Dijingunuinu 12 - O Mikanda Ikola

O muhatu ni mudikixi

¹ Anga ku moneka kijimbuete kia kijingano kia dikota ku diulu. Kua tukuluka muhatu. Dikumbi diene o kizuatu kiê, o mbeji ia mu kala bhoxi dia inama iê, o ku mútue uê kuala kitundu kia kuinhi dia théthembua ni jiiadi.

² Muenhú uala ni divumu, anga u di kola, u kala mu kuvuala, misusu ia kudisanza ia mu kuata.

³ Anga ku moneka kijimbuete kiamukuá ku diulu. Kimudikixi kia dikota, kikusuka, kiala ni sambuadi dia mítue ni kuinhi dia lumbinga, o ku mítue iê ku kala sambuadi dia kitundu.

⁴ Ni mbônde iê, anga u koka mbandu ia katatu ia jithéthembua ku diulu, hé u ji lauila mu ngongo. Mudikixi anga uimana bhu pholo ia muhatu ua-nda kudisanza, phala kia zubha kudisanza, monʼê a mu die.

⁵ Muhatu anga u vuala monʼa diiala, ió ua-nda kutumina akua jixi ni mbasá ia felu. Maji-phe o mona anga a mu zangumuna, hé a mu bheka ku diulu kua Nzambi, bhu kiandu kiê.

⁶ O muhatu anga u lengela mu kikangalakata, mua kala o kididi kiê kia mu iudikila Nzambi. Hé a kala mu ku mu dikila kuenhoko mu midi ia kizuua ni hama jiiadi ni makuinhi a samanu.

⁷ Kienhókio, mu diulu anga mu kala ita. Mingedi ni ji-anju jê a lua ita ni mudikixi, o mudikixi anga u lua ue kumoxi ni ji-anju jê.

⁸ Enhá-phe a tokoka-ku! Ni muène ni ji-anju jê, mu diulu ka mono-mo dingi kididi.

⁹ Kimudikixi kia dikota anga a mu takuila ku kanga! A mu kaia, na Kinhoka Kiokulu, a mu ila Diabhu, a mu ila Satana, mukua kunganala o mundu uoso. A mu lundumuina mu ngongo, ni ji-anju jê a ji lundumuina-nê kumoxi.

¹⁰ Anga ngʼívua dízui dia dikota mu diulu, dixi: Kiki kueza ubhulukilu ua Nzambi ietu! Kiki o Nzambi ietu uedikiza o unéne uê kuila Muène Sobha! Kiki o Kristu iê, ua londekeza ki kala o ungana uê! Kuma o mutatedi ua jiphange jetu a mu lundumuna, ua kexile ku a tatela bhu pholo ia Nzambi muanha ni usuku, mu diulu a mu kaie-mu.

¹¹ Jiphange jetu a tena-phe ku mu tolola mukonda dia manhinga ma Kambudi, ni mukonda dia maka ma umbangi uâ ua kidi ma tanga jinga. Ene a kexile polondo ia kubhakula o mienhu iâ phala ku a jibha.

¹² Kala kiki, ku madiulu-phe tanenu-ku, ni enu oso mua tunga momo! Lamba dienu mu ngongo ni ku musanza! Mukonda Diabhu ua mi tulukila ni njinda iavulu, kuma muène uejiia kuila o thembu iê ia butu kia.

¹³ Mudikixi kia mono a mu lundumuina bhoxi, u kuata kulandameka o muhatu ua vuala monʼa diiala.

¹⁴ Muhatu anga a mu bhana mabhabha maiadi ma holokoko ia dikota, phala a bhite bhulu katé mu kikangalakata bhu kididi kiê, bhua mu dikila mu thembu, ni jithembu, ni kaxaxe ka thembu, phala a suamene o pholo ia Kinhoka, kʼaie dingi ni ku mu asa.

¹⁵ Kinhoka anga ki lukula mu kanu diê menha ma kaiela muhatu mukuâ ni ngiji, phala a mu kungulule ni menha.

¹⁶ Maji oxi-phe anga i kuatekesa o muhatu; kuma oxi ia jikula mu kanu diê íii ia minha o ngiji ia lukula o mudikixi mu kanu diê.

¹⁷ Mudikixi anga u kuatela muhatu njinda iavulu, u tunda-bhu bhenhobho, hé uia mu kùlua ita ni iá a subhuka ku luvualu lua muhatu, ió oso ene mu bhaka o ijila ia Nzambi, hé a jijila o umbangi ua kidi kia Jezú Kristu.

¹⁸ Mudikixi anga uimana nzànza ku kibumu kia kalunga.