima. Anga u mu bhekela bhua zukama, u kuata kúdia; u mu bhekela ue ni vinhu, u nua.

²⁶ Tatʼâ Izake anga u mu ambela, uixi: Zukama kunu u ngi bhane beju, monʼami.

²⁷ Anga u mu zukama, u mu bhana o beju; anga u ivua dizumba dia izuatu iê, u mu bhana dibesá, uixi: Ivua o dizumba dia monʼami. Mukuâ ni mukáu Jihova ua u bhana dibesá;

²⁸ Nzambi a ku bhane dimume dia diulu, Ni mavu a bhana idima mu ngongo, Ni masa ni vinhu ia nzungule;

²⁹ Athu engi a ku bhikile, Miiji ia kanga i ku bheza; Kala u ngana u tumina phange jê, Anʼa mamʼenu ende ni ku ku diundila. A kale mukua mázui uoso u ku ta eie o mázui A kale ni dibesá uoso u ku bha dibesá.

Izaú uiza kua tatʼâ, u sanga Jakobo ua tambula kiá dibesá

³⁰ Bhenhobho Izake kioso ngoho kia zubha kubhana dibesá kua Jakobo, Jakobo iú ua tundu-ke bhu pholo ia tatʼâ Izake, phangʼiê Izaú u tula ua tundu mu unhanga.

³¹ Muene anga u lamba ue o guizado iatouala, u i bhekela tatʼâ anga u mu ambela, uixi: Phaietu balumuka kiá u die ku xitu ia unhanga ua monʼé phala o muenhu ué u ngi bhane dibesá dié dia muxima.

³² Tatʼâ Izake anga u mu ibhula: Eie nahi? Muene uixi: Eme monʼé Izaú, monʼé ua phande-kumbi.

³³ Izake bhenhobho anga u sasumuka, u teketa muene kiavulu, uixi: Nanhi muene-phe ua kuatele xitu ia unhanga, iú uejile na-iu bhabha, eme nga di kiá, ngekuta, eiʼeie ua mu bhingana-ke? Nga mu bhana kiá dibesá ua-nda kuzediua muene. Kuma o dibesá u kala na-diu muene.

³⁴ Izaú ki evu o maka iá a tatʼâ, u dikola ni mukondo ua vulu, u ẋikujuka ni kudila, u ambela tatʼâ, uixi: Eme uami ngi bhane dibesá, tatʼetu! Phaphai, tata!

³⁵ Kuala tatʼâ, Phangʼié uejile ni kudimbikiza, iú ua ku tambula o dibesá dié.

³⁶ Izaú anga u zuela, uixi: Manhi dijina dia Jakobo ki dia mu fuama muene? Ua ngi tobhesa luiadi luosʼulu! Ua dianga ku ngi tambula o ukota uami; o kiki ua ngi tambula dingi o dibesá diami. Uixi-phe: Kifua ki kua xala dingi dibesá dia ku ngi bhana eme?

³⁷ Izake-phe u vutuila Izaú, uixi: Abha nga mu bhange kiá kukala ngana ié, o jiphange jê joso nga mu bhana-ju ku kaia selevende jê, nga mu bhakuila ni masa ni vinhu; eie-phe ki ualʼokio ngi ku bhanga dingi kiebhi, monʼami tata?

³⁸ Izaú anga u ambela tatʼâ, uixi: Kifua dibesá dimoxi ngó di uala nadiu, phaietu tata? Ngi bhane uami dibesá, phaietu tata! Izaú anga u zangula dízui, u ta jingololo ni kudila.

³⁹ Izake, tatʼâ u mu vutuila, uixi: Eie-ze, mu kutunga, o mavu ambote ua-nda ku a xia dikanga, o dimume di tuluka ku diulu ki di ku tula ku thala ku u kala;

⁴⁰ Mu kukala, u laiela ku xibhata ié, o phangʼié u mu bhikila; Hadia-phe ki u sutunuka, ophi iê u di zula-iu mu xingu.

⁴¹ Izaú anga u zemba Jakobo, mukonda dia dibesá diodio dia mu zediuisa na-diu tatʼâ; Izaú anga u amba ku muxima uê, uixi: Izuua ia thambi ia phaietu ia zukama; phange iami Jakobo, kiene kiua ki ngi mu jibha.

⁴² Kia tange-phe Izaú, o monʼê ua kota, a ki kundila Bebeka; muene anga u tuma kuixana Jakobo, o monʼê ua ndenge, u mu ambela, uixi: O phangʼié Izaú uala ku ku kanena, ua mesena ku ku jibha, kiene kia di xibhilʼê.

⁴³ Kiki-phe, monʼami, ngʼivue dízui diami: Bhabha tunda-bhu, u lengele kua phange iami Labano, ku Halane;

⁴⁴ ua kà bhange tu izuua koko, katé phangʼiê ki mu bhua o njinda;

⁴⁵ hinu se kala dingi ku ku kanena, njinda ia mu bhu, o ki ua mu bhange kia mu jimbi kiá, ngi tuma ku kuixana, uize dingi kunu; kuma phala-hi ki bhita kuila anʼami kiiadi ene oso a ngi fua mu kumbi dimoxi?

⁴⁶ Bebeka anga u ambela Izake, uixi: Muenhu ua ngi kumu, mukonda dia ahatu enhá, anʼa Hete; Jakobo ue se u sakana muhatu ku a nʼa Hete, kala enhá, akuaʼxi mumu, nginda ngi dia hûnji, ni ngi fu; kuma o muenhu u kala kiki ngi u bhangaʼhi?