Dijingunuinu 4 - O Mikanda Ikola

Mu diulu a bheza

¹ Kia bhiti imʼiii, ngi kala ni kisunji kia mukuá, o ki nga tale, ngi mona dibhituʼidi, dia jikuka mu diulu! O dízui di nga diangele kuívua, mkuâ ni koloneta, anga di ngi zuelesa, dixi: Banda kunu, ngi ku idikize ima ia bhingi hinu i bhita!

² Kithanganʼokio anga ngi kala mu Nzumbi. Ngi talesa kiandu a ki xikika mu diulu, sai-ku ni ió ua xikama bhu kiandu.

³ Muène ua xikama bhu kiandu, ku mu tala mesu, uedi kala ditadi dia jáxipe ni dia salado mu kubenha. Anga kukala hongolo ia kondoloka o kiandu, kidifua kiê mukuâ ni ditadi dia zemelada.

⁴ Anga kukala ue makuinhi aiadi a kiandu ni iuana, ia kondoloka o kiandu bhu kaxi; o bhu iandu íii bhua xikama makuinhi aiadi a kikulakaji ni iuana, a kembe ni izuatu izela, o ku mitue a kala ni itundu ia ulu.

⁵ Mu kiandu anga mu telaka jinzaji, mu tunda màzui, ni inuminu. O bhu pholo ia kiandu, bhua uama sambuadi dia sama ja túbhia, diene o sambuadi dia Nzumbi ia Nzambi.

⁶ O bhu pholo ia kiandu, anga bhu kala ni kima kiedi kala kizanga kia vidulu, kia di fu mukuâ ni kidistalu mu kuzela. Ku mbandu ni mbandu, a bhake o kiandu bhu kaxi, kukala ue ni iama iuana, iezala mesu ku pholo ni ku dima.

⁷ Kiama kia dianga kidifua kiê kala hoji. Kiama kia kaiadi, kala ngombe. O kiama kia katatu, pholo iê kala ia muthu. Kiama kia kauana, mukuâ ni holokoko ioleka mabhabha kioso ki i kala mu kubhita bhulu.

⁸ Kala kiama ki kala ni mabhabha masamanu ezala mesu ni moxi ni ku kanga. Muanha ni usuku ki iene kunhoha, ia kuata kuila: U kôla, u kôla, u kôla, Ngana Nzambi Muteni-a-ioso, ua kexile-ku, kiki iú-é, hádia muene uà kala-ku!

⁹ Kithangana ni kithangana, kioso o iama iuana ki i bhana fuma ni ujitu, ni kusakidila ió ua xikama bhu kiandu, uene ni muenhu uê mu mivu ia kambe dizubhilu,

¹⁰ o makuinhi aiadi a kikulakaji ni iuana, a di bhala bhu pholo ia Muène ua xikama bhu kiandu, hé a mu bheza uene ni muenhu uê mu mivu ia kambe dizubhilu. Hé a takula itundu iâ bhu pholo ia kiandu, exi:

¹¹ Eie u Ngana ietu, Nzambi ietu! Kia ku fuama o kutambula fuma, ni ujitu ni unéne. Mukonda éʼMuène ua bhanga ioso, o vondadi ié iene ia i bhangesa kuiza-ku, íi ia di bhange, íi iala-ku.