Dialuilu 7 - O Mikanda Ikola

Ilamba ia Izalaiele a bheka maujitu mu ku lumbila balaka ni kalatódio

¹ Mu kukala-phe kizuua kia zubha Mozé kuimika o balaka, ua i undu, iú ua i kôlesa, ni imbamba iê ioso, ni kalatódio ni itutu iê; iene ioso ua i undu ni maji, ua i kôlesa;

² kizuua kienhókio, ilamba ia Izalaiele, ene mítue ia mabhata ma jitata jâ, a bhana maujitu. Ene ilamba ia miji a a tele ku pholo mu kubhanga dialuilu;

³ anga a bheka ujitu uâ bhu pholo ia Jihova, makalu masamanu ma bhiti mavunga ku thandu, ni jingombe ja makalu, kuinhi dia ngombe ni kiiadi, kifua ilammba iiadi-iiadi dikalu, kilamba kimoxi-kimoxi; anga a i bheka bhu kanga dia balaka.

⁴ Jihova anga u ambela Mozé, uixi:

⁵ Maujitu iá a tambule, phala a kale ku kikalakalu kia balaka ia kutakanena; u a bhane ku Jilevita, kala kia tokala kikalakalu kia ukunji uâ.

⁶ Kienhiki Mozé anga u tambula o makalu, ni jingombe, hé u a bhana Jilevita.

⁷ Makalu maiadi, ni ngombe jiuana, ua a bhana anʼa Ngelexone, iasoko mu kikalakalu kiâ;

⁸ makalu mauana, ni nake dia ngombe, ua a bhana anʼa Meladi, ia soko mu kikalakalu kiâ; o u talela iene ioso, Itamale dia Alá, o nganga.

⁹ Anʼa Kohate-phe ka a bhana-ku kima, mukonda kikalakalu kiâ o dibhezelu; o imbamba ia tokala-ku a i ambatela bhu isuxi.

¹⁰ Ilamba anga a bhana ue maujitu mû ku lumbila kalatódio, kizuua kia ka undu ni maji, ilamba a bhana maujitu mâ ku pholo ia kalatódio.

¹¹ Jihova anga u ambela, Mozé, uixi: A bhane ujitu uâ, kala muthu ni kizuua kiê, mu ku lumbila kalatódio.

¹² Ua tuama kubhana ujitu uê, kizuua kia dianga, Nasono dia Aminadaba ku muiji ua Juda;

¹³ ujitu uê ua bheka dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu, ni dilonga ni mbasinha iezala fuba ia kábhia iólunge ni maji, ia tokala mubhaku ua mákudia;

¹⁴ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

¹⁵ ni kangombe ka ndumbe ni kilumbe kia mbudi, ni kambudi ka ndumbe ka muvu umoxi, phala sata ia kuoha;

¹⁶ ni kisutu kia hombo phala sata ia kituxi;

¹⁷ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe tua muvu umoxi tutanu; iú uene o ujitu ua bheka Nasono dia Aminadaba.

¹⁸ Kizuua kia kaiadi ua bhana ujitu uê, Netanaiele dia Zuuale, kilamba kia Isakale;

¹⁹ mu ujitu uê ua bheka dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni mbasinha iezala fuba ia kábhia iólunge ni maji, phala mubhaku ua makudia;

²⁰ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

²¹ ni kangombe ka ndumbe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

²² ni kisutu kia hombo kia sata ia kituxi;

²³ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe tua muvu umoxi, tutanu; iú uene o ujitu ua bheka Netanaiele dia Zuuale.

²⁴ Kizuua kia katatu ua bhana ujitu uê, Eliiaba dia Helone, kilamba kia anʼa Nzebulone;

²⁵ o ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni mbasinha iezala fuba ia kábhia iólunge ni maji, phala mubhaku ua mákudia;

²⁶ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

²⁷ ni kangombe ka ndumbe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

²⁸ ni kisutu kia hombo kia sata ia kituxi;

²⁹ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe tua muvu umoxi, tutanu; uene ujitu ua bheka Eliiaba dia Helone.

³⁰ Mu kizuua kia kauana ua bheka ujitu uê, Elizule dia Xedele, kilamba kia anʼa Lubene;

³¹ o uijitu uê ua bheka, dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni basiia iezala fuba ia uabha kiambote, (ia fina), iólunge ni maji, phala mubhaku ua mákudia;

³² ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

³³ ni kangombe ka ndumbe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

³⁴ ni kisutu kia hombo kia sata ia kituxi,

³⁵ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe, tua muvu umoxi, tutanu, uene ujitu ua bheka Elizule dia Xedele.

³⁶ Mu kizuua kia katanu ua bheka ujitu uê Xelumiiele dia Nzudixadai, kilamba kia anʼa Ximinhá;

³⁷ o ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni basiia ia phalata, kienemenu kiê makuinhi sambuadi a xikulu, xikulu iene ia dibhezelu; ni dilonga ni basiia iezala fuba ia uabha kiambote iólunge ni maji, phala mubhaku ua mákudia;

³⁸ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

³⁹ ni kamgombe ka ndumbe, ni kilumbe kia mbudi, ni kambudi ka ndumbe, ka muvu umoxi, phala sata ia kuoha;

⁴⁰ ni kisutu kia hombo kia sata ia kituxi;

⁴¹ o ia jisata ja mutululuku, ngombe jiiadi, ilumbe itanu; isutu ia jihombo itanu, tumbudi tua ndumbe tua muvu umoxi, tutanu; iú uene o ujitu ua bheka Xelumiiele dia Nzudixadai.

⁴² Mu kizuua kia kasamanu ua bheka ujitu uê, Eliiazafu dia Deuele, kilamba kia anʼa Ngade;

⁴³ O ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni basiia ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni basiia iezala fuba ia uabha kiambote iólunge ni maji, phala mubhaku ua mákudia;

⁴⁴ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

⁴⁵ ni kangombe ka ndumbe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

⁴⁶ ni kisutu kia hombo kia sata ia kituxi;

⁴⁷ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe, tua muvu umoxi, tutanu; uene ujitu ua bheka Eliiazafu dia Deuele.

⁴⁸ Kizuua kia kasambuadi ua bheka ujitu uê, Elixama dia Amihudi, kilamba kia anʼa Ifalaíme;

⁴⁹ ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni basiia ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni basiia iezala fuba ia uabha kiambote iólunge ni maji, phala mubhaku ua mákudia;

⁵⁰ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

⁵¹ ni kangombe ka ndumbe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

⁵² ni kisutu kia hombo kia sata ia kituxi;

⁵³ o ia jisata ja mutululuku ngombe jiiadi, ilumbe itanu, isutu ia jihombo itanu, tumbudi tua ndumbe tua muvu umoxi, tutanu; uene ujitu ua bheka Elixama dia Amihudi.

⁵⁴ Kizuua kia kanake ua bheka ujitu uê, Ngamadiiele dia Pedazule, kilamba kia anʼa Manasa;

⁵⁵ o ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni basiia ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni basiia iezala fuba ia uabha kiambote iólunge ni maji, phala mubhaku ua mákudia;

⁵⁶ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

⁵⁷ ni kangombe ka ndumbe, ni kilumbe kia mbudi, ni kambudi ka ndumbe, ka muvu umoxi, phala sata ia kuoha;

⁵⁸ ni kisutu kia hombo kia sata ia kituxi;

⁵⁹ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe, tua muvu umoxi, tutanu; uene o ujitu ua bheka Ngamadiiele dia Pedazule.

⁶⁰ Kizuua kia kavua ua bheka ujitu uê, Abidani dia Ngidiioni, kilamba kia anʼa Bejamí;

⁶¹ ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni mbasinha iezala fuba ia uabha kiambote iólunge ni maji, phala mubhaku ua mákudia;

⁶² ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

⁶³ ni kangombe ka ndumbe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

⁶⁴ ni kisutu kia hombo kia sata ia kituxi;

⁶⁵ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe, tua muvu umoxi, tutanu; uene o ujitu ua bheka Abidai dia Ngidiione.

⁶⁶ Mu Kizuua kia kakuinhi ua bheka ujitu ué Ahiiezele dia Amixadai, kilamba kia anʼa Dane;

⁶⁷ ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni mbasinha iezala fuba ia uabha kiambote iólumbe ni maji, phala mubhaku ua mákudia;

⁶⁸ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

⁶⁹ ni kangombe, ni kilumbe kia mbudi, ni kambudi ka ndumbe ka muvu umoxi, phala sata ia kuoha;

⁷⁰ ni kisutu kia hombo kia sata ia kituxi;

⁷¹ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe, tua muvu umoxi, tutanu; uene o ujitu ua bheka Ahiiezele dia Amixadai.

⁷² Kizuua kia kuinhi ni kamoxi ua bheka ujitu uê, Pajiiele dia Okolane, kilamba kia anʼa Asele;

⁷³ o ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni mbasinha iezala fuba ia uabha kiambote iólunge ni maji, phala mubhaku ua mákudia;

⁷⁴ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

⁷⁵ ni kangombe ka ndumbe, ni kilumbe kia mbudi, ni kambudi ka ndumbe, ka muvu umoxi, phala sata ia kuoha;

⁷⁶ ni kisutu kia hombo kia sata ia kituxi;

⁷⁷ o ia jisata ja mutululuku, ngombe jiiadi, ilumbe itanu, isutu ia jihombo itanu, tumbudi tua ndumbe, tua muvu umoxi, tutanu; uene ujitu ua bheka Pajiiele dia Okolene.

⁷⁸ Mu Kizuua kia kuinhi ni kiiadi ua bheka ujitu uê Ahila dia Inane, kilamba kia anʼa Nafitali;

⁷⁹ ujitu uê ua bheka, dilonga dia phalata, kinemenu kiê hama ia xikulu ni makuinhi atatu, ni mbasinha ia phalata, kinemenu kiê makuinhi sambuadi a xikulu, xikulu iene ia dibhezelu; ni dilonga ni mbasinha iezala fuba ia uabha kiambote iólunge ni maji, phala mubhaku ua mákudia;

⁸⁰ ni ngutu imoxi ia ulu, kinemenu kiê kuinhi dia xikulu, iezala uasu ua dizumba;

⁸¹ ni kangombe ka ndumbe, ni kilumbe kia mbudi, ni kambudi ka ndumbe, ka muvu umoxi, phala sata ia kuoha;

⁸² ni kisutu kia hombo kia sata ia kituxi;

⁸³ o ia jisata ja paze, ngombe jiiadi, ilumbe itanu, isutu ia jihombo itanu, tumbudi tua ndumbe, tua muvu umoxi, tutanu; uene o ujitu ua bheka Ahila dia Inane.

⁸⁴ Iú uene ujitu ua kalatódio, ua ku lumbila, kizuua kia ka undu ni maji, ujitu ua bhana ilamba ia Izalaiele: Kuinhi dia malonga ni kiiadi a phalata, kuinhi dia jimbasinha ni kiiadi ja phalata, kuinhi dia ngutu ni jiiadi ja ulu;

⁸⁵ dilonga dimoxi kinemenu kiê hama ia xikulu ni makuinhi atatu, mbasinha imoxi makuinhi sambuadi a xikulu; phalata ioso ia malonga ni jimbasinha, midi jiiadi ja xikulu ni hama jiuana, xikulu iene ia dibhezelu;

⁸⁶ kuinhi dia ngutu ni jiiadi ja ulu, jezala uasu ua dizumba; ngutu imoxi, kinemenu kiê kuinhi dia xikulu, xikulu iene ia dibhezelu; ulu uoso ua jingutu ua tena hama ia xikulu ni makuinhi aiadi;

⁸⁷ ngombe joso ja sata ia kuoha, kuinhi dia ngombe ni jiiadi, kuinhi dia ilumbe ni kiiadi, kuinhi ni kiiadi dia tumbudi, tua muvu umoxi, ni mubhaku uâ ua mákudia, ni isutu ia jihombo ia jisata ja kituxi, kuinhi ue ni kiiadi;

⁸⁸ ni jingombe joso ja jisata ja paze, makuinhi aiadi a ngombe ni kiuana, ilumbe ia jimbudi makuinhi asamanu, o isutu ia jihombo makuinhi asamanu, tumbudi tua muvu umoxi ue, makuinhi asamanu. Uene ujitu ua kalatódio ua ku lumba, kia zubha ku ka unda ni maji.

⁸⁹ Mozé kioso kia bokona jinga mu balaka ia kutakanena mu kuzuela ni Jihova, uívua dízui di mu zuelesa, di tunda ku kibhuna kia kiadi kiala ku thandu dia álaka ia umbangi, bhu kaẋi ka xelube jiiadi; kienhiki kiene kia mu zuelesa jinga.