Dimatekenu 26 - O Mikanda Ikola

Izake uia ku Jelale mukonda dia nzala

¹ Mʼoxi anga muiza nzala, o nzala iejile mu izuua ia Mbalahamu iengi; mukonda dia kiki-phe, Izake uia kua Abimeleke, muenexi ua akua Fidíxa, bhu Jelale.

² Jihova anga u mu tukulukila, u mu ambela, uixi: Kana kukulumuka mu Ijito, maji u tunga mu ixi ioso i ngi ku idikiza.

³ Nhungana mʼoxi mueniʼumu, eme-phe ngi kala bhu mbandu ié, ngi ku bhana kuzediua; kuma ni eie muene ni mbutu ié hinu ngi mi bhana jixi josoʼiji ngi kumbidila mulôko uami u nga lokela tatʼenu Mbalahamu;

⁴ ngi sokolola mbutu ié kala jithéthembua ku diulu, mbutu ié ene nga a bhana jixi josoʼiji; ku mbutu ié kuene kua kà bhandulukila miiji ioso mu ngongo.

⁵ Mukonda Mbalahamu ua tumaka dízui diami, ua kuata mutendelu uami, ni ijiia, ni itumu, ni ngonge jami.

⁶ Kienhiki, Izake anga u tunga bhu Jelale.

⁷ O akuaʼxi mueniʼomo anga a mu ibhula ku mbandu ia mukajiʼê; uixi-phe: Phangiʼami ia muhatu; kuma uoma ua mu kuata ua kuila mukajiʼami; uixi: Imoxi akuaʼxi a ngi jibha mu luimbi lua Bebeka mukonda ua uabha kinene ku mu tala mesu.

⁸ Kia zubha-phe kubhanga-bhu thembu iavulu, bhu kala kizuua Abimeleke, muenexi ua akua-Fidíxa, u kala mu talela bhu njanena, anga u mona Izake uala mu tonoka ni Bebeka mukajiʼê.

⁹ Abimeleke anga u ixana Izake, uixi: Ió-ze, mu tanga o kidi, mukajiʼê; ua ki zuelela-hi-phe kuila phange iami ia muhatu? Kuala Izake: Nga ki zuelela uoma, ngixi a ngi jibha mu luimbi lua muhatuʼami.

¹⁰ Abimeleke-phe, uixi: Phala-hi-phe ku tu bhanga kiki? Bhenhabha kia tobhedié kiá kubhita, kuila diiala dioso-dioso ku kifuẋi kiki u zeka ni muhatuʼé, eie anga u tu bhekela kuêla ku thandu dietu.

¹¹ Abimeleke bhenhobho anga u tendelela o mundu uê uoso, uixi: Uoso u kuata ku diiala didi mba kua muhatuʼê, u kala muthu ua ku mu jibha.

Izake ni ixima iê

¹² Izake anga u dima mʼoxi mueneʼomo, o mbutu ia kuu anga i bhana mu luhama ku muvu umoxi; mukonda Jihova ua mu zediuixile.

¹³ Anga muthu muenʼiú u kala mvuama, uia ni kujinga dingi, katé kia di bhange muene munéne kiavulu;

¹⁴ anga u kala ni ibhanga ia jimbudi ni ia jingombe, ni dibhata dia dikota diezala abhika, anga ki bhekela akua-Fidíxia ku mu kala ni luimbi.

¹⁵ Hé o ixima ioso-phe ia kandele o jiselevende ja tatʼâ, mu izuua ia kexe hanji tatʼâ Mbalahamu ku muenhu, akua Fidíxia a i xita, a i lamba ni mavu.

¹⁶ Abimeleke anga u ambela Izake, uixi: Tunda bhu mbandu ietu, mukonda ua tu tundu kiá, etu tuala ndenge eie uala kota.

¹⁷ Izake anga u tunda-bhu, u ta kibangu kiê mu honga ia Jelale, u kala mueneʼomo.

¹⁸ Izake anga u jikula dingi o ixima ia menha, ia kandele mu izuua ia tatʼâ Mbalahamu, kuma akua Fidíxia a i vumbikile, kia zubha Mbalahamu o kúfua; Izake anga u i luka dingi majina ma i lukile tatʼâ.

¹⁹ Jiselevende ja Izake-phe, anga a kanda kixima mu honga, ki kala mu bhana menha ma tunda bhoxi ni kufuáfua.

²⁰ O abidi a ibhaku mu Jelala anga a di kuata ni abidi a ibhaku ia Izake, exi: Iá menhʼetu; muene kiximʼiki anga u ki luka Eseke mukonda a di kuata-nê jimvunda bheneʼobho.

²¹ Anga a kanda dingi kixima kiamukuá, anga eza a ki kuatela dingi jimvunda; muene anga u ki luka Setina.

²² Anga u sondoloka dingi u kanda kixima kiamukuá; kiki kiá keza dingi ni jimvunda mu di kuatela-kiu; anga u ki luka Lehobote; kuma uambe, uixi: Kiki Jihova ua tu bhana kididi kia zanze, tua-nda kuzediua kiá mʼoxi mumu.

²³ Kutunda bhobho, anga u banda, u kala bhu Bele-seba.

²⁴ Jihova anga u mu tukulukila usuku uenʼió, u mu ambela, uixi: Eme ngi Nzambi ia Mbalahamu tatʼenu; kana kukala ni uoma ua kima kioso-kioso, kuma eme ngala bhu mbandu ié, ngi ku bhana kuzediua, o mbutu ié ngi i sokolola, mukonda dia selevende iami Mbalahamu.

²⁵ Izake anga u tunga kalatódio bheneʼobho, u hingila dijina dia Jihova, hé u ximbika-bhu o balaka iê; o jiselevende ja Izake anga a kanda-bhu ue kixima.

Abimeleke u ta kikutu ni Izake

²⁶ Abimeleke anga u tunda mu Jelale, uia mu ku kana Izake kuoso kuala, uambata ni Ahuzete kamba diê, ni Fikole kilolo kiê kia ita;

²⁷ Izake-phe uixi: Mua ngi kanena-hi, enu-enu mua ngi zembe, enu mua ngi kaie mu kaẋi kenu?

²⁸ Kuala ene: Mukonda tua mono kiambote kuma Jihova uala ni eie; tuixi-phe kota bhu bhite muloko bhuʼaxaxi ketu ni eie, tu te kikutu.

²⁹ Loka kuma eie hinu ku tu bhange kiaiibha, kala etu uetu tua kambe ku ku kuata, tua ku bhange ngó mbote, etu tua ku ehela kusuluka ni paze. Eie kiki uala u muthu a ku zediuisa kuala Jihova.

³⁰ Bheneʼobho Izake uà bhangela kizokola ene hé a dia a nua.

³¹ Kúkia, a balumuka mu kimenemene, hé a di lokela ene mudiâ; Izake anga u a sulula, a muangana ni paze.

³² O mu kizuua kieneʼokio-phe, jiselevende ja Izake eza ku mu tangela o kixima kiala mu kanda, exi: Tua sange kiá menha.

³³ Muene anga u ki luka Seba; kala kiki o dibhata diodio a dʼixana Bele-seba katé mu kizuua kia lelu.

³⁴ Izaú kia zubha kubhanga makuinhi auana a mivu u sakana muhatu Judite, monʼa Bedi, mukua Hete, ni muhatu uamukuâ Basamate, monʼa Elone mukua Hete.

³⁵ Enhá-phe, a bheka kulula ni dilamba dia vulu ku muxima ua Izake ni ku muẋima ua Bebeka.