Dimatekenu 24 - O Mikanda Ikola

Mbalahamu u tuma selevende iê kusota muhatu phala Izake

¹ Mbalahamu anga u kuka, ua sungu-ku kiá ku izuua, Jihova phe ua mu bhele kubhanduluka mu ima ioso.

² Mbalahamu anga u ambela selevende iê ua kexi dikota mu dibhata diê, mutumini a ima ioso ia kexile na-iu, uixi: Tá lukuaku lué koxi a ditabela diami.

³ Eme ngi ku lokese mu dijina dia Jihova, Nzambi ia diulu ni ixi, kuma monʼami ku mu sotele muhatu mu ilumba iʼakuaxi ia Kaná mu nga tungu-mu;

⁴ maji uia kʼoxi ietu, kuala jindandu jami, kuene ku ua kà bhenga muhatu phala monʼami Izake.

⁵ Selevende iê anga u mu ambela, uixi: Imoxi muhatu ka ẋikina kuiza kʼoxi kunu ku tuala; manhi monʼé ngi mu bheka dingi kʼoxi ienu ku ua tundile?

⁶ Kuala Mbalahamu: Aiuka! Ku ki sese, o kubheka dingi monʼami koko ku tua tunda kiá.

⁷ Jihova, Nzambi ia diulu, ua ngi katula mu dibhata dia tatʼetu, ni mʼoxi mua ngi vualela, iú ua ngi zuelesa, ua ngi lokela, uixi: Ixi ienhiʼii ngi i bhana mbutu ié; muene ua kà tuma anjo iê ku pholo, o kuenhoko kuene ku ua kà bhenga muhatu phala monʼami.

⁸ Muhatu-phe se ka ẋikina ku ku kaiela mu kuiza kunu, bheniʼobho eie ua jituka ku mulôko uami u nga ku lokesa; kabasa monʼamiʼa diiala kua mu bheka dingi koko ku nga tundu.

⁹ Selevende anga u ta lukuaku luê kʼoxi a ditabela dia Mbalahamu, muadiʼê, anga u loka kala kia di ẋikinisa.

¹⁰ Selevende anga u katula kuinhi dia kamelu, ku jikamelu ja ngana iê, u katuka, uambata ima ioso ia tokala, kuma jimbongo joso ja muadiʼê ja mu kala bhu maku mê; anga u zangula, uenda katé ku Mezopotamiia, ku sanzala ia Naholo.

¹¹ Kia zubha kubhiẋila, u fukamesa jikamelu bhu mbanduʼa fiẋi ia menha, mu kumbi dia ngoloxi, kithangana kia anʼa ahatu kuia mu teka o menha.

¹² Anga u zuela, uixi: Eie u Jihova, u Nzambi ia muadiʼami Mbalahamu, nga diondo, ngi bhane kitakanesu kiambote mu kizuua kia lelu, o muadiami Mbalahamu u mu bhange o mbote.

¹³ Talesa, bhu mbandu ia fiẋi ia menha bhu ngalʼabha, o ilumba ia akua bhata didi, ia-nda kuiza mu teka o menha;

¹⁴ kikale-phe, Ngana, kuma uoso kilumba ngi mu ambela, ngixi: Tulula disanga dié, nga ku diondo, ngi nué-ku; muene nʼa kèla: Nué, ni jikamelu jé ngi ji nuisa ue; mueniʼó a kale muene o muhatu ua mu solela selevende ié Izake; bhene bhu ngi kʼijidila, kuma muadiʼami Mbalahamu Eie ua mu bhange o mbote.

¹⁵ Anga ki bhita kuila, kiluua ngó a zubha kuzuela, Bebeka iú uizʼú, monʼa Betuuele, uavu manʼiâ Mídika, muhatu a Naholo phange ia Mbalahamu, iú uiza ni disanga bhu isuxi.

¹⁶ Kilumba kiki anga u uabha kiavulu ku mu tala, muzeletete hanji, kana diiala ua mu ijiia luua; anga u tuluka mu fiẋi ia menha, u izalesa o disanga diê, anga u banda.

¹⁷ Selevende anga u lenga ku mu batuila, uixi: Nga ku diondo, ngi bhane tumenha mu disanga dié, ngi nué-ku.

¹⁸ Muene-phe, uixi: Nué, ngana; u tulula disanga diê ni lusolo, u mu kuatela-diu bhu maku, anga u mu bhana kúnua.

¹⁹ Kia zubha ku mu bhana kúnua, uixi: Ni jikamelu jé, ngi ji tekela ue, katé ki ji zubha kúnua.

²⁰ Anga u bhanga lusolo, menha mu disanga u ma lunduluila mu ulungu, u lenga u sunga dingi amukuâ mu kixima, u teka muene menha phala o jikamelu jê joso.

²¹ Suí, ku mona muhatu uala mu bhanga kiki, diiala diemana ngó, ua di xibhʼê, phala kuijiia mba kidi kiene Jihova ua mu bhana kuzediua mu njila iê ioso iende, mba kana.

²² Anga ki bhita kuila, kia zubha o jikamelu kúnua, diiala u katula nela ia ulu i pezala kaxaxi ka xikulu, ni jisêlu jiiadi ja kuzuatela mu maku, ji pezala kuinhi dia xikulu ia ulu.

²³ Uixi: Mona kilumba, eʼ tatʼenu nanhi? Ngi tangele-kiu; o kuila ku bhata dia tatʼenu tu mona-ku kididi kia ku tu zalela?

²⁴ Monʼa kilumba, uixi: Eme ngi monʼa Betuuele, uavu manʼiâ Mídika, ua mu vuala ni Naholo.

²⁵ U ta-ku dingi, uixi: Tuala ni iangu, ni ngânda ia jikamelu, ia soko muene, ni kididi kia ku mi zalela.

²⁶ Diiala bhenʼobho bhetama mutue, anga u bheza Jihova.

²⁷ Uixi: A tane-ku! Jihova, Nzambi ia muadiʼami Mbalahamau, ka zúmbuka ku henda iê ni kidi kiê iedikiza jinga muadiʼami; eme bhabha Jihova ua ngendesa muene mu njila mu ngejila, iú ua ngi bheka bhu bhata dia ji-phange ja ngana iami.

²⁸ Monʼa kilumba anga u lenga, hé u tudila mʼonzo ia manʼiâ o maka mosoʼama.

²⁹ Bebeka anga u kala ni phange iê ia diiala, dijina diê Labanu; Labano anga uia ni lusolo, bha xala o diiala, bhu ndunga ia menha.

³⁰ Kuma muene kia mono nela ni jisêlu ja zuata phangʼiê ia muhatu mu maku, ni kievu maka ma a kundu Bebeka phangʼiê, kuila kiene kia ngi kundu muthu muenhó; Labano-phe uia ku diiala, u mu sanga iú ni jikamelu jê, bhu ndunga ia menha.

³¹ Uixi: Tu sange, u muthu uangene ua Jihova; uemanena-hi ngó mu kangʼumu? Nga ku iudikila kiá o kijima, sai ue kididi kia jikamelu.

³² Bheniʼobho o diiala muenʼió anga u bhiẋila ku bhata, a longomona jikamelu; ene anga a bhana o iangu ni ngânda ku jikamelu; u bhana menha phala kusukula inama, ni inama ia màla amukuá eza na-u kumoxi.

³³ Anga a mu tela kúdia ku meza, muene-phe uixi: Ki ngi di luua, kikala ngi mi kunda hanji kioso kia ngi bheka. Labanu-phe uixi: Di jimbule.

Bebeka a mu bheka

³⁴ Kuala muene: Eme ngi selevende ia Mbalahamu.

³⁵ O Jihova-phe ngana iami ua mu zediuisa kiavulu muene, kia mu bhekela kukala ni kijingo kia dikota; ua mu bhana ni ibhanga ia jimbudi ni ia jingombe, ni phalata ni ulu, ni abhika a mala ni a ahatu, ni jikamelu.

³⁶ O Sala-phe, mukaji a muadiʼami, ua mu vualela monʼa diiala mu ukukilu uê; o muene iú ua mu bhana o jimbongo jê joso.

³⁷ Muadiʼami-phe ua ngi lokesa, uixi: Monʼami ua diiala kana ku mu sotela muhatu ku ilumba ia anʼa Kanana, avu oxi iâ mu nga tungu.

³⁸ Maji-phe, eʼ ua kàia ku bhata dia tatʼetu, ku jindandu jami, kuene ku ua kà sota muhatu phala monʼami.

³⁹ Eme-phe, eme ngʼambela muadiʼami, ngixi: Imoxi muhatu ka ẋikina ku ngi kaiela, nʼeza kunu.

⁴⁰ Muene ua ngʼambela, uixi: Jihova ió ua bhingi ngala kuenda jinga ku mesu mê, u tuma anjo iê ku ku bheka, u ku bhana kuzediua mu njila mu ua-nda kuila, o monʼami ua diiala ua kà mu solele muhatu ku jindandu jami, mu bhata dia tatʼetu.

⁴¹ O kujituka mu muloko uami u nga ku lokesa, kioso ki ua kà bhiẋila ku undandu uami, se ene a dituna ku ku bhana-nê, mulôko uami ki u ku kuata dingi.

⁴² Maji o lelu-phe ki nga bhiẋila bhu ndunga ia menha, ngixi: Eie u Jihova, u Nzambi ia muadi ʼami Mbalahamu, se kidi kiene ua ngi bhana kuzediua mu njila ienhiʼii ia ngi bheka,

⁴³ tala, bhu mbanduʼa fiẋi ia menha, bhu ngʼemenaʼbha, ki kale-phe kiki kuila, o mona-kilumba uoso uiza mu teka menha, anga ngi mu ambela, ngixi: Ngi bhane, nga ku diondo, tu menha mu disanga dié, ngi nue-ku;

⁴⁴ muene nʼa kèla: Nué, ni jikamelu jé, ngi ji tekela; muenʼió a kale muene o muhatu a mu solo kuala Jihova mu kala muhatu ua monʼa muadiʼami.

⁴⁵ Kioso-phe kiluua ngó ngi zubha kuzuela ni muxima uami, Bebeka-ze iú uizʼú ni disanga diê bhu kisuxi; anga u tuluka mu ndunga ia menha, u teka; eme-phe nga mu ambela, ngixi: Ngi bhane-ku tumenha, ngi nue.

⁴⁶ Muene-phe muʼanzanza muenhomo ua tulula o disanga diê bhu kisuxi, uixi: Nué, ngi tekela ue jikamelu jé; eme nganu, iú ua nuisa ue o jikamelu.

⁴⁷ Eme anga ngi mu ibhula, ngixi: Monʼa kilumba, u monʼa nanhi? Muene-phe uixi: Ngi monʼa Betuuele, monʼa Naholo, a mu vuala ni muhatuʼê Mídika; emʼeme nga mu zuika o dilenge mu pholo, ni jisêlu mu maku.

⁴⁸ Kieniʼokio, anga ngi bhetama mútue, ngi bheza Jihova, ngi tanesa Jihova, dia Nzambi ia muadiʼami Mbalahamu, ua ngendesa njila iambote mu kusola monʼa kilumba, monʼa phange ia muadiʼami, mu kala muhatu ua na velu monʼê.

⁴⁹ Kiki-phe, se mu bhanga o henda ni kidi kua muadiʼami, ngʼambedienu; o ki muila kana, ngʼambedienu ue; phala ngi di tele ku kúdia mba ku kiasu.

⁵⁰ Bhenhobho ni Labanu ni Betuuele a vutula, exi: Kimbamba kia tundu kua Jihova ki tuala dingi ni kuzuela, né kiauabha, né kiaiibha.

⁵¹ Bebeka iu-é iú, mu tambudié, uie-nê a kale muhatu ua mona muadiʼé, kala kia ki tange Jihova.

⁵² Bhenhobho, o selevende ia Mbalahamu kievu o kuzuela kuâ, u mbolomoka mu mavu, u diunda kua Jihova.

⁵³ Selevende anga u katula makembu ma phalata ni makembu ma ulu, ni izuatu, u i bhana kua Bebeka; ni phangʼiê ia diiala ni manʼiâ, u a bhana ue imbamba iate kiavulu muene.

Bebeka a mu bhenga, aia-nê kua Izake

⁵⁴ Anga a dia, a nua, ni muene ni màla amukuá ejila-nê kumoxi, a zeka usuku ueniʼó; kúkia ni kimene, uixi: Ngi suludienu kiá, ngiie kua muadiʼami.

⁵⁵ Phange iê-phe ia diiala ni manhʼâ, exi: Monʼa-kilumba a kale hanji, tu bhange-nê tu izuua, né dikuinhi ngó; phala aie kiua.

⁵⁶ Muene-phe u a ambela, uixi: Ki mu ngi fudise kuenda, kuma Jihova ua ngi bhana kuzediua mu njila ienhiʼii i ngende; ngi suludienu phala ngiie kua muadiʼami.

⁵⁷ Exi-phe: Tu ixane monʼa kilumba muene, tu mu ivue mu kanu diê.

⁵⁸ Anga exana Bebeka, a mu ibhula, exi: Uia kiá ni muthu muenhú? Uixi-phe: Ngiia.

⁵⁹ Kala kiki a sulula Bebeka phangʼiâ, ni maseka iê, ni selevende ia Mbalahamu ni makuenze mê.

⁶⁰ Anga a benzela Bebeka, a mu ambela, exi: Phangʼietu uà kala u mama ia jimidi ja ndumba, mbutu ié, i tambule konda ia muelu ua jinguma jâ.

⁶¹ Bebeka anga u zangula, ni ilumba iê, endela ku jikamelu, a kaiela diiala dienhidi; selevende anga u tambula Bebeka, u suluka njila iê.

⁶² Izake-phe ua bhiti mu kikangalakata, ueza katé bhu kixima kia Lahai-loi, kuma ua tungu mu mikáu ia sulu.

⁶³ Izake anga uia mu mukáu mu kuxinganeka mu kumbi dia ngoloxi; anga u bhetula mesu u mona mu njila muala kuijiia jikamelu.

⁶⁴ Bebeka ue u bhetula o mesuʼê, u mona Izake, anga u tuluka ku kamelu.

⁶⁵ Anga u ambela selevende, uixi: Diiala diodio nanhi, uala kuijiia mu mukáu mu ku tu batuila? Kuala selevende: Muenhó muene muadiʼami; muhatu anga u kuata veu iê u di futa.

⁶⁶ Selevende anga u kunda Izake ima ioso ia bhange.

⁶⁷ Izake anga u bheka Bebeka mu balaka ia manʼiâ Sala, anga u tambula Bebeka u kala mukajiʼê; anga u mu zola; malamba a mu sosoloka ma kúfua kua manhʼiâ.