Dijingunuinu 16 - O Mikanda Ikola

O jinganza ja njinda ia Nzambi

¹ Anga ngʼivua dízui dia suina mu Tembulu, di ambela sambuadi dia anju, dixi: Ndenu, mu lundulule mu ngongo o sambuadi dia nganza ia njinda ia Nzambi!

² Anju ia dianga anga uia, hé u lundulula o nganza iê mu ngongo. Anga i bhangesa jifidila jaiibha, jixixima ku mikutu ia athu ala ni kidimbu kia kiama, a bheza jinga o kitèka kiê.

³ Anju ia kaiadi anga u lundulula o nganza iê ku musanza ua kalunga. Mu musanza anga mu kituka manhinga kala ma muthu uafu, o mienhu ioso ku musanza anga i fua.

⁴ Kienhókio o katatu anga u lundulula o nganza iê mu jingiji ni mu jithu ja menha, anga mu kituka manhinga.

⁵ Anga ngʼivua anju ia bhana kutumina o menha, uixi: Eie, Ngana, uenié, eie ua kexile-ku, eie Uaiuka, Ukôla, mukonda dia kiki ki ua batulʼiki!

⁶ Kuma ene a lundulula jinga manhinga ma akua-Ngana ni ma jipolofeta, eie-phe ue ua a bhana manhinga phala kùnua. Mukonda a-lu tambula kioso kia a fuama!

⁷ Anga kienhókio ngʼivua dízui dia tundu bhu kalatódio, dixi: Kiene muene! Eie Ngana Nzambi, Muteni-a-Ioso, o kubatula kué kua kidi, kuaiuka!

⁸ Anju ia kauana anga u lundulula nganza iê ku thanduʼa dikumbi, diene anga a di bhana o kuaula athu ni túbhia.

⁹ Athu anga auka mu kutema kuê kuavulu. Ene anga a ẋonguena o dijina dia Nzambi uala ni kutena kua kubheka mabhebhu kala iá! Maji o athu nguá-uâ-phe kudiela o ituxi iâ, ni kuximana o unéne ua Nzambi.

¹⁰ Anju ia katanu anga u lundulula o nganza iê ku thanduʼa kiandu kia kiama. O utuminu uê anga u kala mua vundu, athu hé a kala mù di kokota o madimi mukonda dia misusu.

¹¹ Hé a ẋonguena Nzambi ia diulu, mukonda dia kuxixima kua misusu ni jifidila jâ. Maji o imbamba iâ-phe ia jinjila jâ jaiibha, nguá-uâ ku i diela.

¹² Anju ia kasamanu anga u lundulula o nganza iê mu honga ia dikota ia Eufalate. Menha mê anga ma kukuta, phala bhu di bhange njila ia jisobha jʼijila ku tundila o dikumbi.

¹³ Anga ngi mona ʼnzumbi jkitatu jaiibha jedi kala mazote. Nzumbʼiji ja tundu mu kanu dia mudikixi, ni mu kanu dia kiama, ni mu kanu dia polofeta ia makutu.

¹⁴ Jenhiji jene o jinzumbi ja madimonho ma bhanga iphata ni madiuanu. Nzumbi jitatu jiji, jiia mù nhunga ku jisobha mu ngongo ioso, mu ku a kasa ku ita ia kizuua kia Dikota kia Nzambi, Muteni-a-Ioso.

¹⁵ Ivuenu: Eme hinu ngʼiza kala ngi muii! Ua zediua ió uoso ua di lange, ua bhake kiambote o izuatu iê, phala kende ni tuẋi, nʼa mu kuatese jisonhi bhu pholo ia mundu!

¹⁶ Kienhókio o jinzumbi jaiibha anga ji bongoluela o jisobha bhu kididi a kʼixana mu mbimbi ia Hebeleu exi Alumajedone.

¹⁷ Anju ia kasambuadi anga u lunduluila o nganza iê mu kitembu. Mu Tembulu anga mu tunda dízui dia suina ni bhu kiandu, dixi: Kima kiobhange!

¹⁸ Anga ku kala jinzaji, ni mázui, ni inuminu. Hé ku kala ue ni kiteketela kia ʼxi, kiluua ngó ki bhita hanji kieneku athu mu ngongo, o kiteketela kia ʼxi, kia dikota, kia suina kiavulu kala kiki!

¹⁹ O mbanza ia dikota anga i muangunuka mu mbandu jitatu, o jimbanza ja akua-jixi mu ngongo anga ji lundumuka hé ji senguluka jene joso muene. Nzambi anga u lembalala o Babilónia ia dikota, hé u i bhana kùnua o vinhu ia tundu mu kopho iê—o vinhu ia kutema kua njinda iê.

²⁰ Ikolo ioso anga i muangana, o milundu ioso ia jimuka, ki ia moneka dingi ku mesu.

²¹ Mvula ia matadi anga i sonoka ku diulu, i laukila ku thandu dia athu. O matadi mê a makota kiavulu, dimoxi ngó di pezala makuinhi auana a kilo. Athu anga a ẋonguena a Nzambi, mukonda dia dibhebhu dia mvula ia matadi, kuma o dibhebhu diê dia vulu kinéne!