Dijingunuinu 21 - O Mikanda Ikola

Oxi iòbhe ni diulu diòbhe

¹ Kia zubha kubhita imʼiii, ngi mona diulu diòbhe ni oxi iòbhe. Mukonda o diulu dia diangele-ku, ni oxi ia diangèle-ku, ia bhiti; o musanza ue ki ua moneka dingi.

² Anga eme, ngi Nzuá, ngi mona o Mbanza Iangene, Jeluzaleme iòbhe, iala mu tuluka ku diulu. Ia mu tunda kua Nzambi, ia di iudika kiambote, ia kembe mukuâ ni dibhanga dia kembela kuia mu kutakanesa ni muadi uê.

³ Anga ngʼívua dízui dia suina dia mu tunda bhu kiandu, dixi: Talesa, kindala o balaka ia Nzambi iala muʼaxaxe ka athu! Nzambi muène u tunga-nâ, ene a kala mundu uê. Nzambi muène uenda jinga-nâ, u kala Nzambi iâ.

⁴ Muène u a kondona o masoxi moso ku mesu mâ! Ki ku kala dingi kùfua, nè ngó mukondo, mba kudila, mba kukata. Mukonda ima ia diangèle-ku, ia bhiti.

⁵ Bhenhobho, muène ua xikama bhu kiandu, anga u zuela, uixi: Kindala ima ioso nga i bhangulula ku ubhe! Hé u ngʼambela, uixi: Kiki soneka-kiu! Kuma maka iá a kidi, a tokala ku a dielela.

⁶ Anga u kumuna dingi, uixi: Maka ma zubha kiá kubhita! Eme ngi Alafa ni Omeka, ngi Dimatekenu ngi Dizubhilu. Uoso dinhota dia mu kuata, ngi mu bhana kunua bhʼotho ia menha ma muenhu, mu ngoho.

⁷ Uoso u tolola, muène ua kà lundula kokuami o ima íii: Eme nga kà mu kala ngi Nzambi iê, muène uà kala monʼami.

⁸ Maji oso-phe akua uôma, akua phulu, a bhanga isunji, ijibhanganga, jindumbu, ni aloji ni abhezi a itèka, ni akua makutu oso, o mbandu iâ ià kala mu kizanga kia uama túbhia ni xofidi; kuène o kùfua kua kaiadi.

Jeluzaleme iòbhe

⁹ Anga ku ngi sanga anju imoxi, ku sambuadi a kuatele sambuadi dia nganza jezala ni sambuadi dia mabhebhu ma sukidila-ku. Hé u ngi zuelesa, uixi: Izá kunu, eme ngi ku idikize o Dibhanga, Muhatuʼa Kambudi.

¹⁰ Kithangana kienhókio o Nzumbi ia Nzambi hé u ngi kitulula, anju anga u ngʼambata Katé ku mulundu ua dikota ua di leka. Anga u ngʼidikiza o Mbanza Iangene, Jeluzaleme, iala mù tuluka ku diulu kua Nzambi,

¹¹ Ia benha ni kubenha kua Nzambi. O mbanza kumuika kuê kua di fuangana ni diiamande dia te kiavulu, di lekujuka kala tadi dia jaspe, mukuâ ni vídulu ia kenzuluka kiambote.

¹² Iene i kala ni kimbaka kiê kia dikota, kia lebha, ni kuinhi dia muelu ni kiiadi, o ku mielu kukala alangidi, kuinhi dia anju ni kiiadi. O ku mabhitu kuèsoneke ni majina, mene ma kuinhi dia muiji ni kiiadi ia Izalaiele.

¹³ Ku mbandu ni mbandu, mielu itatu: Ku thunda mielu itatu, kusuku mielu itatu, ku sulu mielu itatu, ku luiji mielu itatu.

¹⁴ O mbanza, kimbaka kie kiò tunge ku disèsa dia kuinhi dia ditadi ni kiiadi, o ku matadi anga a soneka-ku o kuinhi dia majina ni kiiadi a jipoxolo ja Kambudi.

¹⁵ Anju muène ua ngi zulesa, u kala ni lumbungu luê lua midila lua ulu, lua kuzonga na-iu o mbanza, ni mielu iê, ni kimbaka kiê.

¹⁶ Mbanza ia sokela mu jikuádulu, kuma o kulebha kuê kua sokela ni kuzanza. Anju muène anga u zonga o mbanza ni lumbungu luê: midi jiiadi ni hama jiiadi ja kilómetu. Ni kulebha kuê, ni kuzanza kuê, ni kitala kiê, ia sokela.

¹⁷ Anju anga u zonga o kimbaka kiê ue, kia bhana hama ia kóvadu ni makuinhi auana ni kiuana, kala kia sokela mu midila iene ia kexi mu kuzonga na-iu o anju.

¹⁸ Kimbaka kiê a ki tungu ni tadi dia jaxipe, o mbanza iene ia ulu ua uabha kiavulu, mukuâ ni vídulu mu kuzela.

¹⁹ O matadi a disèsa dia kimbaka kia mbanza, a ma kembesa ni madiiamande a idifua ioso. O tadi dia dianga dia disèsa, jáxipe; dia kaiadi safidia, dia katatu kaiesedénia dia kauana zemelada,

²⁰ dia katanu saludonika, dia kasamanu sáldio, dia kasambuadi kidizolitu, dia kanake belilu, dia kávua topáziu, dia kakuinhi kidizopáziu, dia kakuinhi ni kamoxi jasindu, dia kakuinhi ni kaiadi ametista.

²¹ Kuinhi diê dia dibhitu ni kiiadi, kuinhi dia phélula ni kiiadi. Mukonda o dibhitu dia muvimba, phélula imoxi. O nzunga iê a i zala ulu uazele kiambote, u bhita mesu kala vídulu.

²² O mu mbanza muene-phe ki nga mono-mo Tembulu, kuma o Ngana Nzambi, Kutènde, ni Kambudi, ene o Tembulu iê.

²³ O mbanza íii ki i bhingi ku kala dikumbi, mba mbeji, mu kumuikina-mu, mukonda o kubenha kua Nzambi kua zelesa-mu, o Kambudi muène o kandeia kâ.

²⁴ Akua jixi joso, a kʼènda muʼaxaxe ka mukengeji uê, o jisobha mu ngongo ja kà bheka-mu o matunda mâ.

²⁵ O mielu ia mbanza ia kà kala jinga ia jikuka kumbi dioso dia kambàmba, kà kala mu ku i jika, mukonda koko o usuku ki uene-ku.

²⁶ O ungana ua akua-jixi, ni umvuama uâ, a kà u bheka muenhumu.

²⁷ Maji o muene-phe ki mu bokona ngó kima kioso-kioso kia ufusa, mba muthu u bhanga isunji, ni ió u zuela makutu. A kà bokona mu mbana, ki kale ene ngó a a soneka o majina mâ mu divulu dia muenhu dia Kambudi.