Dialuilu 4 - O Mikanda Ikola

Ikalakalu ia Jilevita

¹ Jihova anga u ambela Mozé ni Alá, uixi:

² Bhanga dialuilu dia anʼa Kohate muʼaxaxi ka anʼa Levi, mu kuvuadiua kuâ ni ku mabhata ma jitata jâ,

³ tundé mu makuinhi atatu a muvu katé mu makuinhi atanu a muvu, oso a fuama ukuenze ua kikalakalu kia balaka ia kutakanena.

⁴ Kikalakalu-phe kia anʼa Kohate kienhiki mu balaka ia kutakanena, ku imbamba ikôla kinène.

⁵ O kilombo hé kia-ndu katuka mu kuenda, Alá ni anʼê a tuama kubokona, a tulula dibeka dia kibatulu, a di futa ku álaka ia umbangi;

⁶ a ta-ku dingi divunga dia ibha ia njimbu, o ku thandu a vungina-ku thanga ia azulu ioso, hé a ta-ku o mikambu iê.

⁷ O ku meza a kilumbu kuala o jimbolo ja sata, a futa-ku ue thanga ia azulu, a ta ku thandu diê malonga ni jingutu ni jímbia ni jinganza ja kulunduluila; ni mbolo iabhingi ki iene kukamba dingi, kuene ku i kala;

⁸ anga a futa-ku thanga ia husu, ni divunga dia ibha ia njimbu, hé a ta-ku ni mikambu iê.

⁹ A kuata ue thanga ia azulu a futa ku kaxtisale ka dimuikinu, ni jikandeia jê, ni itokelu ia kutoka na-iu, ni ijiminu, ni itutu ia maji, ioso ia tokala ku kikalakalu kiê;

¹⁰ tudilu diê ni imbamba iê ioso a i ta mu divunga dia ibha ia njimbu, anga a i ta ku mikambu.

¹¹ Ku kalatódio ka ulu ue a futa-ku thanga ia azulu, a ta ni divunga dia ibha ia njimbu, hé a ta-ku ni mikambu iê;

¹² imbamba ioso ue ia kikalakalu, iene kukalakela na-iu mu dibhezelu, a dianga ku i ta mu thanga ia azulu, a i ta dingi divunga dia ibha ia njimbu, hé a i ta mikambu ia kuambatela.

¹³ Kalatódio a ka komba hanji o uthôkua uê, a ka futa thanga ia hundu;

¹⁴ a ta ku thandu diê imbamba iê ioso iene kukalakela na-iu ku kalatódio, ni iomuenu ia kuambatela túbhia, ni jingouele ja kukuata xitu, ni jipá ni jimbasinha, imbamba iê ioso kiá; anga a ta-ku divunga dia ibha ia njimbu, hé a ta-ku ni mikambu iê.

¹⁵ Kioso Alá ni anʼê kia kà zubha kuvunga ku imbamba ioso ia dibhezelu, kilombo kuila kia-nda kukatuka kiá, kiene kiua kiʼza anʼa Kohate mu ku i zangula; ima iene ikôla-phe ka i kuate ni maku, phala ka fue. Ima iii iene kimbamba kia anʼa Kohate ku balaka ia kutakanena.

¹⁶ Kimbamba kia Eliiazale dia Alá, nganga, o maji a dimuikinu, ni uasu ua uabha dizumba, ni mubhaku ua makudia ua bhingi ki uene kukamba-ku dingi, ni maji a kuundila, ni kutambula konda ia balaka ni ima ioso iala-mu, ni dibhezelu ni ima ioso iatokala-ku.

¹⁷ Jihova anga u ambela Mozé ni Alá, uixi:

¹⁸ Muiji ua mabhata ma anʼa Kohate, kana ku a batula mu kibuka kia Jilevita;

¹⁹ inda mu a bhanga kiki, phala a laie, ka fue, kia bhixila mu kuzangula o imbamba ikôla kinène: Alá ni anʼê ene a tuama o kubokona, hé a a uanena muthu ni muthu ni kikalakalu kiê, ni kimbamba kiê,

²⁰ ene-phe ka tuame kubokona mu dibhezelu, nʼa mone kioso ki a ta imbamba ikôla mu mavunga, phala ka fue.

²¹ Jihova anga u ambela dingi Mozé, uixi:

²² Soneka ue anʼa Ngelexone, ku mabhata ma jitata jâ, ni mu kuvuadiua kuâ;

²³ tundé mu makuinhi atatu a muvu katé ku makuinhi atanu a muvu, u a alula oso a fuama ku ukuenze ua kikalakalu kia balaka ia kutakanena.

²⁴ Kikalakalu kia dibhata dia anʼa Ngelexone kienhiki, ni mu kukalakala ni mu kuambata imbamba:

²⁵ Ene ambata jikulutina ja balaka, ni balaka ia kutakanena, ni jithanga jê ku thandu, ni divunga dia ibha ia njimbu, ni dibeka dia muelu ua balaka ia kutakanena,

²⁶ ni jikulutina ja lumbu, ni dibeka dia muelu ua lumbu lua kondoloka balaka ni kalatódio i kala mu kaẋi, ni mikolo iê, ni ingolongondo ia kikalakalu kiê kioso kia tokala ku ki bhanga ku ima ioso iii, ene kiene o kikalakalu kiâ.

²⁷ Mu kitumu kia Alá ni anʼê, muene mu kalakela anʼa Ngelexone, mu imbamba iâ ni mu kikalakalu kiâ; enu mu a uanena o imbamba ioso iambata.

²⁸ Kiene kikalakalu kia mabhata ma anʼa Ngelexone mu balaka ia kutakanena; u a kala ku pholo ni ku a tambula konda muene Itamale dia Alá, o nganga.

²⁹ O ki uiza ku anʼa Meladi, u a bhanga ue dialuilu mu kuvuadiua kuâ ni ku mabhata ma jitata jâ;

³⁰ tundé mu makuinhi atatu a muvu katé ku makuinhi atanu a muvu, u a alula oso a fuama ku ukuenze ua kikalakalu kia balaka ia kutakanena.

³¹ Kimbamba kiâ—phe kiki mu kukalakala kuâ ku balaka ia kutakanena: O jingunji ni mikangala iê, ni jiphiladi ni ibaka iê,

³² ni jiphiladi ja lumbu lua kondoloka, ni ibaka iê, ni jiphapha, ni mikolo, ni ingolongondo ioso ia tokala ku kikalakalu kiê; mu a uanena muthu ni muthu ni kimbamba kiê.

³³ Kiene o kikalakalu kia mabhata ma anʼa Meladi ku balaka ia kutakanena, u a kala ku pholo ni ku a tambula konda muene Itamale dia Alá, o nganga.

³⁴ Ni Mozé ni Alá ni ilamba ia kilômbo, anga a bhanga dialuilu dia anʼa Kohate mu kuvuadiua kuâ ni mabhata ma jitata jâ;

³⁵ tundé mu makuinhi atatu a muvu katé ku makuinhi atanu a muvu,

³⁶ oso a fuama ukuenze ua kikalakalu kia balaka ia kutakanena;

³⁷ enhá ene a alula ku mabhata ma anʼa Kohate, phala kukalakela ku balaka ia kutakanena, kuala Mozé ni Alá a alula, kala kia tumu Jihova kua Mozé.

³⁸ Iá a a bhange dialuilu ku anʼa Ngelexone, mu kuvuadiua kuâ ni ku mabhata ma jitata jâ,

³⁹ tundé mu makuinhi atatu a muvu katé ku makuinhi atanu a muvu, oso a fuama ukuenze ua kikalakalu kia balaka ia kutakanena;

⁴⁰ ene-oso-phe a alula mu kuvuadiua kuâ ni ku mabhata ma jitata jâ, a tena midi jiiadi, ni hama jisamanu, ni makuinhi atatu a muthu.

⁴¹ Enhá, a alula ku mabhata mâ anʼa Ngelexone, phala kukalakela ku balaka ia kutakanena, kuala Mozé ni Alá a alula, kala kia tumu Jihova kua Mozé.

⁴² Iá a a bhange dialuilu ku mabhata ma anʼa Meladi, mu kuvuadiua kuâ ni ku mabhata ma jitata jâ,

⁴³ tundé mu makuinhi tatu a muvu katé ku makuinhi atanu a muvu, oso a fuama ukuenze ua kikalakalu kia balaka ia kutakanena;

⁴⁴ ene-phe a a xindi ku mabhata mâ, a tena midi jitatu, ni hama jiiadi.

⁴⁵ Enhá, a alula ku mabhata ma anʼa Meladi, kuala Mozé ni Alá a alula, kala kia tumu Jihova kua Mozé.

⁴⁶ Ene osoʼá a a bhange dialuilu ku Jilevita, kuala Mozé ni Alá ni ilamba ia Izalaiele, mu kuvuadiua kuâ ni ku mabhata ma jitata jâ;

⁴⁷ tundé mu makuinhi atatu a muvu katé ku makuinhi atanu a muvu, oso a fuama ukuenze ua kikalakalu, ni kuambata imbamba ia balaka ia kutakanena;

⁴⁸ ene oso-phe a alula, a tena nake dia midi, ni hama jitanu, ni makuinhi nake.

⁴⁹ Mu kitumu kia Jihova, a alula, kuala Mozé, ni ku a uanena ikalakalu iâ ni imbamba iâ, enʼió mudiâ a alula kienhiki, kala kia tumu Jihova kua Mozé.