Dijingunuinu 10 - O Mikanda Ikola

Anju ia kindanda ni kadivulu. Sambuadi dia inuminu.

¹ Anga ngi mona anju iamukuá ia dizonda, uala mu tuluka ku diulu. Ua zuata dituta, o ku thanduʼa mutue uê kua bhiti hongolo. O pholo iê iedi kala dikumbi, o inama iê mukuâ ni jiphiladi ja túbhia.

² Bhu lúkuaku lué ua kuata kadivulu ka jikuka. Muène anga u tangamana, hé u tula kinama kiê kia dilu ku musanza ua kalunga, ni kinama kiê kia kiasu ku mavu a kukuta ku ngonguenha.

³ Anga u dikola ni dízui dia suina mukuâ ni kukumba kua hoji. O kia zubha kudikola, sambuadi dia inuminu ia tambuijila ni kimutendu.

⁴ Kioso o sambuadi dia kinuminu ki dia zubha kutubhula o mitendu iâ, ngʼandekele kusoneka. Anga ngʼivua dízui ku diulu, dixi: O ima ia tange o sambuadi dia kinuminu jika-iu, i kale ngó mu kasuekèle. Eie kana kusoneka kima!

⁵ Bhenhobho o anju nga mu mono kutangamana ku musanza ua kalunga ni ku mavu a ngongo, lúkuaku luê lua dilu u lu leka bhulu,

⁶ anga u loka mu dijina dia Nzambi, ió ueniê ni muenhu uê katé ku hádia ni hádia, ua bhanga o diulu ni ima ioso iala-mu, ni oxi ni ima ioso iala-mu, ni musanza ua kalunga ni ima ioso iala-mu. Anju anga i zuela, iexi: Ki kua-ndu kala dingi kukokoloka!

⁷ Maji kioso-phe anju ia kasambuadi ki ia-nda kuxika o koloneta iê, kiene o Nzambi kia-ndu zubha kubhitisa o ima iê ia kasuekèle, uila kia tanga Muène ku jiselevende jê, o jipolofeta.

⁸ O dízui dia tundu ku diulu di ngʼevu, anga ngi dʼivua luamukua dia ngʼambela, dixi: Bhixila, u tambule o divulu dia jikuka bhu lúkuaku lua anju ia tangamana ku musanza ua kalunga ni ku mavu a kukuta a ngongo.

⁹ Eme anga ngi bhixila ku anju, hé ngi mu ambela kuila o kadivulu a ngi bhane-ku. Muène anga u ngi tangela, uixi: Divulu didi tambula-diu, u di die. Diene dia-nda ku ku ludisa mu mala, maji mu kanu-phe di touala kala uiki.

¹⁰ Anga eme ngi tambula o kadivulu bhu lúkuaku lua anju, hé ngi ka dia. Mu kanu nga dʼivu dia touala muene kala uiki. Maji ki nga zubha ku di dia, mu mala mua ngi lulu.

¹¹ Anga a ngʼambela, exi: Eie hanji kua ku xala dingi lumoxi kujimbuila madiembu mavulu, ni ifuẋi, ni madimi, ni jisobha, o Njimbu Iambote ia Nzambi.