Dialuilu 34 - O Mikanda Ikola

¹ Jihova anga u ambela dingi Mozé, uixi:

² Tuma anʼa Izalaiele, u a ambela, kuma: Kioso ki mu bhiẋila mʼoxi ia Kanana, kuma iene ixi i mua-nda kulundula, ixi iii, ia Kanana, jimbambe jê jenhiji:

³ Mbambe ienu ia sulu i tunda mu kikangalakata kia Zini, i kunga bhu mbandu ia Idomo, mbambe ienu ia sulu anga i tunda bhua suku o Kizanga kia Môngua ku thunda, ku mutundila-kumbi,

⁴ anga i bhita ku sulu bhu Phaka ia Akalabini, i bhita katé bhu Zini, Kadexi-Beneia mu mu xia ku sulu, iii-ióio bhu Hazale-adula, katé bhu Azemone;

⁵ i kondoloke mu sulu ia Azemone, hé i bhiẋila mu honga ia Ijitu, bhenhobho i kuate kiá ni honga ia Ijitu katé ku ndundu ia Kalunga.

⁶ Mbambe ku luiji, o Kalunga Ka Dikota, ndundu iê iene mbambe ienu ia luiji.

⁷ Mbambe ienu ku suku ienhiʼii: I tunda mu Kalunga Ka Dikota tulé ku mulundu ua Hole;

⁸ ku tunda bhu mulundu ua Hole, mu xinda dingi katé bhu dibokuenu dia Hamate, o mbambe iii i tundila katé mu Zedade;

⁹ anga iia ia kuata dingi bhu Zefelone tulé bhu Hazale-enane; iene mbambe ienu ia ku suku.

¹⁰ Mu xinda dingi mbambe ienu ia thunda, i tunda bhu Hazale-enane, i kuata katé bhu Xefame.

¹¹ Bhu Xefame i kulumuka katé bhu Dibalah; Aime ua xalela ku luiji, anga i kulumuka dingi, i di kunga ni Kizanga Kia Kinelete ku mbandu iê ia thunda;

¹² bhu Aime anga i kulumuka ue ni Njolodá katé ku Kalunga Ka Môngua. Iene ixi ienuʼiii mu jimbambe jê, kala kia i xindi.

¹³ Mozé anga u bhana ngonge ku anʼa Izalaiele, uixi: Ixi iii iene i mu lundula mu Sorte, ia tumu Jihova kuuanena dívua dia muiji ni mbandu;

¹⁴ kuma muiji ua anʼa Lubene, ku mabhata mâ ma jitata jâ, ni muiji ua anʼa Ngade, ku mabhata mâ ma jitata jâ, a tambula kiá; ni mbandu ia muiji ua Manasa, a tambula kiá undundu uâ;

¹⁵ miji iiadi ni mbandu ia muiji a tambula kiá undundu uâ, ku sámbua dia Njolodá, sámbua dia lulama ni Jedikó, ku mbandu ia thunda ku tundila o dikumbi.

Athu a tokala kuuana o ixi

¹⁶ Jihova anga u zuela dingi kua Mozé, uixi:

¹⁷ Majina, enhá, a athu a tokala ku mi uanena ixi ia undundu uenu. Nganga Eleazale, ni Josuué dia Nune.

¹⁸ Mu kuata ue kilamba kimoxi ku muiji ni muiji, mu kuuana ixi ia undundu uenu.

¹⁹ Mala-phe, enhá majina mâ: Ku muiji ua Juda, Kalebe dia Jefune.

²⁰ Ku muiji ua anʼa Ximinhá, Samuuele dia Amihudi.

²¹ Ku muiji ua Bejamí, Elidade dia Kixilone.

²² Ku muiji ua anʼa Dane, kilamba Buki dia Jokidi.

²³ Ku anʼa Zuze, muiji ua anʼa Manasa, kilamba Haniiele dia Efodi.

²⁴ Ku muiji ua anʼa Ifalaíme, kilamba Kemuuele dia Sifitane.

²⁵ Ku muiji ua anʼa Nzebulone, kilamba Elizafane dia Palanake.

²⁶ Ku muiji ua anʼa Isakale, kilamba Palatiiele dia Azana.

²⁷ Ku muiiji ua anʼa Asele, kilamba Ahiude dia Selomi.

²⁸ Ku muiji ua anʼa Nafitali, kilamba Pedahele dia Amihudi.

²⁹ Enhá a a tumu kuala Jihova, kuuanena anʼa Izalaiele undundu uâ, mʼoxi ia Kanana.