Dijingunuinu 17 - O Mikanda Ikola

Babilónia, o kidia-nzunga kia xikama ku menha

¹ Anga kuiza anju imoxi, ku sambuadi dia kuatele o sambuadi dia nganza, hé u ngi zuelesa, uixi: Iza kunu, ngi ku idikize kioso kia-nda kubhana o kaxtiku kua kidia-nzunga kia dikotʼokio, o mbanza ioio iòtunge bhu mbanduʼ a ngiji javulu.

² O jisobha mu ngongo ja bhanga jinga-nê undumbu, o athu a tungu mu ngongo ua a kodiuisa jinga ni vinhu ia undumbu uê.

³ Anga ngi kala mu Nzumbi kithangana kienhokio, anju hé u ngʼambata katé mu kikangalakata. Kuenhoko ngi mona muhatu ua xikama ku kiama ki kusuka. Kiene a ki soneka majina avulu a kuẋonguena Nzambi. Kiama kienhiki ki kala ni sambuadi diê dia mútue, ni kuinhi dia lumbinga.

⁴ O muhatu ua zuata jithanga jakusuka muene kiavulu nguíi, iú ua kembe ni ulu, ni madiiamande, ni jiphélula. Bhu lúkuaku ua kuata kopho ia ulu, iezala isunji ni imbamba ia ufusa, ia tundu mu undumbu uê.

⁵ O bhu dibhomo diê bhuòsoneke dijina, o dijimbuluilu diê dia kasuèkele, exi: Babilónia ia dikota, mama u vuala idianzunga ioso ni oso a bhanga isunji mu ngongo.

⁶ Anga ngi mona kuila o muhatu muenhú ua kodiua ni manhinga ma akua-Ngana Nzambi, ni manhinga ma ió a a jibha mukonda a kexile jifiiele jangene ja Jezú. O ki nga zubha ku mu mona, nga diuana kidiuanau kia dikota!

⁷ Bhenhobho kuala anju, uixi: Ua di uanena-hi kiosuʼiki? Eme nga-nda ku ku tangela o dijimbuluilu dia kisuma kia muhatu iú, ni kiama kia mu ambata, kiala ni sambuadi dia mútue, ni kuinhi dia lumbinga.

⁸ O kiama ki ua mono, kia kexile ni muenhu, maji o kiki, ki kianda kulaia dingi kiavulu. Mukonda o kiama kiki, hinu kia kà tunda mu dikungu ki di moneka hole, anga a kà mu buikisa. Athu a tungu mu ngongo, oso a kambe ku a soneka o majina mâ mu divulu dia muenhu tundé ku dimatekenu dia ʼxi, a-nda kua kà diuana ki a kà talesa o kiama. Mukonda o kiama ua kexile kiá ku muenhu, o kiki muenhu ua u lémbua, maji hinu ua kà tukuluka dingi.

⁹ Imʼíii-phe i bhinga unjimu ni kutongoloka, kuma: O sambuadi dia mútue, sambuadi dia mulundu, o muhatu ua xikama ku thandu diâ. O mítue ienhiʼii ue, sambuadi dia sobha:

¹⁰ Kitanu kiâ kia di bhale kiá, o umoxi iú-ué hanji mú tumina, o mukuá kiluua eza-ku. O kianda kuiza, kubhinga u bhangé ngó kakithangana kofele mu kutumina.

¹¹ O kiama ua kexile kiá ku muenhu, maji o kiki ua u lémbua, muène kanake ku jisobha ua tokala ku sambuadiʼodio dia diangele-ku, maji hinu a kà mu buikisa.

¹² O kuinhi dia lumbinga di ua monuʼodio, o kuinhi dia sobha kiluua a tambula o usobha uâ, maji a-nda ku a bhana-phe kutumina kala jisobha, mu ola imoxi, kumoxi ni kiama.

¹³ Ene oso ió kilunji kiâ kiene kimoxi, o kutena kuâ kuala na-ku ni kijingu kiâ, anda ku ki bhana o kiama.

¹⁴ Enhá a kà lua ita ni Kambudi, maji o Kambudi-phe ua kà a tolola, kuma muène Ngana ia jingana, Sobha ia jisobha. Muène ua kà a tolola kumoxi ni athuʼê ió ene ku mu nhenganana, ió a exana, a a tungula, o jifiiele.

¹⁵ Bhenhobho o anju ua ngʼambela ue, uixi: O menha ió u ua muene, kua xikama o kidia-nzunga ku thandu diâ, o miji ia athu, ni mundu, ni ifuẋi, ni madimi.

¹⁶ O kuinhi dia lumbinga di ua muene, ni kiama muène, a kà di zemba ni kidia-nzunga. Ene a kà mu sebulula, o ioso iala na-iu a kà mu katula-iu, hé u xala thuẋi-a-thakala. A kà mu dia xitu, a mu oha mu túbhia katé ua buila.

¹⁷ Kuma o Nzambi ua a te-kiu mu miẋima iâ, o kubhanga kia mu kala mu kilunji kiê, phala ene oso a sunge kilunji kimoxi, kia kubhana kiama o utuminu uâ, katé bhua kà zubhila kubhita o maka ma Nzambi.

¹⁸ O muhatu ua mu monuʼó, o mbanza ia dikotʼoio ia mu tumina o jisobha joso mu ngongo.