Dialuilu 33 - O Mikanda Ikola

Jinjila tundé mu Ijitu katé ku Mouabhe

¹ Jiji jene jinjila ja anʼa Izalaiele, a tunda mu Ijitu, mu ilombo iâ, mu kitumu kia Mozé ni Alá.

² Mozé anga u soneka ididi iâ ia kukatuka ni ia kutula, kala kia mu tumu Jihova; iene-phe iii, kioso kiende jinjila jâ.

³ Mu katuka-ke a tunda mu Lameseji bhu mbeji ia kamoxi, kizuua kiê kia kakuinhi ni kitanu; a zekele ni kúdia Phasu, o ki kuaki anʼa Izalaiele a tunda ni lukuaku lua undanda, ku mesu a akua Ijitu oso,

⁴ kioso akua Ijitu kiala mu funda anʼa phande-kumbi a a beta kuala Jihova mu kaẋi kâ; katé ni jinzambi jâ, Jihova ua ji elêsa.

⁵ Anʼa Izalaiele anga a tunda bhu Lameseji, a te kibangu bhu Sukote.

⁶ Kutunda bhu Sukote a ta kibangu bhu Etanu, bhene bhu mbambe ni kikangalakata.

⁷ Kutunda bhu Etanu edi kala a vutuka kuema katé bhu Pi-hahilote, bhua lulama ni Baale-Zefone; anga a ta kibangu bhu Mingidole.

⁸ Anga a tunda bhu Hahilote, a bhita mu kaii ka menha a kalunga, a bokona mu kikangalakata; anga enda izuua itatu mu kikangalakata kia Etanu, a ta kibangu bhu Mahala.

⁹ Kutunda bhu Mahala a tula bhu Elime; o bhu Elime bhene bhuala kuinhi dia fiẋi ni kiiadi ja menha, ni makuinhi sambuadi a maie; anga a ta-bhu kibangu kiâ.

¹⁰ Kutunda bhu Elime a ta kibangu bhu mbandu ia Kalunga Kakusuka.

¹¹ Kutunda bhu Kalunga Kakusuka a ta kibangu mu kikangalakata kia Sine.

¹² Kutunda mu kikangalakata kia Sine, kibangu bhu Dofoka.

¹³ Kutunda bhu Dofoka, kibangu bhu Aluzu.

¹⁴ Kutunda bhu Aluzu, kibangu mu Lefidimi, mua sange kana-mu menha a kikuẋi kúnua.

¹⁵ Kutunda mu Lefidimi, a ta kibangu mu kikangalakata kia Sinai.

¹⁶ Kutunda mu kikangalakata kia Sinai, kibangu a ki ta bhu Kiboloto-hatava.

¹⁷ Kutunda bhu Kiboloto-hatava, kibangu bhu Hazelote.

¹⁸ Kutunda bhu Hazelote, kibangu bhu Kitima.

¹⁹ Kutunda bhu Kitima, kibangu bhu Kimone-peleze.

²⁰ Kutunda bhu Kimone-peleze, kibangu bhu Libina.

²¹ Kutunda bhu Libina, kibangu bhu Diza.

²² Kutunda bhu Diza, kibangu bhu Kahelata.

²³ Kutunda bhu Kahelata, kibangu mu mulundu ua Safele.

²⁴ Kutunda mu mulundu ua Safele, kibangu bhu Halada.

²⁵ Kutunda bhu Halada, kibangu bhu Makelote.

²⁶ Kutunda bhu Makelote, kibangu bhu Tahate.

²⁷ Kutunda bhu Tahate, kibangu bhu Tela.

²⁸ Kutunda bhu Tela, kibangu bhu Mitika.

²⁹ Kutunda bhu Mitika, kibangu bhu Haximona.

³⁰ Kutunda bhu Haximona, kibangu bhu Moselote.

³¹ Kutunda bhu Moselote, kibangu bhu Bene-jakane.

³² Kutunda bhu Bebe-jakane, kibangu bhu Hole-hakidade.

³³ Kutunda bhu Hole-hakidade, kibangu bhu Jotobata.

³⁴ Kutunda bhu Jotobata, kibangu bhu Abolona.

³⁵ Kutunda bhu Abolona, kibangu bhu Enzone-ngabele.

³⁶ Kutunda bhu Enzone-ngabele, kibangu mu kikangalakata kia Zini (bhene-phe bhu Kadexi).

³⁷ Kutunda bhu Kadexi, kibangu mu mulundu ua Hole, bhene bhu mbambe ia ixi ia Idomo.

³⁸ Nganga Alá anga u banda mu mulundu ua Hole, kala kia mu tumu Jihova, anga u fuila momo, makuinhi auana a muvu a tena tundé kia tunda anʼa Izalaiele mu Ijitu, bhu mbeji ia katanu, kizuua kiê kia kamoxi.

³⁹ Alá u kala mu hama ia muvu ni makuinhi aiadi niʼtatu, kia fuila mu mulundu ua Hole.

⁴⁰ Mukua Kanana, sobha ia Alade, ua tungu mu Sulu, mʼoxi ia Kanana, anga uívua muala kuijiia anʼa Izalaiele.

⁴¹ Kutunda mu mulundu ua Hole, kibangu bhu Zalamona.

⁴² Kutunda bhu Zalamona, kibangu bhu Punone.

⁴³ Kutunda bhu Punone, kibangu bhu Obote.

⁴⁴ Kutunda bhu Obote, kibangu bhu tulundu tua Abadimi, bhu mbambe ia Mouabhe.

⁴⁵ Kutunda bhu Ijimi, bhu tumilundu tua Abadimi, kibangu bhu Dibone-ngadi.

⁴⁶ Kutunda bhu Dibone-ngadi, kibangu bhu Alumone-Dibalataimi.

⁴⁷ Kutunda bhu Alumone-Dibalataimi, kibangu mu milundu ia Abadimi, bhua lulama ni Nebu.

⁴⁸ Kutunda mu milundu ia Abadimi, kibangu a ki ta mu dinhana dia Mouabhe bhu mbandu ia Njolodá, sámbua dia lulama ni Jedikó.

⁴⁹ Kibangu-phe kia bhu mbandu ia Njolodá, ki tunda bhu Bete-jeximote katé bhu Abele-xitimi, mu dinhana dia Mouabhe.

Nzambi u tuma kukaiesa akua-xi mu Kanana

⁵⁰ Jihova anga u ambela Mozé, mu dinhana dia Mouabhe, bhu mbandu ia Njolodá, sámbua dia lulama ni Jedikó, uixi:

⁵¹ Ambela anʼa Izalaiele, u a tangela, kuma: Kioso ki mu zaúka Njolodá, hé mu bokona mu ixi ia Kanana,

⁵² akua-xi momo, mua kà a kaiesa oso bhu pholo ienu, iteka iâ ia matadi mu i bula, iteka iâ ia utadi uóuiẋike mu i bhuisa-bhu, matala mâ ma mahamba mu a sengulula;

⁵³ ixi mu i bua muene, mu tunge momo; kuma eme muene nga mi bhana-iu ku i vua.

⁵⁴ Ixi mu i lundula ni kuta jisorte mu mabhata menu; avulu, undundu uâ u kala kota, atolo, undundu uâ u kala ndenge; muthu kioso kibatu ki mu bhana o hasa iê, kiene kia tambula; mu miji ia jitata jenu, kiene ki mu lundula.

⁵⁵ Maji akua-xi-phe, ki mu fula o ku a kaiesa, ku pholo ku muia, oso mua ehela-mu, a kà di bhanga kala minha mu mesu enu, jisongo mu jimbanji, à kʼenda ni ku mi tatesa, mʼoxi i mua tungu.

⁵⁶ Ku izuua-phe kioso ki ngambele ku a bhanga-kiu ene, ki bhinga ngi mi bhanga-kiu enu.