Dimatekenu 11 - O Mikanda Ikola

Ixi ioso uzuelelu uâ umoxi

¹ Ixi ioso anga i kala ni uzuelelu umoxi, dimi dimoxi.

² Mu kukala-phe, ki a kala mu kunhunga ku mbandu ia thunda, a sanga dinhana mʼoxi ia Xinale; anga a tunga muenhomo.

³ Anga a di ambela mudiâ, exi: Ndokuenu, tu bhange matijolo, tu mʼohe kiambote. Anga a bhanga matijolo bhu kididi kia matadi, o bhu kididi kia hala o betume.

⁴ Exi: Ndokuenu, tu bhange mbonge, tu iudike ni kathôndo ka vula matala, ka tute ku diulu, tu fumane dijina; phala ki tu di muangene mu ngongo ioso.

⁵ Ngana anga u tuluka mu tala mbonge ni kathôndo kala mu tunga anʼathu.

⁶ Ngana anga u zuela, uixi: Talesa, athu a di bande mu kifuẋi kimoxi ngó, dimi diâ diene dimoxi; ia a kuata kiá kubhanga kiki; kana kima kia-nda ku a fudisa mu ima ioso ia mesena kubhanga.

Kia dibhidika o madimi

⁷ Ndokuenu, tu tuluke, tu a bhidike mu kuzuela kuâ, phala a lémbue ku dʼivua mudiâ.

⁸ Ngana bheniʼobho anga u a muangena mu ngongo ioso, o mbonge anga a lémbua o ku i tunga.

⁹ Kiene ki bhua xalela dijina dia Babele; mukonda Ngana bhenhobho bhua bhidikila o kuzuela kua athu mu ngongo; Ngana bhene bhua a muanganesa mu jixi joso kulu dia mundu.

O luvualu lua Seme

¹⁰ Ingo ia vumu ia Seme ienhiʼii: Seme u kala mu hama ia muvu, anga u vuala Alufaxade mu kuila bhua bhiti kiá mivu iiadi tunde mu dilúvio.

¹¹ O kia zubha kuvuala Alufaxade, Seme u bhanga dingi hama jitanu ja mivu, u vuala anʼa mala ni anʼa ahatu.

¹² Alufaxade u kala mu makuinhi atatu a muvu ni itanu, anga u vuala Selahe;

¹³ Kia zubha kuvuala Selahe Alufaxade u bhanga dingi hama jiuana ja muvu ni itatu, u vuala anʼa mala ni anʼa ahatu.

¹⁴ Selahe u kala mu makuinhi atatu a muvu, anga u vuala Hebele:

¹⁵ Kia zubha kuvuala Hebele, Selahe u bhanga dingi hama jiuana ja mivu ni itatu, u vuala anʼa mala ni anʼa ahatu.

¹⁶ Hebele u kala mu makuinhi atatu a mivu ni iuana, anga u vuala Peleke.

¹⁷ Kia zubha kuvuala Peleke, Hebele u bhanga dingi hama jiuana ja muvu ni makuinhi atatu, u vuala anʼa mala ni anʼa ahatu.

¹⁸ Peleke u kala mu makuinhi atatu a muvu, anga u vuala Lehu.

¹⁹ Kia zubha kuvuala Lehu, Peleke u bhanga dingi hama jiiadi ja mivu ni vua, u vuala anʼa mala ni anʼa ahatu.

²⁰ Lehu u kala mu makuinhi atatu a muvu ni iiadi, anga u vuala Seluke;

²¹ Kia zubha kuvuala Seluke, Lehu u bhanga dingi hama jiiadi ja mivu ni sambuadi, u vuala anʼa mala ni anʼa ahatu.

²² Seluke anga u kala mu makuinhi atatu a muvu, anga u vuala Naholo.

²³ Kia zubha kuvuala Naholo, Seluke u bhanga dingi hama jiiadi ja muvu, u vuala anʼa mala ni anʼa ahatu.

²⁴ Naholo u kala mu makuinhi aiadi a muvu niʼvua, anga u vuala Tela.

²⁵ Kia zubha kuvuala Tela, Naholo u bhanga dingi hama ia muvu ni kuinhi niʼvua, u vuala anʼa mala ni anʼa ahatu.

²⁶ Tela anga u kala mu makuinhi sambuadi a muvu, anga u vuala Mbalamu, ni Naholo, ni Halane.

²⁷ Ingo ia vumu ienhiʼii ia Tela: Tela u vuala Mbalamu, ni Naholo, ni Halane Halane anga u vuala Lote.

²⁸ Halane anga u fua ku mesu a tatʼâ Tela, mʼoxi iâ mua mu vualela mu Ule ia Jikaldeu.

²⁹ Ni Mbalamu ni Naholo anga a sakana ahatuʼâ: muhatu a Mbalamu dijina diê Salai; muhatu a Naholo dijina diê Mídika, monʼa Halane tatʼâ Milka, tatʼâ Ixika.

³⁰ Salai, anga u kala mbaku, ka moneka mona.

³¹ Tela anga u kuata monʼê Mbalamu; ni Lote monʼa Halane mulaúlʼê; ni Salai mukaji a monʼê Mbalamu; anga a katukila kumoxi mu Ule ia Jikaldeu, mu kuia kʼoxi ia Kanana; anga eza mu Halane, a tunga momo.

³² Izuua ia Tela anga i tena hama jiiadi ja mivu ni itanu: Tela anga u fuila mu Halane.