Dimatekenu 25 - O Mikanda Ikola

O luvualu lua Mbalahamu Kua Ketula

¹ Mbalahamu anga u sakana muhatu ua mukuá, dijina diê Ketula;

² Anga u mu vualela Zimilame ni Jokosane, ni Medane, ni Midiiana, ni Jijibake, ni Suua.

³ Jokosane anga u vuala Seba ni Dedane; anʼa Dedane, Axudimi, ni Letusime, ni Leumine.

⁴ Anʼa Midnana: Efa, ni Efele, ni Henoko, ni Abida, ni Eleda; ene osoʼá anʼa Ketula.

⁵ Mbalahamu-phe jimbongo jê joso ua ji bhana Izake.

⁶ Maji anʼa akâma-phe, a kexe-nâ Mbalahamu, Mbalahamu ua a bhana maujitu kioso muene kiala hanji ku muenhu, u a tuma ku leste, a di sandule ni monʼê Izake, a kala mʼoxi ia mutundila-kumbi.

Ufuilu ua Mbalahamu

⁷ IIi iene-phe izuua ia muenhu ua Mbalahamuʼii, u laia mu hama ia muvu ni makuinhi sambuadi ni itanu.

⁸ Mbalahamu anga u batula muenhu, ufua kiá ku uadiakimi uavulu, ua kuka kiá, ua kukidila muene, mivu ia mu kumu; anga a mu bhongoluela ku malembʼê.

⁹ Anʼê Izake ni Ijimaiele anga a mu funda mu dibânda dia Makapela, mu mukáu ua Efelone, monʼa Zouale, mukua Hiti, bhua lulama ni Mamele;

¹⁰ uene mukáu ua sumbu Mbalahamu ku anʼa Hiti; muene mua funda Mbalahamu ni Sala mukajiʼê.

¹¹ O kutunda mu kúfua kua Mbalahamu, Nzambi u zediuisa Izake monʼê; Izake anga u tunga bhu kixima kia Lahai-loi.

O luvualu lua Ijimaiele

¹² Ingo ia vumu ienhiʼi ia Ijimaiele, monʼa Mbalahamu ua diiala, a mu vuala ni Hangale mukua Ijito, kahatu ka Sala.

¹³ Anʼa Ijimaiele majina mâ eniʼá, kala kia di kaiela ku majina mâ ni ku miiji iâ; phande-kumbi ia Ijimaiele, Nebaiote; ni Kedale, ni Adbeel, ni Mibisame,

¹⁴ ni Mixima, ni Duna, ni Masa,

¹⁵ ni Hadade, ni Tema, ni Jetule, ni Nafixe, ni Kedemah;

¹⁶ enhá ene anʼa Ijimaiele, ku majina mâ, ni ku jisanzala jâ, ni ibangu iâ; kuinhi dia sobha ni kiiadi, kia di kaiela mu ilombo iâ.

¹⁷ Iii iene izuua ia mivu ia muenhu ua Ijimaiele, hama ia muvu ni makuinhi atatu ni sambuadi; anga u batuka muenhu, ufua, hé a mu bhongoluela ku malembʼê.

¹⁸ O kutunga kuâ atunda mbambe Havila katé ku Asídia ku mutundila-kumbi ua Ijito; a zukama ku jindandu jê joso maji ene a suku ku thunda.

Ana a vuala Izake

¹⁹ Ingo ia vumu ienhiʼii ia Izake, monʼa Mbalahamu: Mbalahamu u vuala Izake:

²⁰ Izake anga u kala ni makuinhi auana a muvu kia sakana ni Bebeka, monʼa Betuuele, mukua Sídia, mu Panda-alame, phange ia Labanu mukua Sídia, phala a kale mukajiʼê.

²¹ Izake anga u diondela muhatuʼê kua Jihova, mukonda kala kuvuala; Jihova anga u mu ivua kudikola kuê, Bebeka mukajiʼê anga u imita.

²² Ana anga a kala mu bhânga moxi diê; muene-phe uixi: Kua ngiza-hi dingi, ngala kiki? Anga uia mu kuibhula kua Jihova.

²³ Jihova anga u mu vutuuila, uixi: Ifuẋi iiadi ia ku kala moxi diê, miiji iiadi ia kà di uanununa tunde mu vumu, muiji umoxi ua kà tunda mukuâ mu nguzu, o dikota dia kà bhikila o ndenge.

Uvadiue ua Izaú ni Jakobo

²⁴ Kia zubha kubhiẋila mu izuua iê ia kudisanza, manhi mu vumu diê mua kala akua-ndumba.

²⁵ Ua dianga kutunda anga u kusuka, u vula jindemba mu mukutu; kiene kia mu lukila dijina dia Izaú.

²⁶ Kia zubha kutunda, kua kaiela mukuá, lukuaku-phe lua kuata mu kasende ka Izaú; kiene kia mu lukila dijina dia Jakobo. Izake anga u kala mu makuinhi asamanu a muvu kia vuala muhatuʼê ana eniʼá.

Izaú u sumbisa o ukota uê

²⁷ Minzangala anga i kula; Izaú anga u kala dinhanga dia dikota, mukua kunhunga mu iangu; Jakobo-phe muthu ua di xibhʼê, uia ni kuxalʼê ku bhata.

²⁸ Izake-phe u zola Izaú, mukonda uene kudia ku xitu iê ia unhanga; Bebeka-phe u zola Jakobo.

²⁹ Jakobo anga u lamba makunde; Izaú anga u tunda mu iangu, uiza kubhata, ua senduka ni nzala.

³⁰ Izaú anga u ambela Jakobo, uixi: Nga ku diondo ngi bhane-ku ngidie, Kiakusukʼokio mʼombia; nga senduka ni nzala; kiene kia xalela ni dijina dia Idomo;

³¹ Jakobo-phe, uixi: Ngi sumbise-phe kizuua kia lelu o ukota ué.

³² Kuala Izaú: Ki ngalʼiki-ze, kua ngi kambe ngó kúfua; ukota-phe ua-nda ku ngi bhandulula kima kiahi?

³³ Jakobo uixi: Ngi lokele-phe kizuua kia lelu; muene anga u mu lokela, u sumbisa o ukota uê kua Jakobo.

³⁴ Jakobo anga u tela Izaú mbolo ni makunde; anga u dia, u nua menha, u balumuka-bhu, uia njila iê; kala kiki Izaú, ukota uê ua u kita ki kima.