Dimatekenu 22 - O Mikanda Ikola

Nzambi u tuma Mbalahamu ku satela monʼê Izake

¹ Kia zubha kubhita imʼiii, Nzambi u lola Mbalahamu, uixi: Mbalahamu; muene-phe uetaia, uixi: Emʼiú.

² Uixi-phe: Katula monʼé, monʼé umoxi-èlele, Izake, monʼé ua kazola uie-nê kʼoxi ia Modiia; kuenhoko ua kà ngi satele-nê, sata ia kuoha, bhu thala a mulundu uoso u ngi ku idikiza.

³ Kúkia ni kimene, Mbalahamu anga u balumuka, u zuika o bulu iê, uambata selevende jiiadi, ni monʼê Izake; u ẋanga ue jihuinhi ja sata ia kuoha, anga u katuka, uia ku kididi kia mu idikiza Nzambi.

⁴ Kizuua kia katatu Mbalahamu anga u bhetula mesu, kididi u ki mona mu kanga, kiná.

⁵ Anga u ambela jiselevende jê, uixi: Xalenu bhabha ni bulu, eme ni mona tuie bhaná; o ki tua kà zubha kubheza tu vutuke, tu mi sange.

⁶ Mbalahamu anga u katula o jihuinhi ja sata ia kuoha, u ji tuika monʼê Izake; muene anga uambata túbhia ni mukuale anga aia kumoxi kiiadi kiâ.

⁷ Izake anga u ambela tatʼâ Mbalahamu, uixi: Phaphai! Uixi: Emʼiú, monʼami! Uixi: Túbhia tutu ni jihuinhi, kambudi-phe kebhi, ka sata ia kuoha?

⁸ Mhalahamu anga u vutula, uixi: Nzambi muene ua-nda kusota kambudi kê ka ku mu satela, monʼami; anga ela kumoxi kiiadi kiâ.

⁹ Kia tula bhu kididi kioso kia mu idikiza Nzambi, Mbalahamu u tunga kalatódio, anga u zela-ku jihuinhi, u kuta monʼê Izake, u mu zekesa bhu kalatódio ku thandu a jihuinhi.

¹⁰ Mbalahamu anga u sunununa lukuaku luê, u katula o mukuale, phala kujibha monʼê.

¹¹ Maji o Anjo ia Jihova anga u mu handekela, tunde ku diulu, uixi: Mbalahamu! Muene anga u vutula uixi: Emʼiú.

¹² Uixi: Mona kana ku mu tula lukuaku, kana ku mu bhanga kima kiaiibha; kuma kiki ngʼejiia kuila u mukua uoma ua Nzambi, katé ni monʼé umoxiʼèlele, kua ngʼimina-nê.

¹³ Mbalahamu anga u zambula mesu, u tala kiki, u mona ku dima diê kilumbe kia mbudi kia sukamena mu kisasa ni jimbinga jê; Mbalahamu anga uia-bhu, u kuata kilumbe kia mbudi, anga u ki bhana mu sata ia kuoha bhu kididi kia monʼê.

¹⁴ Mbalahamu kididi kieniʼokio anga u kʼixana, uixi: Jihova-jileh (mu ku ki lombolola edi: Jihova muene ua-nda kusota); kala kiene ku ki tanga katé mu kizuua kia lelu, exi: Ku mulundu ua Jihova muene u sota.

¹⁵ Anjo ia Jihova anga u handekela Mbalahamu lua kaiadi, tunde mu diulu,

¹⁶ uixi: Jihova uambe, nga di lokela mu dijina diami eme Muene, ki ua bhangʼiki, o monʼê ua diiala, monʼé umoxi-èlele, kua tena ku ngʼimina-nê.

¹⁷ Nga-nda ku ku zediuisa kiavulu muene, ngi ku sokolola kinéne-nene, mbutu ié i vula kala jithéthembua ku diulu, mukuâ ni museke bhu mbandu ia kalunga; mbutu ié i tambula mielu ia jinguma jâ;

¹⁸ ku mbutu ié kuene kua kà zediuila ifuẋi ioso mu ngongo; mukonda ua tumaka dízui diami.

¹⁹ Kienhokio Mbalahamu u vutuka bhua xile jiselevende jê, anga a balumuka, ela kumoxi katé bhu Bele-seba; Mbalahamu anga u tunga bheniʼobho bhu Bele-seba.

²⁰ Kia zubha kubhita imiʼii, Mbalahamu a mu tudila exi: Naholo dia phangʼié ue, a mu vualela ana kuala Mídika.

²¹ Thungunu iê Uze, kiubha kiê Buze, kua kaiela Kemuuele tata ia Alá,

²² Ni Kesede, ni Hazo, ni Pildaxi, ni Jidalape, ni Betuuele.

²³ Betuuele anga u vuala Bebeka; dinake didi, dia mona, diene dia vuala Mídika phala Naholo, phange ia Mbalahamu.

²⁴ Ni mukáma uê, dijina diê Leuma, ua mu vualela ue Teba, ni Ngahama, ni Tahaxi, ni Mahaka.