Dijingunuinu 22 - O Mikanda Ikola

¹ Anju anga u ngʼidikiza ue o ngiji ia menha ma muenhu, mazele kala kidistalo, i fuafua bhu kiandu kia Nzambi ni kia Kambudi,

² ia-lu kunguluka mu kaxi ka nzunga ia mbanza. Ku sàmbua ni sàmbua dia ngiji, kukala mixi ia muenhu, iene mu kuima kuinhi dia kualidade ni kiiadi ia ibundu ku muvu, i bhana ibundu iê mbeji joso. O mafe mê ma uabhela o kusaka akuajixi.

³ Ku mbanza koko ki kuà kala dingi kima kioso-kioso kiòbhubhidile kuala Nzambi. O kiandu kia Nzambi, ni kia Kambudi, kià kala muenhomo, o jiselevende jê jà kala mu ku mu bheza jinga.

⁴ Ene a kà kala mu ku mu mona jinga o pholo iê, o dijina diê a kà kala na-diu diòsoneke bhu mabhômo mâ.

⁵ O usuku ki uà kala-ku dingi, ka kà bhindamena ue mukengeji ua kandeia, mba muanha ua dikumbi, mukonda o Ngana Nzambi muène ua-ndu kala muanha uâ, hé à kala ku ungana mu mivu ni mivu sè dizubhilu.

Jezú, o kuiza kuê

⁶ Anju anga u ngʼambela, uixi: Maka iá a kidi, a tokala ku a dielela. O Ngana Nzambi, uene mu bhana o Nzumbi iê ku jipolofeta, muène ua tumu anju iê kuidikiza selevende jê o ima i bhinga i bhita kindala.

⁷ Jezú uixi: Bhulakanenu! Eme ngi lenguluka kuiza! A zediua ió oso aiuka o maka ma upolofeta mu divulu didi!

⁸ Eme ngi Nzuá, eme-muène ngevu imʼiii, nga i mono. O ki nga zubha kuívua ni kumona imʼiii, nga di bhale bhu inama ia anju ua ngʼidikiza imʼiii, phala ku mu bheza.

⁹ Muène-phe, uixi: Aiuka, kana kubhanga kiki! Eme uami ngi selevende ni mukuenu, nga sokela ni phange jé, o jipolofeta, ni ene oso kiá aiuka o maka ma divulu didi. Bheza Nzambi!

¹⁰ Anju anga u ngʼambela dingi, uixi: O maka ma upolofeta mu divulu didi, kana ku ma suekela athu, kuma o thembu ia ima íii kubhita ia zukama kiá.

¹¹ Uoso ua bukumuka, a jijile o kubhanga kiaiibha; uoso uala kifusa, a jijile o kubhanga ufusa; uoso uaiuka, a jijile o kubhanga ima ia kuiuka; o uoso uazele, a jijile o kukala ni kuzela.

¹² Jezú uixi: Bhulakanenu! Eme ngi lenguluka kuiza! Ni kifutilu kiami nganda kuiza na-kiu, mu kuuanena athu oso kioso kia tokala mu ima iâ ioso ia bhanga jinga.

¹³ Eme ngi Alafa ni Omeka; nga Dianga, nga Sukidila; ngi Dimatekenu, ngi Dizubhilu.

¹⁴ Azediua oso a sukula izuatu iâ, phala a mone disesa dia kubhiẋila ni kúdia ku kibundu kia muxi ua muenhu, ni kutena kubokuena bhu mielu iê katé mu mbanza.

¹⁵ Ku kanga dia mbanza kuene kukala akua midimu ioso iaiibha, ni aloji, ni jindumbu, ni ijibhanganga, ni akua kubheza itèka, ni uoso u uabhela kuzuela ni kubhanga o makutu.

¹⁶ Eme, ngi Jezú, nga tumu anju iami ku mi bhana umbangi ua imʼiii mu jingeleja. Eme ngi lundânji, nga tokala ku luvualu lua Davidi. Eme ngi théthembua ia kubenha, i muika mu kimene.

¹⁷ Ni Nzumbi ni Dibhanga, edi: Izá! Uoso ue uívua imʼíii, ele: Izá! Uoso dinhota dia mu kuata, eze. Uoso uandala, a tambule o menha ma muenhu mu ngoho.

Dizumbukilu

¹⁸ Eme ngi Nzuá, nga bhana umbangi mu kudimuna kuila, muthu uoso uívua o maka ma upolofeta mu dívulu didi, ki kala kiki: Se bhu kala muthu u ta-ku ku makʼama, Nzambi ua kà mu tela-ku muène ku mabhebhu moso mòsoneke mu dívulu didi.

¹⁹ Se bhu kala muthu u katula-ku, ku maka ma upolofeta mu dívuluʼidi, Nzambi ue ua kà mu katula mbandu iê ku kibundu kia muxi ua muenhu, ni mbandu iê mu mbanza ia ngene, iòsoneke mu dívulu didi.

²⁰ O muène ua bhana umbangi ua ima ioso íii, uixi: Kidi kiene, ngiza kindala! Kiene muene! Izé, Ngana Jezú!

²¹ O kiadi kia Ngana ietu Jezú Kristu, ki kale ni enu oso.