Dialuilu 9 - O Mikanda Ikola

Kubhitisa Phasu mu kikangalakata kia Sinai

¹ Jihova anga u ambela Mozé mu kikangalakata kia Sinai, bhu mbeji ia kamoxi, ku muvu ua kaiiadi, kia zubha kutunda mʼoxi ia Ijitu, uixi:

² Anʼa Izalaiele a bhitise Phasu bhu kizuua kiê kioso kia i xindi.

³ Kizuua kia kakuinhi ni kiuana kia mbeji ienʼii, mu kumbi dia ngoloxi, kiene kithangana kia tokala kia kubhitisa phasu; mu i kuata ni ijiia iê ioso, ni ubhitisilu uê uoso, kiene ki mu i bhitisa.

⁴ Kienhiki Mozé u ambela anʼa Izalaiele kuma a bhitise o Phasu.

⁵ Anga a bhitisa muene o Phasu, bhu mbeji ia kamoxi, kizuua kiê kia dikuinhi ni kiuana, mu kumbi dia ngoloxi, mu kikangalakata kia Sinai; kala kia tumu Jihova kua Mozé, anʼa Izalaiele kiene muene kia bhange.

Phasu ia kaiadi ia iá a kambele-bhu ni iá a kexile ni kuxila

⁶ Anga bhu kala mala a kexile ni kuxila mukonda dia kukuata kimbi kia muthu; kiene kia a fudisa kubhitisa Phasu kizuua kienhókio; anga eza kua Mozé ni kua Alá, kizuua kienhókio;

⁷ mala enhá a muambela, exi: Etu tuala ni kuxila mukonda dia kukuata kimbi kia muthu; phalahi-phe ki bhinga ki tu fudisa kubhitisa ujitu ua Jihova bhu kumbi diê dia tokala, kumoxi ni akuetu anʼa Izalaiele?

⁸ Mozé anga ua ambela, uixi: Kingenu, ngʼivue hanji kua Jihova kioso kia-ndu tuma, ku mi ambela.

⁹ Jihova anga u ambela Mozé, uixi:

¹⁰ Tangela anʼa Izalaiele kuma, se bhu kala muthu ku muiji uenu u kala ni kuxila mukonda dia kukuata ku kimbi, mba u kamba kukala ku bhata mukonda dia kuenda njila ia dikanga, kiene kimoxi, ki ki mu fudisa kubhitisa Phasu ia Jihova.

¹¹ A i bhitisa kiá bhu mbeji ia kaiadi, bhu kizuua kiê kia kuinhi ni kiuana, mu kumbi dia ngoloxi; a i dia ni mbolo ia kambe kifulufulu kia felemendu, ni iangu ia lulu.

¹² Ka xie-ku kima katé ki kúkia, ka i bukule kifuba; a i bhitisa muene ni kukuata ijiia ia Phasu.

¹³ Uoso-phe ua zedié, kai mu uenji, maji u fula kubhitisa Phasu, ió muthu ua ku mu batula mu kifuẋi kiê; mukonda ka bhitisa ujitu ua Jihova bhu kizuua kiê kia xindi; muthu ió kituxi ki kala ku thandu diê.

¹⁴ Hé bhu kala nzuángiza ua tungu muʼaxaxi kenu, anga u sola, uixi: Ngi bhitisa uami o Phasu ia Jihova; kabasa u kuata ijiia iê ioso ni ubhitisilu uê uoso ua xindi ku i bhitisa; kijila kiene kimoxi ni ió nzuángiza, ni ió a mu vuala mukuaʼxi.

O Dituta ku thanduʼa Balaka

¹⁵ Kizuua ki emika balaka, dituta dia tula ku thandu dia balaka, balaka iene ia umbangi; kutula mu ngoloxi-phe, ku thandu dia balaka ku diala, kubenha kuê kuila kala túbhia, katé mu kimene.

¹⁶ Izuua ioso kiene; dituta di vungina balaka, ni kubenha kuê kala túbhia mu usuku.

¹⁷ Kioso kia mona dituta dia zangumuka ku balaka, anʼa Izalaiele a di kaiela ni kuenda; kididi kioso ki emana dituta, anʼa Izalaiele bhene bhua a ta kibangu.

¹⁸ Mu kitumu kia Jihova anʼa Izalaiele a katuka, mu kitumu kia Jihova a ta kibangu; kioso kia mona dituta dia tula ku balaka ene a xikama, kʼende.

¹⁹ Né dituta dia tula ku balaka izuua iavulu, anʼa Izalaiele a tumaka kitumu kia Jihova, kʼende.

²⁰ Bhu kala ni bhabha dituta di bhanga ngó tuizuua tuofele ku balaka; ene-phe kia tumu Jihova a kala bhu kibangu, kia tumu Jihova a katuka ni kuenda.

²¹ Bhu kala ni bhabha dituta di tula tundé mu ngoloxi katé mu kimene; se a di mono dia zangumuka mu kimene, a katuka; kixi mu muanha kixi mu usuku, se dituta dia zangumuka a katuka ni kuenda.

²² Se dia tula ku balaka, né di bhanga izuua iiadi, mba mbeji, mba muvu, anga di kala ku thandu diê, anʼa Izalaiele a xikama muene bhu kibangu kiâ, kʼende; se dia zangumuka a katuka ni kuenda.

²³ Mu kitumu kia Jihova a tula, mu kitumu kia Jihova a katuka; a tumaka kioso ki andala Jihova, kala kia tumu Jihova kua Mozé.