Dijingunuinu 5 - O Mikanda Ikola

O divulu diojike sambuadi dia kidimbu ni Kambudi

¹ Anga ngi mona divulu dia dilanda bhu lúkuaku lua dilu lua ió ua xikama bhu kiandu, dia di fu ni dilanda diòuinge, diosoneke ni moxi ni ku kanga, iá a di jika ni sambuadi dia kidimbu.

² Anga ngi mona anju ia dizonda, ua handekela ni dízui dia suina, uixi: Ua fuama kubula o idimbuʼíii nanhi, ni kujikula o divulu didi?

³ Maji kana muthu-phe mu diulu, mba mu ngongo, mba koxi a mavu, ua tena kujikula o divulu ni ku di tonginina ngó moxi diê.

⁴ Eme anga ngi kala mù dila kiavulu, mukonda kana muthu ua moneka, ua tena kujikula o divulu, mba ku di tonginina ngó moxi diê.

⁵ Kikulakaji kimoxi anga u ngʼambela, uixi: Ku dile. Tala! O Hoji ku muiji ua Juda, mukua Lundânji lua Davidi, ua tambula o kikoue, muène u lenda kubula o sambuadi dia kidimbu didi, ni kujikula o divulu diê.

⁶ O bhuʼ axaxe kê, bhu kiandu, anga ngi mona-bhu bhuemana Kambudi, a mu kondoloka ku iama iuana ia muenhu ni ku ikulakaji. O Kambudi kène kedi kala a ka jibhile. Muène u kala ni sambuadi diê dia lumbinga, ni sambuadi dia diesu, ene o sambuadi dia Nzumbi ia Nzambi a a tumikisa mu ngongo ioso.

⁷ O Kambudi muène anga u bhixila, hé u tambula o divulu bhu lúkuaku lua dilu lua ió ua xikama bhu kiandu.

⁸ Kia zubha ku di tambula, o iama iuana ia muenhu ni makuinhi aiadi a kikulakaji ni iuana, a di bhala bhu pholo ia Kambudi. Ene oso a sokelèlaku ni kukuata jimbànza ni jinganza ja ulu jezala fufutila ia dixi dia dizumba, iene o misambu ia akua-Ngana.

⁹ Anga emba o muimbu uobhe, exi: Kia ku fuama eie, kutambula o divulu, ni kujikula o idimbu iê. Kuma eie a ku jibhile, o mu kùfua kué Nzambi ua mu sumbila athu ku miji ioso, ni ku madimi moso, ni ku madiembu moso, ni mu ifuẋi ioso.

¹⁰ Eie ua a bhake ku usobha ni unganga ua Nzambi ietu, ene hinu à kala mù tumina mu ngongo.

¹¹ Anga eme ngi tala dingi, hé ngʼivua dízui dia ji-anju javulu ja bhake o kiandu bhu kaxi, ni iama iuana ia muenhu, ni ikulakaji, jʼemana, o konda iâ ia tena jimidi ni jimidi ja ndumba!

¹² Anga emba ni dízui dia suina, exi: Kambudi a mu jibhile, kia mu fuama kutambula o unéne ni umvuama, ni unjimu, ni uzonda, ni ujitu, ni fuma ni diximanu.

¹³ Kienhókio, ima ioso ia bhanga ni muenhu, iene mu diulu, ni mu ngongo, ni koxi a mavu, ni ku musanza ua kalunga, ima ioso kiá iene-ku, nga i ivu i kala mu kuimba, iexi: O diximanu, ni ujitu, ni ungana, ni utuminu, uangene ua ió ua xikama bhu kiandu, ni ua Kambudi, mu mivu ni mivu sè dizubhilu!

¹⁴ O iama iuana i tambuijila, iexi: Kidi muene. Amén! Ikulakaji anga a di bhala, hé a bheza ió ua kalelà-ku.