Dijingunuinu 18 - O Mikanda Ikola

Babilónia ngûndu; athu a mu imununa

¹ Kia bhiti imʼíii, nga mono anju iamukuá iala mu tuluka ku diulu. Muenhú u kala ni kijîngu kiavulu, mu ngongo ioso anga mu di muika ni kubenha kuê.

² Muène anga u di kola ni dízui dia suina, uixi: Ia jimi! O Babilónia ia dikota ia jimi! Mua biluka ditungilu dia madimonho, disuamenu dia nzumbi joso jaiibha. Mua kituka kibuta mu tunga o njila joso jaiibha ja ifusa!

³ Kuma o mu kùnua vinhu iê i salukisa ia undumbu, muene mua di bhalela akua jixi joso. Jisobha mu ngongo ja bhangele-nê undumbu, o jingenji mu ngongo ja funine itadi mu ufusa uê uatundu!

⁴ Anga ngʼivua dízui dia mukuá ku diulu, dixi: Tundenu moxi dia mbanza íii, enu mu mundu uami! Tundenu-mu! Kana ku di lunga-nê mu ituxi iê, phala ki mu tambule mbandu ku mabhebhu mê!

⁵ Mukonda o ituxi iê ia bhixila katé ku diulu ni kudilunjijika, o Nzambi iu ua xinganeka o ikuma iê.

⁶ Kioso kia bhangele muène, mu futienu-kiu; kioso kia fuama mu imbamba iê, mu vutuidienu-kiu mu luiadi! O kopho ia mi lungidile, muène ue mu lungidienu-iu luiadi.

⁷ Bhuoso bhua sukile muène ni ku di ximana, ni kuvudisa ukumbu, bhene bhu mu mu sukixila o kubhondalala ni kusebuluka kuê! Kuma uedile ku muẋima uê, uixi: Eme-muène na mvuale, nga xikama ku ungana! Ki ngala ngi mutûdi, ki ngi moneka dingi dilamba!

⁸ Kienhiki, mu kumbi dimoxi, kua-nda ku mu tulukila o kingûmba kiê kia mabhebhu: Makukata, misusu ni nzala! A kà mu oha mu túbhua katé ua buila. Kuma o Ngana Nzambi, ua mu mu fundisa, ua suina.

⁹ O jisobha mu ngongo, joso ja bhangele-nê undumbu, ende-nê mu ukumbu, a-ndu dila jingololo, kia kà talesa o dixi diê mu kùbhia.

¹⁰ O mu kanga mu emanena, mukonda dia uôma ua kutata kuê, a kèla: Uaué! Uaué, taté! O mbanza ia dikota Babilónia! O mbanza ia kolele kiambote! Mu kumbi dimoxi ngó, tata, kua ku tulukila kaxtiku kê!

¹¹ O jingenji ja kufuna mu ngongo, a kà mu dila jingololo, mukonda kana muthu dingi u sumba o mauenji mâ.

¹² Kana muthu u sumba o mauenji mâ ma ulu, ni phalata, ni madiiamande, ni jiphélula, ni linhu ia fina, ni izuatu iòteke ni husu, ni seda, ni thanga ja kusuka ja kindemba kia mbudi, ni mixi iauabha dizumba, ni ima ioso ia mazu a nzamba, ni ima ioso ia mixi ia te kiavulu, ni ia ngôndo, ni ia felu, ni ia tadi dia mamola;

¹³ mba ngó kusumba kanela, ni thembala, ni fufutila ia dizumba, ni nguèndu, ni mubafu, ni vinhu, ni maji, ni fuba, ni tiliku, ni jingombe, ni jimbudi, ni jikabalu, ni makalu, ni abhika, mba ngó mienhu ia athu.

¹⁴ O asumbi ni asumbixi, a kʼambela o mbanza, exi: Eie mbanza ia kime, o ima ioso iambote i ua semene ku muẋima ué, ua i tokoka! O ima ié ia disèse, ia kukemba, ia buila, ki ia moneka dingi! O iene ue ki mungu dingi ua-nda ku i mona!

¹⁵ O jingenji ja kexile kufuna imʼiii mu mbanzʼoio, ua kexile ku a muesa itadi, a kèmanena mu kanga, mukonda dia uôma ua kutata kuê, ni kudila jingololo.

¹⁶ A kèla: Uaué! Uaué! O mbanza ia dikota, tata! Ua zuatele linhu ia fina, ni izuatu iòteke ni husu, ni ia kindemba kia mbudi kikusuka, ua kembele ni ulu, ni madiiamande, ni jiphélula!

¹⁷ Mu kumbi dimoxi, jimbongo josuʼiji ja di boto, tata! Jikabhitangu joso ja jinaviiu, ni athu oso endela ku menha, ni akalakadi mu jinaviiu, ni akua kufuna uenji uâ ku musanza ua kalunga, a suka ngó mu kanga!

¹⁸ Anga a di kola, kia talesa o dixi diê mu kúbhia, exi: Mbanza ia dikota, tata! Ki i moneka luiadi!

¹⁹ Ene anga a di kunga mavu mu mítue, a di kola, a ta mbûndu, exi: Uaué! Uaué! O mbanza ia dikota, tata, mua kexile kumuena itadi akua jinaviiu, mukonda dia umvuama uê! Mu kumbi dimoxi, ua biluka ngûndu!

²⁰ Eie u diulu, mu olele, mukonda dia kusenguluka kuê! Ni enu oso mu akua-Ngana, mu jipoxolo, mu jipolofeta, mu oledienu! Sangulukenu, kuma Nzambi ua batula! Mu ioso ia mi bhange, ua mi bhela-nê kaxtiku!

²¹ Anju ia kindanda anga u zangula kiditadi, mukuâ ni ditadi dia dikota dia kuhuhila, anga u di takula mu menhʼa kalunga, uixi: Kiene muenʼiki, mukuâ ni kibhalu kia dikota, kia-nda kubobesa na-kiu Babilónia, o mbanza ia dikotʼoio! Ki mungu i tena dingi kumoneka ku mesu!

²² O dízui dia axiki a jimbànza, ni akua mújika, ni axiki a jimbèndu, ni akua jikoloneta, momué nuka dingi a kà dʼívua-mu! Nuka dingi momué mu kala mesene ia ufunu uoso-uoso! Nuka évua-mu ue dingi o kulunguta kua matadi a kuhuhila!

²³ Nuka momué mu muika dingi mukengeji ua kandeia! Nuka dingi évua-mu nzongo ia mabhanga! Mbata o jingenji jé ja kufuna, a kexile anʼa jingana a beta o kutena mu ngongo. O uanga ué uene u ua bhombo na-u akua jixi joso.

²⁴ Babilónia ia dikotʼoio, a mu bhana o kaxtiku kê, mukonda mua muène a sange-mu o manhinga ma jipolofeta, ni manhinga ma akua-Ngana, xi, o manhinga ma athu oso a a jibha jinga mu ngongo.