Dijingunuinu 14 - O Mikanda Ikola

Kambudi ni makuenze mê ku mulundu ua Ziione

¹ Kienhókio anga ngi talesa, ngi mona Kambudi uemana ku Mulundu ua Ziione. Anga kukala athu kumoxi ni Muène, hâma ia midi ni makuinhi auana ni midi jiuana, ala ni dijina diê ni dijina dia Tata iê, òsoneke bhu mabhômo mâ.

² Anga ngʼivua dízui ku diulu, kala dízui dia dibhubha dia dikota dia menha, mba kala dízui dia kinuminu kionéne kia nzaji. O dízui di ngevu diedi kala dia akua jimbànza ala kuxika o jimbànza jâ.

³ O hâma ia midi ni makuinhi auana a midi ni midi jiuana, anga emana bhu pholo ia kiandu, ni bhu pholo ia iama iuana ia muenhu, ni ia ikulakaji, anga emba o muimbu uâ uobhe. O muimbu uenhó, kana muthu dingi u tena kudilonga-u, kikale ene ngó ió oso a a kula mu ngongo.

⁴ Enhá ene a di bhake ni kuzela, a kambe kudikasanesa ku jiphànda ni ahatu, kuma ala anʼa ndenge. Enhá ene a nhenganana Kambudi, ene a nhunganê kuoso-kuoso ku a di tela. Enhá ene a a sumbu muʼaxaxe ka mundu ua athu mu ngongo, mu kukala ibundu ia kutomona ia bhakuila Nzambi ni Kambudi.

⁵ Mu kanu diâ ki mu moneka makutu. Kene ngó ni kisemu bhu pholo ia kiandu kia Nzambi. Athu muene a tenena!

Anju jitatu ji kola jingolokela

⁶ Anga ngi mona anju iamukua ia mu bhita bhulu, ia di lèka, o bhu ala kubhitila, uasu o mbambe ni diulu. Uambata o jingolokela ji xalelà-ku ja Njimbu Iambote, phala ku ji kolela athu oso a tungu mu ngongo, ku ifuẋi ioso, ni miji ioso, ni madimi, ni madiembu.

⁷ Anga u tanga ni dízui dia suina, uixi: Nzambi mu kuatedienu uôma, mu ximanienu o unéne uê! Kuma o kumbi diê dia kufundisa athu oso dia bhixila! Mu bhezienu, ió ua bhanga o diulu, ni oxi, ni musanza ua kalunga ni jithu ji fuafua o menha!

⁸ Anga ku kaiela anju iamukuá ia kaiadi, uixi: Ia jimi! Ia jimi! O Babilónia ia dikota ia jimi, ia kexi mu kuila o ifuẋi ioso u i nuisa ku vinhu iê—o vinhu iê ia nguzu, i salukisa, ia undumbu uê!

⁹ Anga ku kaiela anju iamukua ia katatu, u tanga ni dizui dia suina, uixi: Se muthu u bheza o kiama ni kitèka kiê, hé u tambula o kidimbu kiê bhu dibhomo mba ku lúkuaku,

¹⁰ muenhó hinu u nua ku vinhu ia Nzambi, o vinhu ia njinda iê, a i lundulula ia hatu ni nguzu ioso mu kopho ia kutêma kuê! Kuma muthu uoso u bhanga kiki, a kà mu tatesa ni túbhia ni xofidi bhu pholo ia ji-anju jikôla, ni bhu pholo ia Kambudi.

¹¹ O dixi dia túbhia tua kà a tatesa, dia kà banda jinga katé ku hádia ni hàdia! Momo, oso a bheza kiama ni kitèka kiê, ni oso a tambula kidimbu kia dijina diê, a kà tala hadi muanha ni usuku ka nhoha.

¹² Ima kala íii, i bhinga o kukolokota ku mbandu ia akua-Ngana, ié ʼoso a mu tumaka o ijila ia Nzambi, ni kixikanu kia ió oso ala jifiiele ja Jezú.

¹³ Anga bhenhobho ngʼívua dízui di tunda mu diulu, dixi: Kiki soneka-kiu; Azediua o madifundu tundé kiki a fuila mu kikalakalu kia Ngana! O Nzumbi ia Nzambi anga uitaia, uixi: Eua! Kiokio kidi muene! Mukonda ene a kà nhohaku kiá ku ikalakalu iâ, ia hadi, mbata o mbote i tunda mu kukalakala kuâ, a kàia na-iu.

Kumuna tiliku ni kukanza ji-uva

¹⁴ Kienhókio anga ngi talesa, hé ngi mona dituta diazele, o ua xikama ku dituta uedi kala monʼa muthu. O ku mútue uê kua mu kala kitundu kia ulu, o bhu lukuaku luê ua kuata kibhôlola kiatu.

¹⁵ Anju iamukua anga i tunda mu Tembulu, hé u handekela ni dízui dia suina ió ua xikama ku dituta, uixi: Katula o kibhôlola kié, u mune, mukonda o kumbi dieza-bhu kiá dia kumuna. Mbata o idima mu ngongo iabhi kiá!

¹⁶ Kienhókio, o ua xikama ku dituta anga u bhitisa o kibhôlola kiê mu ngongo, idima mʼoxi ioso anga a i muna.

¹⁷ Bhenhobho anga ngi mona dingi anju iamukua i tunda mu tembulu iene mu diulu, muène ue ua kuata kibhôlola kiatu.

¹⁸ Anju iamukuá, a mu bhele kutambula konda ia túbhia, anga u tunda bhu kalatódio, hé u handekela ni dízui dia suina kua ió ua kuata kibhôlola kiatu, uixi: Katula o kibhôlola kié, mbé u kanze isaka ia ji-uva ku mivide mu ngongo, kuma ji-uva jê jabhi, ja zubha!

¹⁹ Anju anga u bhitisa o kibhôlola kiê mu ngongo, hé u kanza o ji-uva mʼoxi ioso, anga u ji longa mu ditangi dia kukamena vinhu, mu ditangi dia dikota dia njinda ia Nzambi.

²⁰ O ji-uva anga a ji kamena mu ditangi ku mukáu ku kanga dia mbonge, o mukunguiji ua manhinga a tundu mu ditangi, hungulule iê kulebha iambata hâma jitatu ja kilómetulu, o kuzonga kuê métulu ni kaxaxe.