Dijingunuinu 15 - O Mikanda Ikola

O ji-anju ni mabhebhu a sukidila-ku

¹ Anga ngi mona kijimbuete kia kijinganu kia mukuá ku diulu, kia dikota, ki bhekela kudiuana! Sambuadi dia anju, a kuata sambuadi dia mabhebhu, ene kiá o mabhebhu a sukidila-ku, kuma ene a kuzubhila kiá o njinda ia Nzambi.

² Anga ngi mona kidifua kia kizanga kia vidulu iolunge ni túbhia. Hé ngi mona ue ió oso a bhânge ni kiama, iá a mu tolola, muène ni kitèka kiê, kumoxi ni iala ió ua bhingi o númelu iene iala bhu kididi kia dijina diê. Enhá, a tolola, hé emana bhu kizanga kia vidulu, a kuata kuxika jimbànza ja a bhana kuala Nzambi.

³ Anga emba o muimbu ua Mozé, ngunza iangene ia Nzambi, ni muimbu ua Kambudi, exi: Eie Ngana Nzambi, Muteni-a-Ioso, o ikalakalu ié kukula kuahi, ikalakalu idiuanesa kinéne! Eie, Ngana, u Sobha ia miji ioso, o ixinganeku ié kuiuka kuahi, ima ioso i u sola kubhanga, ia kidi!

⁴ Nanhi u kamba kukala ni uôma ué, eie Ngana? Uebhi, Ngana, ka mesena kutanga o unéne ué? Mukonda eie-muène ngó ubheka ué ukôla! Akua jixi joso a kèza bhu pholo ié mu ku ku ximana, mbata o ikalkalu ié iaiuka, athu enhoso a mu i mona.

⁵ Kia bhiti imʼii, nga mono o Tembulu mu diulu ia jikuka, ni Balaka ia Umbangi muene mu iala.

⁶ Mu Tembulu anga mu tunda o sambuadi dia anju dienhodio, a kuata o sambuadi dia mabhebhu, a kembe ni linhu izela ia-lu benha, iá a di kutu ni phonda ja ulu mu thulu.

⁷ Kienhókio, ku iama iuana ia muenhu, ku kala kimoxi ki bhana sambuadi dia anju sambuadi dia nganza ia ulu iezala ni njinda ia Nzambi, Ió ueniê ni muenhu uê katé ku hàdia ni hàdia.

⁸ Tembulu anga izala ni dixi dia tundu mu kubenha kua Nzambi ni kusuina kuê. Kana-bhu ua tena kubokona mu Tembulu, katé o sambuadi dia mabhebhu ma kuata sambuadi dia anju ma zubha kubhita.