Dimatekenu 17 - O Mikanda Ikola

Nzambi u lungulula dijina dia Mbalamu

¹ Mbalamu kia kala kiá mu makuinhiʼvua a muvu nʼivua, Jihova u tukulukila Mbalamu, u mu ambela, uixi; Eme ngi Nzambi, Muteni-a-Ioso; enda jinga bhu pholo iami, u kale u muthu ua tenena.

² Eme-phe ngi ta kikutu kiami bhu kaẋi kʼeie nʼeme, nga-nda ku ku sokolola kiavulu muene.

³ Mbalamu bhenʼobho anga u bhetama o pholo bhoxi, Nzambi anga u zuela-nê, uixi:

⁴ Talesa, ku mbandu iami eme, kikutu kiami ki nga-nda kuta ni eie, kienhiki: Ua kà kala u tata ia ndumba dia ifuẋi.

⁵ Ni dijina dié, ka kuixana jinga dingi exi Mbalamu, maji dijina dié di kala kiá Mbalahamu; kuma nga ku bhange kukala u tata dia ndumba ia ifuẋi.

⁶ Nga-nda ku ku bhanga u kala u kivuadi kia dikota, ua kà di bhanga ifuẋi, jisobha hinu ja kà tunda momuʼé.

⁷ Kikutu kiami nga kà ki kolesa bhu kaẋi kʼami ni eie, ni mbutu ié ioso hinu i ku bhingana, ku tunda muiji kuiza muiji, kala kikutu kinangenena kia bhingi eme ngi kala ngi Nzambi ié, ngi Nzambi ia mbutu ié hádia i ku bhingana.

⁸ Ngi ku bhana eie muene, ni mbutu ié hinu i ku bhingana, o ixi ienhiʼii ia inhunginu ié, ixi ioso ia Kanana, i kala undundu ué katé ku hádia ni hádia sè dizubhilu; eme ngà kala ngi Nzambi iâ.

⁹ Nzambi anga u ambela dingi Mbalahamu, uixi: O ku mbandu ié eie, u kuata jinga-phe o kikutu kiami, ni eie ni mbutu ié hinu i ku bhingana, ku miji iâ ioso.

¹⁰ Kikutu kiami ki mu kuata kienhiki, bhu kaẋi kami eme ni enu ni mbutu ié i ku bhingana; mala oso ku miji ienu kikale a kà a saia.

¹¹ A kà mi saia o xitu ia kinhûnga kienu; kienhiki ki kala kijimbuete kia kikutu kiami bhu kaẋi kʼami ni enu.

¹² Mona uoso uala mu nake dia izuua mudienu, muthu ua ku mu saia kabasa diiala, katé bhua kà suka o miji ienu; o mubhika a mu vualela monzo, mba a mu sumbu mu kitadi ku akuaʼxi iengi, mua kà mu saia, né-mbe ka tokala ku mbutu ié.

¹³ Ni ió a mu vualela monzo, ni ió ua mu sumbu mu kitadi, kikala muene mu a saia; kikutu kiami anga ki di monekena ku xitu ienu, ki kala kikutu ki ngangenena.

¹⁴ Diiala dioso a kambe ku mu saia o xitu ia kinhûnga kiê, muenhu ió a kà u batula mu jindandu jê; mukonda kikutu kiami ua ki tondala.

Nzambi u lungulula ue dijina dia Salai

¹⁵ Nzambi anga u ambela dingi Mbalahamu, uixi: Mukajiʼé Salai kuende dingi ni ku mu ixana Salai, maji dijina diê di kale kiá Sala.

¹⁶ Mukonda eme nga-nda ku mu zediuisa, ngi mu bhana dibhesá; nga-nda ku ku bhela kua muene, mona u tunda momuʼé; ngi mu bhana dibesá, u kala kivuadi ki bhanga miji; jisobha muene ji tumina ifuẋi hinu ji tunda ku mukutu uê.

¹⁷ Bheniʼobho Mbalahamu u bhetamena bhoxi u olela, anga u amba ku muxima uê, uixi; Kifua muthu uala mu hama ia muvu, hanji dingi a vuala mona? O Sala uala kiá mu makuinhiʼvua a muvu, ua kà bhanga dingi muiji?

¹⁸ Mbalahamu anga u ambela Ngana Nzambi, uixi: Tamanu Ijimaiele a laie bhu pholo ié.

¹⁹ Ngana Nzambi, phe, u mu ambela, uixi: Ni kidi kiene, mukajiʼé Sala hinu ua-nda ku ku vualela monʼa diiala; eie-phe ua kà mu luka Izake; muenephe nga-nda ku ta-nê kikutu kiami; kikutu kinangenena phala o mbutu iê hádia i mu bhingana.

²⁰ O ku mbandu ia Ijimaiele ue, nga ku ivu; talesa, ngi mu bhana ue o kuzediua, u kala kivuadi, ngi mu sokolola kiavulu muene; hinu u vuala kuinhi dia ngana ni kiiadi, ngi mu bhanga u kala kifuẋi kia dikota.

²¹ Kikutu kiami-phe ki kuatela kua Izake, a-nda ku ku vualela-nê kuala Sala, muvu uiza-mu, bhu kumbi kala bhabha.

²² Kia zumbuka o kuzu-ela-nê, Nzambi u tunda bhu mbandu ia Mbalahamu, u banda bhulu.

Bhua kuatela o kijimbuete kia kusaia

²³ Mbalahamu anga u kuata Ijimaiele, monʼê ua diiala, ni ió oso a a vualela monzo iê, ni ió a sumbu mu kitadi, ka xi-ku diiala ku dibhata dioso dia Mbalahamu, anga u a saia o xitu ia inhûnga iâ, kizuua kienhokio kala kia mu ambela Nzambi.

²⁴ Mbalahamu u kala mu makuinhiʼvua a muvu niʼvua, kia mu sàia o xitu ia kinhûnga kiê.

²⁵ O monʼê Ijimaiele anga u kala mu kuinhi dia muvu ni kitatu kia mu saie o xitu ia kinhûnga kiê.

²⁶ Kizuua kiene kimoxi kia sàia Mbalahamu ni Ijimaiele monʼê.

²⁷ Ni mala oso a dibhata diê, ni iá a a vualela monzo, ni iá a a sumbu mu kitadi ku akuaʼxi iengi, ene oso a a saiela kumoxi ni muene.