Dimatekenu 20 - O Mikanda Ikola

Mbalahamu u dituna kuila Sala muhatuʼê

¹ Mbalahamu anga u katuka bheniʼobho, uia kukala mʼoxi ia sulu, u tunga bhu kaẋi ka Kadexe ni Sule; anga u kala mu nhungana mu Jelale.

² O Mbalahamu anga u tanga Sala muhatuʼê, uixi: Phange iami ia muhatu. Abimileke sobha ia Jelale anga u tuma kutakana Sala.

³ Nzambi phe uiza kua Abimileke ku nzoji mu usuku, u mu ambela, uixi: Ki ualʼokio u mufi, mukonda muhatu ua mu bhake monzo ié mukaji a muthu, uala ni muadi uê.

⁴ Abimeleke-phe kiluua a mu zukama; anga u zuela, uixi: Ngana, kifua o muiji ua lungu, eie u u jibha?

⁵ Ki muene ua ngʼambela, uixi: Phange iami ia muhatu? O muene muhatu ua kiambe ue kuma phange iami ia diiala? Kiki eme nga ki bhange ni muxima ua uabha ni maku a ngi zele.

⁶ Nzambi anga u mu ambela ku nzoji, uixi: Nga kʼijiia muene kuma ua ki bhange ni muxima ua uabha, eme uami kiene ki nga ku fudisila o kuta kituxi ko kuami; kiene ki nga ku fudisila o ku mu kuata.

⁷ Kiki-phe mukaji a ngene mu bheke kua muadi uê, kuma muene polofeta, a ku diondele phala u laie; o ki u kamba ku mu bheka, ijiia na-kiu kuma u fua muene sé kufula, ni eie muene ni dibhata dioso dia ku tokala.

⁸ Kúkia ni kimene Abimeleke u balumuka, u ixana mbèle iê ioso, u a tangela ioso iii mu mátui mâ; màla enhó a kala ni uoma uavulu.

⁹ Abimeleke anga u ixana Mbalahamu, u mu ambela, uixi: Eie ua tu bhange kiebhi? Eme nga ku te kituxi kiahi, phala ni eme ni ixi iami u tu bheke mu mulonga ua dikota? Eie ua ngi bhange ima ki i tokala ku i bhanga.

¹⁰ Abimeleke anga u ambela dingi Mbalahamu, uixi: Eie ua xinganeka kiebhi, ki ua bhange kima kala kiki?

¹¹ Mbalahamu uixi: Mukonda nga fika ngixi bhu kididi kiki o uoma ua Nzambi kala na-u; ngixi-phe a-nda ku ngi jibha mukonda dia mukajiʼami.

¹² Bhua mukuá dingi phange iami ia muhatu muene, ki makutu; kuma tata ietu imoxi mama jiiadi; eme nga mu sakana.

¹³ Ku izuua-phe, Nzambi kia ngi katula mu bhata dia tatʼetu, iú ua ngi bheka mu inhunginu, eme nga mu ambela ngixi iene mbote i u bhangʼiii: Kioso kididi ki tuà tula, ua kèla kuma phange iami ia diiala.

¹⁴ Abimeleke anga u kuata jimbudi ni jingombe, ni abhika a mala ni ahatu, u bhana kua Mbalahamu, anga u mu bhekela dingi mukajiʼê.

¹⁵ Abimeleke anga u mu ambela, uixi: Ixi iami iii, ua i mono; bhuoso bhua ku uabhela, u tungʼé.

¹⁶ Anga u ambela Sala, uixi: Talesa, phangʼié nga mu bhana midi ia itadi ia phalata; i kale ia ku ku futa ku mesu, ni oso a ku tokala ni ku athu engi oso-oso; ki bhuala dingi bhu tua ku tondala, ki bhuala dingi mulonga.

¹⁷ Mbalahamu anga u samba kua Nzambi; Nzambi anga u saka Abimeleke, ni mukajiʼê ni anʼa ahatu ku mbèle iê, a kala dingi mu vuala ana.

¹⁸ Kuma Jihova ua jika o mavumu oso a ahatu mu dibhata dia Abimeleke, mukonda dia Sala, mukaji a Mbalahamu.