Dijingunuinu 9 - O Mikanda Ikola

¹ Anju ia katanu anga u xika o koloneta iê. Anga ngi mona o théthembua ioio ia kexi ku diulu íi ia lauka bhoxi, ienhiʼii a i bhana o sabhi ia mukiukuluku.

² Anga muène théthembua u jikula mu dikungu dia mukiukuluku, anga mu dikungu mu fuafua dixi kala dixi dia dijiku dia dikota. Ni ku dikumbi, ni kuma kuoso, anga ku vunda mukonda dia dixi dia dikungu.

³ Mu dixi anga mu tunda kihoho, hé ki di zala mu ngongo. O kihoho anga a ki bhana o kukola uila ki kôla o jimbalanganza mu ngongo.

⁴ Hé a ki ambela kuila ki ki bhange kima kioso-kioso kiaiibha ku iangu, mba kima kioso kia uisu, mba ngó muxi uoso-uoso. Maji kikala ki kuama ngó athu oso a kambe o kidimbu kia Nzambi bhu dibhomo.

⁵ Inda o kihoho ue ka ki ehela ku a jibha, maji a ki ehela ngó ku a talesa hadi mu mbeji jitanu. O kukata kuê mu kunumata, mukuâ ni kukaia kua mbaianganza ki i numata muthu.

⁶ O mu mbeji jitanu jenhojo, athu a kà bhindamena o kùfua, maji a kà ku tokoka! A kènda kalunga, maji o kalunga-phe ka kà a lenga!

⁷ O kihohuʼiki, kidifua kiê, mukuâ ni jikabalu ja zakela phala kuia ku ita. O ku mítue iâ, ku kala itundu iedi kala ia ulu, o pholo jâ jedi kala pholo ja athu.

⁸ Ki kala ni kindemba uila ki kala o kindemba kia ahatu. O mazu mâ, mukuâ ni mazu ma hoji.

⁹ Ki kala ni ilanda iedi kala ilanda ia felu. O kinuminu kia mabhabha mâ, kiedi kala kinuminu kia makalu ni jikabalu javulu ja kuata lusolo lua kuia ku ita.

¹⁰ Anga ki kala ue ni mikila i numata, uila ki kala o jimbalanganza. O ku mikila iâ, kuene kua sueka o kukola kuâ, kua kukuama na-ku athu mu mbeji jitanu.

¹¹ O sobha iâ, aia-nê mu ku a tumina, muène o anjo ia dikungu ki di moneka hole. Muenhú, o ʼjina diê mu Hebeleu a mu ila Abadoni, o mu Ngelèku exi Apoliioni. (Kifua-phe ambe exi muène Nguma-Ngonga-Kihuènde; Na Zanga-Ioso).

¹² Lamba dia dianga dia bhiti. Talesa, hanji kua xala malamba aiadi a-nda kubhita!

¹³ Anju ia kasamanu anga u xika o koloneta iê. Anga ngʼivua dízui dia tundu bhu thungi jiuana ja kalatódio ka ulu kene bhu pholo ia Nzambi.

¹⁴ Dízui hé di ambela anju ia kuata o koloneta ia kasamanu, dixi: Jituna o anju jiuana ja kuikila mu honga bhu mbandu ia ngiji ia dikota ia Eufalate!

¹⁵ Anju jiuana anga a ji jituna. Jene ja di polondala phala ola ienhiʼii, ni kizuua, ni mbeji, ni muvu, mbé a jibhe mbandu ia katatu ia mundu mu ngongo.

¹⁶ Anga ngʼivua kuila o ifuẋi ia masoladi akua jikabalu, konda iâ ia tena kuinhi dia midi dia ibuka, kala kibuka kuinhi dia midi ia muthu.

¹⁷ O mu kisuma kiami, nga mono kienhiki o jikabalu ni athu a ji mondala. A zakela ivunga-thulu ia di fuangana kala túbhia mu kukusuka, ni ku tadi dia azulu, ni kuzeluluka kala xofidi. O mítue ia jikabalu iedi kala mítue ia jihoji, o mu kanu diâ mu fuafua túbhia, ni dixi ni xofidi.

¹⁸ O mabhebhu matatuʼama, mene ma jibha o mbandu ia katatu ia mundu mu ngongo: o túbhia, o dixi, o xofidi, ia fuáfua jinga mu kanu dia jikabalu.

¹⁹ Kuma o kutena kua jikabalu, kuenié mu kanu diâ ni ku mikila iâ. Mukonda o mikila iâ iedi kala jinhoka, i kala muene ni mítue; iene i a kala mu kuama na-iu o ifuẋi.

²⁰ O mundu uoso ua subhuka-ku, oso a kambe kúfua ku mabhebhuʼ ama, nguá-uâ kudiela o imbamba iâ ia kexi mu bhanga. Ka zumbuka o kubheza madimónio, ni itèka ia ulu, ni ia phalata, ni ngôndo, ni matadi ni mixi, ima i bhinga ki i tena kumona, ki i tena kuívua, ki i tena kuenda.

²¹ Nguá-uâ kudiela o ujibhanganga uâ, ni uloji, ni undumbu, ni uii uâ.