Dialuilu 6 - O Mikanda Ikola

Kijila kia unazilé

¹ Jihova anga u ambela Mozé, uixi:

² Ambela anʼa Izalaiele, u a tangela, kuma: Hé diiala mba muhatu u ta hasa, hasa ia Nazilé, ia ku di lumbila kua Jihova,

³ ki kale ku vinhu u batuka-ku ni kúnua kuoso ku kodiuisa; ka nu Mvindangele ia vinhu, mba mvindangele ia kúnua kuengi ku kodiuisa; ka nu menha ma jiuva, ka di jiuva jene, né jauisu né jakukuta.

⁴ Izuua ioso ia bhanga ku unazilé ka di kima ki tunda ku muvide, tundé ku mbutu iê moxi katé ku iangu iê ku kanga.

⁵ Izuua ioso ia hasa iê ia unazilé ki ku bhiti phoko ia bhutu ku mútue uê; katé kia kà-bhua izuua ioso ia di lumbila kua Jihova, u kala muthu ukôla; kindemba kiê ku mútue u kieha, ki lebha.

⁶ Izuua ioso ia di lumbila kua Jihova, ka zukame ku kimbi.

⁷ Ka di kasanesa mukonda dia tatʼâ, né kiá mamʼâ, né kiá phange iê ia diiala mba ia muhatu, se a fu; kuma ua di kalela, o hasa iê ia te ia ku di lumbila kua Nzambi ia mu kala ku mútue.

⁸ Izuua ioso ia di lumbila, u kala muthu ukôla ua Jihova.

⁹ Hé muthu u ẋikuka ngó nʼa fuila bhu kinama kiê, kua muiza kukasana ku mútue uê ua ku di lumba; ki kale u bhuta mútue kizuua kiê kia ku di zelesa; kizuua kia kasambuadi kiene kia bhuta o mútue.

¹⁰ Mu kizuua kia kanake u bheka tumembe tuiadi, mba tuphomba tuiadi, kua nganga bhu muelu ua balaka ia kutakanena;

¹¹ nganga anga u bhana kamoxi ku sata ia kituxi, ni kamukuá ku sata ia kuoha, mu ku mu bhuisa ikuma, mukonda ua te kituxi mu takana ni kimbi, anga u zelesa dingi mútue uê kizuua kienhókio.

¹² Anga u di lumbila kua Jihova luamukuá dingi, u bhanga izuua iê ia unazilé, u bheka kilumbe kia mbudi, kia muvu umoxi ku sata iê ia kuêla; o izuua ia dianga kubhanga-phe, i aie ngó; mukonda mu kaẋi ka ku di lumba, mua muiza ku kasana.

¹³ Kijila kia nazilé-phe kienhiki, izuua ia ku di lumba kuê se ia tena. A mu bheka bhu muelu ua balaka ia kutakanena;

¹⁴ anga u bhana ujitu uê kua Jihova, kilumbe kia mbudi kia muvu umoxi sé ngó dixaka, kia sata ia kuoha, ni mbudi ia mukaji ia muvu umoxi sé ngó dixaka, ia sata ia kituxi, ni kilumbe sé ngó dixaka, kia sata ia paze,

¹⁵ ni kinda kia jimbolo ja kambe kifulufulu kia felemendu, ni makende ma fuba ia kábhia iòtoxe kiambote iólunge ni maji, ni jibolaxa ja tolo mukômo jóuese ni maji, ni mubhaku ua mákudia ni ua makunua.

¹⁶ Nganga anga u i bheka ioso bhu pholo ia Jihova, u bhana sata iê ia kituxi, u bhana sata iê ia kuoha.

¹⁷ U bhana ue kilumbe kia sata ia mutululuku ia satela Jihova, ni kinda kia jimbolo ja kambe kifulufulu kia kinanesa; nganga anga u bhana ue mubhaku ua mákudia ni mubhaku ua mákunua.

¹⁸ O nazilé-phe u bhuta mútue uê ua unazilé, bhu muelu ua balaka ia kutakanena, o kindemba kia tundu ku mútue uê ua unazilé anga u ki ta mu túbhia tuala kuoha o sata ia mutululuku.

¹⁹ Nganga anga u katula kinama kia kilumbe, kia lukuaku, kiolambe, ni mbolo imoxi mu kinda ia kambe kifulufulu kia kinanesa, ni bolaxa imoxi ia mukômo uófele, anga u i ta bhu maku a nazilé, kioso kia zubha kubhuta mútue uê ua unazilé;

²⁰ nganga anga u i bhuka bhu pholo ia Jihova, kuma sata ia kubbukila, i kala-phe ujitu uangene ua nganga, kumoxi ni thulu ia sata ia kubhukila, ni kinamá kia ʼkuaku lua xitu ioso ia sata ia kuzangumuna. Se ua zubha kubhanga kiki, nazilé kiene kiua kia tena kúnua o vinhu.

²¹ Kiki kiene o kijila kia nazilé ua te hasa, ni ujitu uê ua tokala kubheka ua ku di lumbila kua Jihova; u ta-ku dingi se ua tena kulenda kima; kioso kia tange mu hasa jê, kiene kia kaiela mu ku di lumba.

Kioso kia fuama kubhana kizediuise ku anʼa Izalaiele

²² Jihova anga u ambela Mozé, uixi:

²³ Ambela Alá ni anʼê kuma: Kienhiki ki mu bhana jinga kizediuise ku anʼa Izalaiele, ni kuila:

²⁴ Jihova a ku zediuise, a ku lange;

²⁵ Jihova a ku muikine ni kubenha kua pholo iê, a ku kuatele henda;

²⁶ Jihova a bhetule pholo iê ku thandu dié, a ku bhane o kutululuka.

²⁷ Kienhiki kiene ki mu ta jinga dijina diami ku thandu dia anʼa Izalaiele; eme ni ngʼa zediuise.