Dimatekenu 21 - O Mikanda Ikola

Uvadiue ua Izake

¹ Jihova anga u zungila Sala kala kia tangele; Jihova anga u bhanga kua Sala kioso kia mu ambela.

² Sala anga uimita, u vualela Mbalahamu monʼa diiala mu uadiakimi uê, bhu kithangana kiʼòxinde, kala kia mu tangelele Nzambi.

³ Mbalahamu anga u luka monʼê ua diiala, a mu vualela-nê kuala Sala, dijina dia Izake.

⁴ Mbalahamu anga u saia monʼê Izake, kiala hanji mu nake dia izuua, kala kia tumu Nzambi.

⁵ Mbalahamu ua kexi mu hama ia muvu, kia mu vualela monʼê Izake.

⁶ Sala anga u amba, uixi: Nzambi ua ngi bhekela jingolela; oso ue a-nda ku kʼivua a-nda kuolela kumoxi nʼeme.

⁷ Uixi, dingi: Nanhi muene ueji kuambela Mbalahamu kuila Sala uamuisa ana? Kuma nga mu vualela monʼa diiala mu ukukilu uê.

⁸ Mona kia kulu, a mu sumuna; Mbalahamu anga u bhanga fesa ionéne kizuua kia sumuka Izake.

Hangale a mu kaia ni Ijimaiele

⁹ Sala anga u mona kuma Ijimaiele monʼa Hangale, mukua Ijito, a mu vuala ni Mbalahamu, ua mu bhanga kasekelelu kua Izake mu mu tobhesa.

¹⁰ Mukonda dia kiki, u ambela Mbalahamu, uixi: Kahatu kaka, mu kaie ni monʼê, kuma monʼa mukáma iú ka tena kulundula kumoxi ni monʼami Izake.

¹¹ Mbalahamu anga ki mu ibhila kiavulu kienhiki, mukonda iú ue monʼê.

¹² Nzambi anga u ambela Mbalahamu, uixi: Ki ki ku iibhile, mukonda dia kaiala ni mukamʼé, ioso iala ku ku ambela Sala, xikana-iu; mukonda o mbutu ijiia kua Izake iene iexana kuma mbutu ié.

¹³ Maji ni monʼa mukamʼé ue, ngi mu bhanga u kala kifuẋi, kuma muene ue mbutu ié.

¹⁴ Kúkia ni kimene Mbalahamu u balumuka, u zangula mbolo ni mudingi ua menha, u i bana Hangale, u mu tuika-iu bhu isuxi, anga u mu bhana ni mona hé ua kaia; muhatu anga u katuka, u kuata kunhungana mu kikangalakata kia Bele-sebha.

¹⁵ Kiabhu o menha ambata mu mudingi, mona ua mu takula moxi a kisasa.

¹⁶ Anga u sondoloka kadikanga ka kuila u asela-bhu mufula, anga u xikama, uixi: Phala kuoso ku fila o mona, eme ki ngi mone-ku. Anga u xikama bhua lulama ni bhuala o mona, u zangula o dízui diê, u kuata kudila.

¹⁷ Nzambi anga uívua dízui dia kamona; anjo ia Nzambi anga u handekela Hangale; dízui dia tundu muene mu diulu, uixi: Ihi i uala na-iu, Hangale? Kana kukala ni hele ia kima; kuma Nzambi uevu dízui dia mona tundé bhuoso bhu ua mu bhake.

¹⁸ Balumuka, mona u mu zangule, u mu kuate mu lukuaku; kuma eme nga-nda mu bhanga u kala kifuẋi kia dikota.

¹⁹ Nzambi anga u mu jikula o mesu, u mona fiẋi ia menha; anga uia-bhu u izalesa o mudingi, hé u nuisa o mona.

²⁰ Nzambi anga u kala ni kaiala, u kula, anga u tunga mu kikangalakata, hé u di longa unfunu ua kuasa ni mufula.

²¹ Anga u kala mu kikangalakata kia Palane; manhʼâ hé u mu bhengela muhatu mukua ixi ia Ijito.

Abimeleke u ta kikutu ni Mbalahamu

²² Anga ki kala-phe kuila, o thembu ienhoio, Abimeleke ni Fikole kesongo ka kilômbo kiê, a zuela ni Mbalahamu, exi: Eie Nzambi uala-nê mu ima ioso i ua-lu bhanga.

²³ Kiki-phe u ngi lokela bhenhabha, mu dijina dia Nzambi, kuila kua-nda bhanga usuéia né ku monʼami, mba ku mulaula; u xinganeka mbote ioso i nga ku bhange eie, eie ue iene i u ngi bhanga eme, ni mʼoxiʼumu moso mu ueza mu tunga.

²⁴ Mbalahamu uixi: Ngi loka muene.

²⁵ Mbalahamu anga u bazela hanji Abimeleke mukonda dia kixima kia menha kia tambula o jiselevende ja Abimeleke mu nguzu.

²⁶ Kuala Abimeleke, ki nga mu ijiia uoso ua bhange kienhiki; eie ue kua ngi tangela kima, lelu moxi-ke ku kʼivuila bheniʼabha.

²⁷ Mbalahamu anga u zangula jimbudi ni jingombe, u ji bhana Abimeleke; ene kiiadi kiâ anga a ta kikutu.

²⁸ Mbalahamu anga u kuata sambuadi dia mama ia jimbudi, u di tudilila-ju ni kididi kiê.

²⁹ Abimeleke-phe uibhula Mbalahamu, uixi: O sambuadi dia mbudi jiji ja kexil ʼahi bhabha? Sambuadi dia mama ia jimbudi, ji ua di tudilila ni kididi kiê?

³⁰ Kuala Mbalahamu: Sambuadi didi dia mama ia jimbudi, ua-nda ku ji tambula bhu lukuaku luami, phala ji kale umbangi kuila kixima kiki eme nga ki kande.

³¹ Kiene kiexanena kididi kiokio Bele-seba mukonda dia kudilokela-bhu.

³² Kienhiki kia te o kikutu bhu Bele-seba; Abimeleke anga u balumuka-bhu, ni Fikole kesongo ka kilômbo kiê, anga u vutuka mʼoxi ia akua Fidíxia.

³³ Mbalahamu bhu Bele-seba u kuna-bhu miẋi ia mutamala, anga u bheza bhe nhobho o dijina dia Jihova, Nzambi kene ni dizubhilu.

³⁴ Mbalahamu anga u kala mu nhunganena mʼoxi ia akua Fidíxia, izuua iavulu.