Dimatekenu 16 - O Mikanda Ikola

Hangale a mu bhana kukala mukama ua Mbalamu

¹ O Salai-phe mukajiʼa Mbalamu, ka kexi mu ku mu vualela ana; Salai anga u kala ni kahatu kê, mukua Ijito, dijina diê Hangale.

² Salai anga u ambela Mbalamu, uixi: Ua mono-ze, Jihova ua ngi fudisa o kuvuala; bokona-phe kua kahatu kami kaka; imoxi ngi kala ni muiji ku mukutu ua muene. Mbalamu anga u ivua dízui dia Salai.

³ Kienʼiki Salai, mukajiʼa Mbalamu, anga u kuata Hangale mukua Ijito, kahatu kê, kala Mbalamu-phe ua zubha kiá kubhanga kuinhi dia muvu mʼoxi ia Kanana, anga u mu bhana kua muadi uê phala a kale muhatuʼê.

⁴ Muene anga u bokona kua Hangale, o Hangale anga uimita; o kia mono kuma uemita, u kala kiá mu sebulula ngana iê ia muhatu.

⁵ Sala i anga u ambela Mbalamu, uixi: O kusebuluka kuami ku kale ku thandu diê: nga ku bhana kahatu kami phala u mu te kuema dié; o kia mono kuma uala ni divumu, eme ua ngi mono kiá ngi kioua kiê; Jihova-phe a batule mulonga bhu kaẋi kami nʼeie.

⁶ Mbalamu anga u ambela Salaí, uixi: O kahatu ké eʼmuène, eie muene ua mu vu, uala bhu maku mé; eie kiá u mona kioso ki u mu bhanga. Salai anga u mu tatesa kiavulu katé kia lenge, ka tena kuimana bhu pholo iê.

⁷ O anjo ia Jihova anga i mu sanga bhu fiẋi ia menha mu kikangalakata, fiẋi ia njila ia Sule.

⁸ Hé u mu ambela uixi: Hangale, kahatu ka Salai, ua tundu kuebhi? u di telo kuebhi? Kuala muene: Nga lenge o pholo ia ngana iami Salai.

⁹ Anjo ia Jihova anga u mu ambela, uixi: Vutuka kua ngana ié, u tulokele bhu lukuaku luê.

¹⁰ Anjo ia Jihova anga u mu ambela dingi, uixi: O mbutu ié nga-nda ku i sokolola kinéne. Katé ki i ẋikina ku i kuata konda mukonda dia kuvula kuê.

¹¹ Anjo ia Jihova anga u mu ambela, uixi: Ki uala ni divumuʼokio, ua-nda kuvuala monʼa diiala; ua kà mu luka dijina dia Ijimaiele, mukonda Jihova ua ku ivu o kutata kuê.

¹² Muene ua kà kala kiiala kia baluka kala xitu mu iangu, ene oso a mu kala jinguma jê, muene ue u kala nguma iâ; ua kà di tungidila, kà ẋikina ku di bhana ni jiphange jê.

¹³ Hangale anga u bhana dijina kua Jihova ua mu zuelesa, uixi: Eie u Nzambi uene mu kumona; kuma uambe, uixi: Eme uami, bheniʼabha ki ngi mono Nzambi mukua ku ngi mona?

¹⁴ Kiene kia xalela o fiẋi ioio ku ixana o dijina dia Bele-lahai-loi; o iene u i sanga mu kutunda bhu Kadexe mu kuia bhu Belede.

¹⁵ Hangale anga u vualela Mbalamu monʼa diiala; Mbalamu anga u luka monʼê a mu vuala ni Hangale, dijina dia Ijimaiele.

¹⁶ Kienhokio Mbalamu anga u kala mu makuinhi nake a muvu ni samanu, kioso Hangale kia vuala Ijimaiele monʼa Mbalamu.