Dimatekenu 1 - O Mikanda Ikola

Dimatekenu dia kubhanga ixi ni diulu ni ima ioso

¹ Mu dimatekenu Nzambi ua bhanga diulu ni ixi.

² Ixi anga i kala ia botomoka, ia kambe ku di umba; kua bhiti kitombe ku thandu dia menha mazongo; Nzumbi ia Nzambi anga u kala mu butamena o menha.

³ Nzambi anga u zuela, uixi: Kuma kúkie; kuma anga ku zela, ku kala mukengeji.

⁴ Nzambi anga u mona mukengeji kuma ua uabha; Nzambi anga u uana o mukengeji ni kitombe.

⁵ Nzambi anga u luka kuma kua zele, uixi: Kúkia, o kuma kua vundu u luka-ku, uixi: Usuku. Bhenho-bho bhua bhiti ngoloxi ni kimene, o kizuua kia dianga.

⁶ Nzambi anga u zuela, uixi: Ku kale muthandu muaxaxi ka menha, menha ni menha ma di kalele.

⁷ Nzambi anga u ta muthandu mu dinga-ni-dinga, u bhangesa menha bhulu a di kalela ni menha bhoxi. Anga ki di bhanga kienhiki.

⁸ O muthandu ua bhiti mu dinga-ni-dinga, Nzambi anga u u ixana kuma Diulu. Bhenhobho bhua bhiti ngoloxi ni kimene, kizuua kia kaiadi.

⁹ Nzambi anga u zuela, uixi: Menha bhoxi a diulu a bhongoloke kididi kimoxi, mavu makukuta ma tomboloke. Anga ki bhita kienhiki.

¹⁰ Nzambi anga u luka mavu makukuta, Ixi; o dibhongo-lokelu dia menha ua di luku, Kalunga; Nzambi anga u ki mona kuma kia-uabha.

¹¹ Nzambi anga u zuela, uixi: Ixi i sabhuke iangu, ni idima i bhana mbutu, ni mixi i bhana ibundu, ku idifua-idifua, kala kidifua ni mbutu iê moxi, i kale mu ngongo. Anga ki di bhanga kienhiki.

¹² Ixi anga i sabhuka iangu, ni idima i bhana mbutu ia kaiela mu kifua kiê, ni mixi i bhana ibundu, ni mbutu iê moxi, ia kaiela mu kifua kiê; Nzambi anga u ki mona kuma kiauabha.

¹³ Anga ku kala ngoloxi ni kimene, kizuua kia katatu.

¹⁴ Nzambi anga u zuela, uixi: Ku kale imuiku ku dimbinza dia diulu phala kuuana muanha ni usuku; i kale ijimbuete ia kuidikiza jithémbu ni izuua ni mivu;

¹⁵ I kale imuiku ku dimbinza dia diulu ia kubhana mukengeji mu ngongo. Anga ki di bhanga kienhiki.

¹⁶ Nzambi anga u bhanga imuiku iiadi iònene; kimuiku kia dikota ki tumina mu muanha, o kimuiku kia ndenge ki tumina mu usuku; ua bhange ue o jithé-thembua.

¹⁷ Nzambi anga u i ta ididi mu dimbinza dia diulu phala kubhana mukengeji mu ngongo,

¹⁸ ni kutumina o muanha ni usuku, ni kuuana mukengeji ni kitombe; Nzambi anga u mona kuma kiauabha.

¹⁹ Anga ku kala ngoloxi ni kimene, kizuua kia kauana.

²⁰ Nzambi anga u zuela, uixi: Mu menha mu sokoloke ndumba ia iama ia muenhu, (i zouela momo), ni jinjila ji bhita bhulu mu dinga-ni-dinga.

²¹ Nzambi anga u bhanga iama iònene iendela mu menha, ni jimbiji ja muenhu. Mu menha anga mu sokoloka kiavulu ku idifua-idifua, ni jinjila jenda ni mabhabha ku idifua-idifua; Nzambi anga u mona kuma kiauabha.

²² Nzambi anga u a tula o kizediuise, uixi: Vualenu, mu sokoloke, mu menha ma kalunga mu izale; o jinjila ue ji sokoloke ku kanga.

²³ Anga ku kala ngoloxi ni kimene, kizuua kia katanu.

Ubhahgelu ua jixitu ku kanga, ni athu a muenhu

²⁴ Nzambi anga u zuela, uixi: Ku mavu ku sokoloke jixitu ja muenhu ku idifua-idifua, ni ibhaku, ni ibamba i zanzala bhoxi, ni iama ia kanga, ku idifua-idifua; anga ki di bhanga kienhiki.

²⁵ Nzambi anga u bhanga iama ia kanga ni ifua iâ; Nzambi anga u mona kuma kiauabha.

²⁶ Nzambi anga u zuela, uixi: Tu bhangienu muthu mu kidifuanganu kietu, a bhabhelele ku kijingo kietu, a tumine ku jimbiji jendela mu menha, ni ku jinjila ji bhita bhulu, ni ku ibhaku, ni ixi ioso, ni ku ibamba iendela ku mavu.

²⁷ Nzambi anga u bhanga muthu mu kidifuanganu kiê, mu kidifuanganu kiê muene mua mu iudika; iú u kala diiala, iú u kala muhatu kia a bhanga.

²⁸ Nzambi anga u a tula o kizediuise, uixi: Vualenu, mu sokoloke, mu izalese ixi ioso, mu i tolole; mu tumine ue jimbiji jendela mu menha, ni jinjila ji bhita bhulu, ni iama ioso ia muenhu iendela ku mavu.

²⁹ Nzambi anga u zuela, uixi: Talenu, nga mi bhana idima ioso i bhana jimbutu, mu ngongo ioso, ni miẋi ioso i kala ni ibundu i bhana jimbutu; i mi kale o kudia kuenu;

³⁰ ni iama ioso ia kanga, ni jinjila ji bhita bhulu, ni ibamba iendela ku mavu, ioso iala ni muenhu, nga i bhana iangu ia uisu mu kudia kuâ; anga ki di bhanga kienhiki.

³¹ Nzambi anga u mona ima ioso ia iudika, kuma ia uabha muene kiavulu. Anga ku kala ngoloxi ni kimene, kizuua kia kasamanu.