Dijingunuinu 7 - O Mikanda Ikola

Jiselevende ja Nzambi a ji ta kidimbu

¹ Kia bhiti kiki, nga mono anju jiuana jemana ku hota jiuana ja ʼxi, ja kuata o itembu iuana ia ʼxi, phala kana kitembu ki bhuke mʼoxi, mba ku musanza ua kalunga, mba ku muxi uoso-uoso.

² Anga ngi mona anjo iamukuá í banda ku tundila dikumbi, ua kuata kadimbu ka Nzambi ia muenhu. Muène anga u handekela ni dízui dia dikota ku ji-anju jiuana Nzambi ja bhana o kutena kua kukuama mu ngongo ni ku musanza ua kalunga.

³ Anjo u a ambela, uixi: Kana kukuama oxi, mba musanza ua kalunga, mba mixi, katé ki tu zubha ku a ta kidimbu bhu dibhomo, oso jiselevende ja Nzambi ietu.

⁴ Anga ngʼívua o konda ia ene a a te o kidimbu kia Nzambi bhu mabhômo mâ; a tena hama ia midi ni makuinhi auana a midi ni midi jiuana. Ene oso a a tungula ni kidimbu, a tundu mu miji ioso ia anʼa Izalaiele.

⁵ Ku muiji ni muiji, kuinhi dia midi ni midi jiiadi: Ku muiji ua Juda, kuinhi dia midi ni midi jiiadi; ku muiji ua Lubene, kuinhi dia midi ni midi jiiadi; ku muiji ua Ngade, kuinhi dia midi ni midi jiiadi;

⁶ ku muiji ua Asele, kuinhi dia midi ni midi jiiadi; ku muiji ua Nafitali, kuinhi dia midi ni midi jiiadi; ku muiji ua Manasa, kuinhi dia midi ni midi jiiadi;

⁷ ku muiji ua Ximinhá, kuinhi dia midi ni midi jiiadi; ku muiji ua Levi, kuinhi dia midi ni midi jiiadi; ku muiji ua Isakale, kuinhi dia midi ni midi jiiadi;

⁸ ku muiji ua Nzebulone, kuinhi dia midi ni midi jiiadi; ku muiji ua Zuze, kuinhi dia midi ni midi jiiadi; ku muiji ua Bejamí, kuinhi dia midi ni midi jiiadi, a a te kidimbu.

O mundu ua Ngana ua bhuluka ku jiphaxi

⁹ Kia bhiti imʼíii, ngedi ngi tala, kua moneka mundu uavulu kana muthu u tena ku u tanga! Ua tundu mu ifuẋi ioso, ni mu miji ioso, ni mu madiembu moso, ni mu madimi moso. Emana bhu pholo ia kiandu, ni bhu pholo ia Kambudi, a kembe ni izuatu izela, a kuata isalale ia maie bhu maku.

¹⁰ Anga a kola ni dízui dia dikota, exi: O kubhuluka kuetu ku tunda kua Nzambi ietu ua xikama bhu kiandu, ni kua Kambudi!

¹¹ Bhenhobho ji-anju joso jemana, ja bhake o kiandu bhu kaxi, ni ikulakaji, ni iama iuana ia muenhu. Anga ji di bhala ni jipholo bhoxi bhu pholo ia kiandu, hé ji sambela Nzambi,

¹² exi: Kidi muén! Amén! Ni diximanu, ni fuma, ni ungana, ni kuijiia, ni kisakidilu, ni ujitu, ni ukota, ni uzonda, uangene ua Nzambi ietu katé ku hádia ni hádia! Amén!

¹³ Kikulakaji kimoxi, anga u ngi kumuna, uixi: Enhá, a kembe kiki ni izuatu izela, akua-hi? A tundu kuebhi?

¹⁴ Nga mu ambela, ngixi: Eʼmuène, ngana, ua ejiia. Kuala muène: Enhá ene a tundu mu hadi ia dikota. Ene a sukula izuatu iâ, ia a i zelesa mu manhinga ma Kambudi.

¹⁵ Kiene ki emanena bhu pholo ia kiandu kia Nzambi, ene a mu sedivila muanha ni usuku mu Tembulu iê. O ió ua xikama bhu kiandu, u a kondeka ni kivule kiê.

¹⁶ Ka kala dingi ni nzala mba dinhota. O muanha ki ua kuama dingi, mba kutema kuoso-kuoso.

¹⁷ Kuma o Kambudi uene muʼaxaxe ka kiandu, u kala mubidi uâ, muène u a endesa jinga bhu jithu ja menha ma muenhu. O Nzambi anga ua kondona masoxi moso mu mesu.