Dimatekenu 18 - O Mikanda Ikola

Anjo jitatu ji tukulukila Mbalahamu

¹ Jihova anga u mu tukulukila bhu miẋi ia Mamele, muene ua xikama bhu muelu ua balaka iê, mu kumbi dia muanha uatu.

² Uzambula mesu, u tala, hé u mona, mala atatu iá emana ku pholo diê. O kia zubha ku a mona, u balumuka bhu muelu ua balaka, uia ni kulenga mu ku a kauidila, u fukama, u ta o pholo bhoxi.

³ Uixi: Ngana iami, se nga sange kisangu-sangu bhu pholo ié, kana ku ngi somboka, ngi selevende ié, nga ku diondo.

⁴ Eze ni tumenha, mu sukule o inama ienu, mu nhohene hanji mu kilembeketa kia muẋi iú.

⁵ Ngi mi bhekela kambolo, mu kale dingi ni kanguzu mu mukutu phala mu somboke kiua; kuma kiene ki muejila katé kunu kua mubhikʼenu. Kuala ene: Bhanga-kiu, kala ki ua ki tange eie muene.

⁶ Mbalahamu anga uia ni lusolo mu balaka kua Sala, uixi: Katula izongelu itatu ia fuba ia fina, u i toxe kindala, u bhange jimbolo u jiohe mu uthôkua ua tema.

⁷ Mbalahamu anga u lengela kuala ibhaku, u kutata-bhu seseme ia ngombe, ianengana, iauabha, u i bhana selevende iê phala a ijibhe a itale ni lusolo.

⁸ Muene anga u kuata matheka ni lete, ni xitu ia ngombe ia lambe, u a zalela, muene uamana ni kuxibhidila mu kilembeketa kia muẋi, ene ia a di.

⁹ Ene anga a mu ambela, exi: Muhatuʼé Sala iú kuebhi? Uixi: Iú monzo, mu balaka.

¹⁰ Kuala muene, sé kufula muene, muvu uiza-mu, bhu kumbi kala bheniʼabha, muhatuʼé Sala u kala ni mona. Sala anga u kʼivua, uala ku dima dia dibhitu mu balaka.

¹¹ Kialʼiki-phe, ni Mbalahamu ni Sala a sunga-ku kiá muene ku izuua iâ, a kuka; o Sala-phe ua batuka kiá kuia mu ijiia.

¹² Sala anga u olela ni muxima uê, uixi: Kifua ki nga kukʼiki kiene kiua ki ngi kala ni kusanguluka kua kukala ni mona, muadi uami ue nga sokoʼê-nê kiá mu kukuka?

¹³ Jihova anga u ambela Mbalahamu, uixi: Phalahi Sala uolela, uixi: Kidiʼá, ngà kala ni mona ki nga kukʼiki?

¹⁴ Kifua Jihova sai kima ki mu bhonza ku ki bhanga? Tala, muvu uiza-mu, bhu kumbi kala bhenhabha, bhu kithangana kienhiki kia muenhu uenu, nga kʼeza dingi kikuʼé, o Sala ukala ni mona.

¹⁵ Sala anga u dituna, uixi: Ki ngʼolela; kuma uoma ua mu kuata. Muene phe-uixi: Kana ki kiene; eie uolela muene.

¹⁶ Mala enhá anga a balumuka-bhu a lunga jipholo ku Sodoma, Mbalahamu anga uia-nâ ku a xinjikila.

Nzambi u tanga kubuikisa Sodoma ni Ngomola

¹⁷ Jihova anga u zuela, uixi: Kifua Mbalahamu ngi mu dingila kioso ki nganda kubhanga?

¹⁸ Muene kuma hinu u di bhanga kifuẋi kia dikota kia nguzu, ifuẋi ioso mu ngongo ia kà zediuila kua muene?

¹⁹ Mbata eme nga mu ijiia, kuila muene ua-ndu tumina anʼê ni dibhata diê dioso hádia di mu bhingana, phala ende ni kukaiejela mu jinjila ja Jihova, mbé ende ni kubhanga ima ia kilunji ni kuiuka, phala Jihova a kumbidile ioso ia tànga muene ku i bhanga kua Mbalahamu.

²⁰ Jihova anga u zuela dingi, uixi: Mukonda o kudikola kua tundu mu Sodoma ni Ngomola kuavulu, ituxi ia kubhukumuka kuâ iavulu dingi kinéne.

²¹ Ngi tuluka-ku, ki ngalʼiki, nga kà sange se kidi muene a bhange kala kudikola ku ngevu, o ki ki kala makutu, phala ngi kʼijiie.

²² Bheniʼobho mala iâ a suluka, a di tela ku Sodoma; Mbalahamu-phe hanji emana bhu pholo ia Jihova.

Mbalahamu u diondela athu mu Sodoma

²³ Mbalahamu anga u zukama, uixi: Kifua ni iá a kumbidila, ni iá a bukumuka, u a buikixila kumoxi?

²⁴ Se mu mbonge muenhomo mu kala makuinhi atanu a muthu a iuka kifua u a buikisa, dibhata ku di eha mukonda dia makuinhi atanu aiuka a di lungu-mu?

²⁵ Lu ku suke, Ngana, ki ki bhite kuila u bhanga kima kala kiki, uila ni iá alungu ni iá abhukumuka u a jibhila kumoxi, kifua ni iá alungu ni iá abhukumuka, a soka? Ki ki ẋikina Ngana; Kifua Mufundixi u fundisa ioso mu ngongo, u lémbua kubatula mu kidi, hé u bhanga o kima kia kukamba kulûnga?

²⁶ Jihova anga u zuela, uixi: Se nga sange mu Sodoma makuinhi atanu a muthu a iuka dibhata dioso ngi di eha mukonda dia iá aiuka ala-mu.

²⁷ Mbalahamu anga u kumbulula dingi, uixi: Ua ngi mono nga bhumu kiá kuzuela ni Ngana, eme muene ngi mavu ngi fufutila.

²⁸ O ki kala-phe ku makuinhi atanu ku kamba kitanu: kifua u buikisa mundu mukonda dia kitanu kia kambe-ku? Uixi: Kana, ki nga a buidisa se nga sange makuinhi auana niʼtanu.

²⁹ U mu kumuna dingi uixi: Se ku kala ngó makuinhi auana, toka? Uixi: Né makuinhi auana toka, ki ngi ki bhange dingi mukonda dia makuinhi auana.

³⁰ Uixi dingi: Ngana, ku ngi kale ni njinda, se ngi zuela dingi sumba a sanga-mu ngó makuinhi atatu? O Ngana-phe, uixi: Né makuinhi atatu, ki ngi ki bhange dingi.

³¹ Uixi dingi: Ua ngi mono, nga bhumina kuzuela ni Ngana; sumba-phe a sanga-mu ngó makuinhi aiadi? Muene uixi: Né makuinhi aiadi, ki nga a buikisa, dingi mukonda dia makuinhi aiadi ala-mu.

³² Uixi: Ngana ku kale ni njinda, ngi tone dingi kuzuela lumoxiʼulu, sumba a sanga-mu dikuinhi dimoxi. Ngana uixi: Ki nga a buikisa dingi mukonda ngó dia dikuinhi diala-mu.

³³ Jihova anga uia njila iê, kia zubha o ku di kunda ni Mbalahamu; Mbalahamu anga u vutuka bhu kididi kiê.