Dijingunuinu 20 - O Mikanda Ikola

Satana u bhanga midi ia mivu ku upelezu

¹ Anga ngi mona anju iala mu tuluka ku diulu. Ua kuata sabhi ia dikungu ki di moneka hole, ni lubhambu lua dikota, bhu maku.

² Anga u kuata mudikixi, na kinhoka kiòkulu-ô, muène Diabhu, mba Satana, anga u mu kuta phala a bhange midi ia muvu bhu lubhambu.

³ Anga u mu takula mu dikungu ki di moneka hole, hé u di jika, anga u mu tela-ku kidimbu, phala ka bhombe dingi akua jixi, katé ki-bhua kubhita o midi ia mivu. O midi ia mivu ki i zubha kubhita, ki bhinga a mu jituna hanji kathangana.

⁴ Kia zubha kubhita kiki, nga mono iandu ni iá a xikama-ku. Enhá anga a a bhana o kutena kua kufundisa. Anga ngi mona ue o nzumbi ja ió oso a a batuile mítue mukonda dia kutanga ku mundu o umbangi ua kidi kiejile mú tukulula Jezú, ni mukonda dia maka ma Nzambi, ió oso a kambele kubheza o kiama ni kitèka kiê, a kambele kutambula o kidimbu kiê bhu dibhomo mba ku lúkuaku. Enhá anga eza dingi ni muenhu, hé a unda ku ungana ni Kristu, ungana u bhanga midi ia mivu.

⁵ (O madifundu amukuá-phe, ka mono luua muenhu, katé ki zubha midi ia mivu kubhita). Didi diene o difukunukinu dia dianga dia kutunda mu ʼalunga.

⁶ A zediua, ia a lunguâ kiavulu muene, ió oso a mona mbandu iâ mu difukunukinu didi dia dianga. Enhó, o kalunga ka kaiadi, ki ka a tena dingi. A kà kala jinganga ja Nzambi ni ja Kristu, a kalanê ku ungana midi ia mivu.

Satana u jituka, anga a mu tolola

⁷ O midi ia mivu ki ia kà zubha kubhita, Satana a mu jituna muʼaleia kê.

⁸ Hé u tunda mu kubhomba akua jixi, a di muangena mu ngongo ioso, ene a Ngongo ni Mangongo. Enhá Satana ua-nda ku a bhongolola phala kuiza ku ita, o kuvula kuâ mukuâ ni kisèkele bhu ndúndu ia kalunga.

⁹ Ene anga a di zala mu ngongo, oxi ioso iezala katé ku mbambe, anga a kondoloka o kilômbo kia akua-Ngana ni mbanza ia zolo muène, hé a i ta bhu kaxi. Maji mu diulu mua tuluka túbhia, anga tu a buikisa.

¹⁰ Bhenhobho, o Diabhu ua a bhombo, a mu takuila ue mu kizanga kia túbhia ni xofidi, mu ala kiá o kiama a mu takuila momo kumoxi ni polofeta ia makutu. Enhá à kala muenhomo, mu ku a tatesa usuku ni muanha, mu mivu ni mivu sè dizubhilu.

O kufundisa kua kà suka-ku

¹¹ Kia bhiti imʼíii, nga mono kiandu kia dikota kizela, ni muène ua xikama-bhu. O mu kulenga pholo iê, oxi ni diulu ia jimuka, ki ia moneka dingi ku mesu.

¹² Anga ngi mona ue o madifundu, makota ni jindenge, emana bhu pholo ia kiandu. Anga a jikula madivulu, ni divulu dia mukuá a di jikula, diene o divulu dia muenhu. O madifundu anga a a fundisa o ima ioso iosonèke mu madivulu, hé a a bhana kioso kia tokala mu imbamba iâ ia bhanga jinga.

¹³ O musanza ua kalunga anga u bhana oso madifundu ala-mu. O kùfua ni kalungʼa-ngombe, anga a bhana uâ ni madifundu mâ ma jikilile bhoxi dia kutena kuâ. Ene oso hé a a fundisa mu umoxi-umoxi, kala kia tokala mu imbamba iâ ia bhanga jinga.

¹⁴ O kùfua, ni kalungʼa-ngombe, anga a a takula mu kizanga kia túbhia. (O kizanga kia tubhʼiki, kuene o kùfua kua kaiadi).

¹⁵ Uoso a mu mono, ua kambe ku mu soneka mu divulu dia muenhu, a mu takula ue mu kizanga kia túbhia.