Dimatekenu 14 - O Mikanda Ikola

Sobha jiuana ji lua ni sobha jitatu

¹ Anga kibhita kuma ku izuua-izuua, mu thembu ia Amalafele, sobha ia Xinale, ni Adiioko, sobha ia Elasale, ni Kedolaumele, sobha ia Elame, ni Tidale, sobha ia Ngoími.

² Kiuana kiâ eza mu kúlua ita ni Bela, sobha ia Sodoma, ni Bidixa, sobha ia Ngomola, ni Xina, sobha ia Adama, ni Xemebele sobha ia Nzeboími, ni sobha ia Bela, muene Zouale.

³ Ene oso iá a di bhongoluela mu dikôlo dia Sidine (muene muala o kangu dia môngua).

⁴ A kexile mu bhikila Kedolaumele mu kuinhi dia muvu ni kiiadi, o ku muvu ua katatu ku dikuinhi, a kituka.

⁵ O ku muvu ua kauana ku dikuinhi, Kedolaumele ni jisobha jamukuá ja di bande-nê kumoxi, eza hé a beta akua Lefaíme, mu Axitalote dia Jimbinga, ni Mazuzi mu Hame, ni Mamimi mu ngânga ia Kediataíme.

⁶ Ni Mahodi mu mulundu ua Seíle, katé ku mukáu ua Palane bhu mbandu ia kikangalakata.

⁷ Mu kuvutuka anga a bhita bhu Enmispate, (bhene bhu Kadexe) anga a beta ixi ioso ia akua Maleke, ni Mamodi a tungu mu Hazeza-tamale.

⁸ Sobha ia Sodoma anga u tunda ni sobha Ngomola, ni sobha ia Adama, ni sobha ia Nzeboími, ni sobha ia Bela (muene Zouale), anga a ta o kilômbo kiâ mu dikôlo dia Sedime,

⁹ mu kúlua ni Kedolaumele, sobha ia Elame, ni Tidale, sobha ia Ngoími, ni Amalafele, sobha ia Xinale, ni Adiioko, sobha ia Elasale; sobha jiuana ja di kuata ni sobha jitatu.

¹⁰ O mu dikôlo dia Sedime-phe muala makungu-makungu ma uiji ua betume, o jisobha ja Sodoma ni Ngomola, mu ku a bhesa lusolo a kala mu kufua mu makungu, o iá a subhuka a lengela ku mulundu.

¹¹ Jisobha ja mukuá anga a bhunda imbamba ioso ia Sodoma ni Ngomola, ni makudia mâ moso, anga ela njila iâ.

Lote a mu ambata hutile ia ita

¹² Ni Lote, muebhu a Mbalamu, kuma ua tungu mu Sodoma, a mu kutu, a mu bhundu imbamba iê, a mu ambata.

¹³ Anga bhu kala ni iú ua lenge, uiza mu tudila Mbalamu, o hebeleu; muene ua tungu bhu miẋi kaluvalu ia Mamele mukua Modi, phange ia Exikole, phange ia Anele, enhá akexi mu kikutu kimoxi ni Mbalamu.

¹⁴ Bhenhobho Mbalamu kia zubha ku kʼivua kuila phangʼiê a mu kutu, ia aii-nê, u manekesa makuenze mê, a a vualela mu dibhata diê, hama jitatu ja muthu ni makuinhi nake, u a kaiela katé ku Dane.

¹⁵ Anga a di uanununa mu ibuka mu usuku, ni muene ni jiselevende jê, jinguma anga a ji beta, a ji bhesa lusolo, aia ni ku a kaia katé bhu Hoba, kifua ku kiasu, Damasku ua xalela ku kadilu.

¹⁶ Anga u tambula dingi imbamba ioso, ni phangʼiê Lote ni imbamba iê, ni ahatu ni athu oso, ueza-nâ.

¹⁷ Sobha ia Sodoma anga u tunda mu ku mu batuila, kia tundu ku kihaẋi kia Kedolaumele, ni jisobha ja mukuá ende-nê, a takanena mu honga ia Xave, iexana exi mu honga ia muenexi.

Melekizedeke u tanesa Mbalamu

¹⁸ Melekizedeke, sobha ia Saleme, anga u tunda ni mbolo ni vinhu; muene ua kexi nganga ia Nzambi Suke-ku.

¹⁹ Anga u mu tanesa, uixi: Tana-ku, tana-ku! Eie u Mbalamu ia Nzambi Suke-ku, uavu o diulu ni ixi.

²⁰ A tane-ku ue, Nzambi Suke-ku, ua ku thelekala jinguma jé bhu maku mé. Anga u mu bhakuila o dijimu ku imbamba ioso iambata.

²¹ Sobha ia Sodoma-phe anga u ambela Mbalamu, uixi: Ngi bhane ngó o mienhu, jimbongo joso tambulé.

²² Mbalamu anga u ambela sobha ia Sodoma, uixi: Nga zangula lukuaku luami kua Jihova, Nzambi Suke-ku, uaʼvu o diulu ni ixi,

²³ kuma ko kué ki ngi tambula-ku kima né ngó ludinha mba lungoji lua kukutila hai, phala hádia kua kèle kuma: Mbalamu eme muene nga mu muesa o jimbongo.

²⁴ Hé kima, o huta ngó iadi makuenze, iene i nga tambula; maji Anele, ni Exikole, ni Mamele, athu ngele-nâ ku ita, ió a tambule o makànda mâ.