Dimatekenu 15 - O Mikanda Ikola

Nzambi u suinisa Mbalamu, u tanga ku mu bhana mona

¹ Kia zubha kubhita imʼiii, kizuelu X kia Jihova ki sanga Mbalamu ku kilu, uixi: Ku kale ni uoma mbata eme ngi ngubu ié, ngi kisakidilu kié kiavulu o kuvula.

² Mbalamu anga u zuela, uixi: Ngana tata, u Jihova, kima kiahi ki uanda ku bhanga? Kuma ua ngi mono ngala kuenda ngó kienhiki ki ngi moneka mona, ua ngi tambuila konda ia dibhata Eliiezele iú, mukua Damasku.

³ Mbalamu anga uzuela dingi, uixi: Tala-ze, Ngana, eme kua ngi bhana mbutu; kikale-phe o mamvuala, mubhika a mu vualela mu bhata diami, muene u ngi lundula o dibhata.

⁴ Bhenhobho-phe, o kizuelu kia Jihova ki mu sanga, kixi: Muthu iú ki muene ua kà kala kabhinganu ké, maji o muthu ió ua kà tunda mu vumu dié, muene ua kà kala o mulundudi ué.

⁵ Anga u mu bheka bhu kanga, uixi: Tala-phe hanji ku diulu, u tange o jithéthembua, se u tena ku ji kuata konda; anga u mu ambela, uixi: Kiene kia kà kala o mbutu ié.

⁶ Muene anga u xikana kua Jihova; o kuxikana kuê a mu mona-ku kulûnga.

⁷ Anga u mu ambela dingi, uixi: Eme Jihova, nga ku katula mu ixi ia Ule ua Jikaldeu, phala ku ku bhana, o ixi iii ni i kale undundu ué.

⁸ Kuala muene: Ngana tata, u Jihova, eme nga-nda ku kʼijiia kiebhi kuila o ixi iii hádia ngi i lundula?

⁹ Anga u mu ambela, uixi: Ngi kuatele seseme ia ngombe ia iubha iiadi, ni hombo ia iubha iiadi ni mbudi ia iubha iiadi, ni diembe dimoxi dia mukáu ni kadiembe kófele ka bhata.

¹⁰ Muene anga u kuata iene ioso iii, ibhaku u i sesa mu kaẋi, mbandu u i bhaka kuku, mbandu u i bhaka kuku, ja di lulama; o jinjila-phe ka ji sese.

¹¹ O jiholokoko anga jiza, jitula ku isasu, Mbalamu-phe uia ni ku ji kaia.

¹² O dikumbi-phe kioso ki dia zubha o kutula, Mbalamu kua mu iza kilu kiavulu; kua muiza ue kekenha ia dikota, ni kitombe kiavulu ku thandu diê.

¹³ Muene anga u ambela Mbalamu, uixi: Ijiia na-kiu kiambote kuma, mbutu ié hádia a kà kala jinzuangiza mʼoxi iengi, ki iâ ene, a kala mu bhikila akuaʼxi koko; a kà kala mu ku a tatesa mu hama jiuana ja muvu.

¹⁴ Maji, eme ue, ki ia kà zubha o kubhita-phe, akuaʼxi ioio ala mu ku a bhikisa nga kà a bhesa kaxitiko, ene a kà tunda-mu ni jimbongo javulu.

¹⁵ Eie-phe ua kà dianga kuia ni paze ku malembʼé; a kà ku funda mu uadiakimi uavulu.

¹⁶ O ku muiji ua kauana-phe kiá, kiene kia kà bhongoloka dingi mʼoxi mumu, kuma o kizongelu kia kubhukumuka kua Mamodi kiluua ki tenena.

Nzambi u ta kikutu ni Mabalamu

¹⁷ Anga ki bhita-phe kuila, o kia zubha kutula o dikumbi, kuma anga ku vunda kiá muene, u mona dijiku diala mu fuafua dixi, ni sama ia uama túbhia, ia bhiti mu kaẋi ka isasu ienhoio.

¹⁸ Kizuua kienhokio-phe Jihova u ta kikutu ni Mbalamu, uixi: Mbutu ié nga a bhana muene ixi iii tunde mu honga ia Ijito katé mu honga ia dikota, honga ia Ufalate,

¹⁹ ni Makene, ni Makenezeu, ni Makadimone,

²⁰ ni Mahiti, ni Mapelezi, ni Malefe,

²¹ ni Mamodi, ni Makanana, ni Jijidingaze, xi, ni Majebuzé.