Dimatekenu 12 - O Mikanda Ikola

Nzambi u ixana Mbalamu, u mu bhana polomesa

¹ Jihova anga u ambela Mbalamu, uixi: Katuka mʼoxi ienu, ni mu jindandu jenu ni mu bhata dia tatʼenu, ua kʼàie ixi iengi;

² eme-phe nga-nda ku ku sokolola, nʼukala u muiji ua dikota; ngi ku zediuisa, ngi jingisa o dijina dié; eie ua kala u dibesá.

³ Nga kà a benzela oso a ku benzela eie, nga kà bhubhidila oso a ku bhubhidila eie; momué muene mua kà zediuila o miiji ioso mu ngongo.

⁴ Bhenhobho Mbalamu u katuka kala kia mu tumu Jihova; Lote anga uila-nê kumoxi. Mbalamu anga u kala mu makuinhi sambuadi a muvu ni itanu kia katuka mu Halane.

⁵ Mbalamu anga u katula mukajiʼê Salai, ni Lote monʼa phangʼiê ia diala, ni jimbongo jâ joso ja bhongolola, ni athu a muenhu a di bande-nâ bhu Halane; anga a katuka mu kuia kʼoxi ia Kanana ende muene katé kia bhiẋila mʼoxi ia Kanana.

⁶ Mbalamu anga u nhunga mʼoxi muenhʼomo katé kieza bhu kididi kia Xikeme, bhu muẋi ua kalavalu bhu Molé. Thembuʼoio-phe akua Kanana oso a tungu mʼoxi mueniʼomo.

⁷ Jihova anga u tukulukila Mbalamu, u mu ambela, uixi: O mbutu ié-eie hinu nga kà a bhana o ixi ienhiʼii. Muene anga u tunga-bhu kalatódio, phala Jihova ua mu tukulukila.

⁸ Anga u tunda-bhu uia ku mulundu ku mbandu ia thunda ia Betele, u ximbika-bhu balaka iê, Betele ua mu kala ku mbandu ia musanza, o Hai ua mu kala ku mbandu ku tundila dikumbi, muene uala mu kaẋi. Bhenhobho anga u tunga-bhu Kalatódio phala Jihova, u hingila o dijina dia Jihova.

⁹ Mbalamu anga u kuata dingi mu kuenda, u lunga ku mikáu ia sulu (ku Nengebe).

Mbalamu ukulumuka mu Ijitu

¹⁰ Mʼoxiʼomo anga muiza nzala, anga u kulumuka mu Ijitu phala kubhanga-mu izuua, mukonda nzala iavulu ieza mu ixi.

¹¹ Mu kuenda-phe, ala mu zukama kiá ku Ijitu, u ambela Salai mukajiʼê, uixi: Eie-ze u muhatu ua uabha kiavulu ku mesu a athu.

¹² Tuenda kuila akua Ijitu kia ku mona, ela muène uavu mukajiʼê, a mesena eme a ngi jibha, eie-phe a ku bhaka ni muenhu.

¹³ Nga ku diondo-phe, ua kèla kuma u phange iami ia muhatu; phala a ngi bhange o mbote mukonda diʼeie, mu henda ié-eie eme ngi xale ni muenhu.

¹⁴ Anga ki bhita-phe kuma, kia tula Mbalamu mu Ijitu, akua Ijitu a mona kuma muhatu ua uabha kiavulu.

¹⁵ Jitata ja Falaó, kia zubha ku mu mona, a mu hanza bhu pholo ia Falaó; muhatu anga a mu ambata, a mu bheka ku mbanza kua Falaó.

¹⁶ Muene anga u bhanga mbote kua Mbalamu mukonda dia muhatu; anga Mbalamu u kala ni jimbudi, ni jingombe, ni jibulu ja jindumbe, ni abhika a mala ni a ahatu, ni jibulu ja akaji, ni jikamelu.

¹⁷ Jihova anga u tatesa Falaó ni dibhata diê ni mabhebhu mavulu, mukonda dia Salai mukaji a Mbalamu.

¹⁸ Falaó anga u ixana Mbalamu, uixi: Eie ua ngi bhangelaʼhi kiki? Ku ngi tangela-hi kuila muene mukajiʼê?

¹⁹ Phala-hi kutanga kuma muene phange iami ia muhatu? Kiene kia ngi bhangesa ku mu tambula kukala mukajiʼami; kiki-phe mukajiʼé ió, mu ambate, u tunde-bhu.

²⁰ Falaó anga u mu tendelela ku makuenze mê, hé aia ku mu xinjikila, ni mukajiʼê, ni mbèle iê ioso.