Dialuilu 31 - O Mikanda Ikola

Toluelu dia akua Midiiane

¹ Jihova anga u ambela Mozé, uixi:

² Vutula phonzo ia anʼa Izalaiele kua akua Midiiane; o ki u zubha ku ki bhanga, a ku bhongolola kuàia malembʼé.

³ Mozé anga u ambela kifuẋi, uixi: Makuenze muʼaxaxi kenu, a maneke kuia ku ita, kúlua ni akua Midiiane, ku a futa phonzo ia Jihova.

⁴ Ku muiji kutunda midi, ku muiji kutunda midi, ku miji ioso ia Izalaiele, ni mu a tume ku ita.

⁵ Kala kiki, a bhana athu a tundu ku jimidi ja Izalaiele, muiji midi, muiji midi, kifua ene oso a tena kuinhi dia midi ni midi jiiadi a maneka mu kuia ku ita.

⁶ Mozé anga ua tuma ku ita, muiji midi muiji midi, ni Finehase dia Eleazale, nganga, uila-nâ kumoxi, uambata imbamba ia dibhezelu ni jikoloneta ja kuxika dízui dia kusolomoka, ua ji kuata bhu maku.

⁷ Anga a lua ni Midiiane, kala kia tumu Jihova kua Mozé, hé a jibha-ku mala oso.

⁸ Jisobha ja Midiiane anga a ji jibhila kumoxi ni athu amukuá afu: ni Evi, ni Lekeme, ni Zule, ni Hule, ni Leba, jisobha jitanu ja Midiiane, ni Balamu dia Beola ue a mu jibha ni xibhata.

⁹ Anʼa Izalaiele anga ambata ahatu a Midiiane ni anʼâ kuma jihutile ja ita; ambata ue ni ibhanga iâ, ni ilumbe, ni jimbongo jâ joso, kuma mbole ia ita.

¹⁰ Jimbonge jâ joso ja tungu, ni mabhata mâ, ni ibangu iâ ioso, a ita mu túbhia.

¹¹ Anga a tambula imbamba ioso ia bhundu, ni jihutile joso ja athu ni ibhaku.

¹² Anga a i bheka, ni imbamba, ni athu, ni ibhaku, kua Mozé ni kua nganga Eleazale, ni ku kilômbo kioso kia anʼa Izalaiele, bhu kibangu mu dinhana dia Mouabhe, bhu mbandu ia Njolodá sámbua dia lulama ni Jedikó.

O kubonza masoladi

¹³ Ni Mozé, ni nganga Eleazale, ni ilamba ioso ia kilômbo, a tunda bhu kibangu aia ku a batuila.

¹⁴ Mozé anga u temena makesongo a kifuẋi, ni jithuame ja jimidi ni jithuame ja jihama, oso ala mu tunda ku kikalakalu kia ita.

¹⁵ Mozé anga u a ambela, uixi: Kifua ahatu oso mua a bhake ni muenhu, kuambe?

¹⁶ Enʼiá-ze, ene a sendula anʼa Izalaiele, mu kaiula ka Balamu, mu kubhukumukina Jihova mu mulonga ua Peole, anga a bheka kibuika mu kilômbo kia Jihova.

¹⁷ Kala kiki jibhenu ana oso a mala, ni ahatu oso ejiia kiá mala mu kuzeka-nâ.

¹⁸ Ahatu oso-phe ala hanji ni undenge uâ kiluua ejiia mala mu kuzeka-nâ, ene mu a bhaka ni muenhu ni mu kale-nâ.

¹⁹ Enu-phe, mu tula hanji mu kanga, ki muize luua mu kibangu, sambuadi dia kizuua; uoso-phe ua jibha muthu, mba ua kuata ku kimbi, kikale mu di bonza kizuua kia katatu ni kia kasambuadi, ni enu ni jihutile jenu.

²⁰ Ni izuatu ienu, ni kima kioso kia iudika ni kibha, ni ima ia ndemba ja hombo, ni ia muẋi, iene ioso mu i bonza.

²¹ Nganga Eleazale anga uambela makuenze a ita, uixi: Kiene kijilʼiki kia kitumu kia bhana Jihova kua Mozé:

²² Ima-phe ia ulu, ni phalata, ni ngôndo, ni felu, ni xitanhu, ni ximbu,

²³ ioso i xikina kubhita mu túbhia sé kujila, mu i bhitisa mu túbhia ni i kale iazele; kienhiki-phe mu i bonza ue ni menha ma dibônzo; ima ioso ki i xikina ku i ta mu túbhia, mu i bhitisa mu menha.

²⁴ Kizuua kia kasambuadi mu sukula izuatu ienu ni mu zele; kiene kiua ki mu bokona mu kibango.

O kuuana mbole

²⁵ Jihova anga u ambela Mozé, uixi:

²⁶ Alula imbamba ia bhundu, ni athu ni ibhaku, ni eie ni nganga Eleazale, ni adiakime, o mítue ia mabhata ma jitata ku kilômbo;

²⁷ imbamba ióbhunde-phe mu i uana mbandu jiiadi: mbandu iii ia makuenze a ita, ele mu kúlua, mbandu iii ia kilômbo a xedi bhu kibangu.

²⁸ U nomona-ku-phe lubhaku lua Jihova, ku makuenze a ita ele mu kúlua: Muenhu umoxi mu hama jitanu ja mienhu, ni ku athu, ni ku jingombe, ni ku jibulu, ni ku ilunga ia jimbudi,

²⁹ kioso ki u katula ku mbandu ia ene, mu ki bhana kua nganga Eleazale, uene ujitu uangene ua Jihova.

³⁰ O ku mbandu ia anʼa Izalaiele u katula-ku muenhu umoxi mu makuinhi atanu a mienhu, ni ku athu, ni ku jingombe, ni ku jibulu, ni ku ilunga, kifua ku ibhaku ioso, anga mu i bhana Jilevita ene mu langa balaka ia Jihova.

³¹ Ni Mozé ni nganga Eleazale anga a bhanga kala kia tumu Jihova kua Mozé.

³² O mbole-phe ieza na-iu makuenze ku bhata: jimbudi, hama jisamanu ja jimidi, ni makuinhi sambuadi a midi, ni midi jitanu;

³³ jingombe, makuinhi sambuadi a midi ni midi jiiadi;

³⁴ jibulu, makuinhi asamanu a midi ni midi imoxi;

³⁵ o ku athu, makuinhi atatu a midi ni midi jiiadi, ahatu kejiia luua mala mu kuzeka-nâ.

³⁶ Mbandu-phe ia tokala ku makuenze a ita: jimbudi, hama jitatu ja jimidi, ni makuinhi atatu a midi, ni sambuadi dia midi ni hama jitanu;

³⁷ o lubhaku lua Jihova: ku jimbudi, hama jisamanu ni makuinhi sambuadi ni kitanu.

³⁸ O jingombe, makuinhi atatu a midi, ni midi jisamanu; o lubhaku lua Jihova lu tunda-ku makuinhi sambuadi ni kiiadi.

³⁹ O jibulu, makuinhi atatu a midi ni hama jitanu; o lubhaku lua Jihova lu tunda-ku makuinhi asamanu ni kamoxi.

⁴⁰ Athu kuinhi dia midi ni midi jisamanu; o lubhaku lua Jihova lu tunda-ku, makuinhi atatu a muthu ni kiiadi.

⁴¹ Mozé anga u bhana lubhaku lua ngene lua Jihova kua nganga Eleazale, kala kia tumu Jihova kua Mozé:

⁴² Ku mbandu ia tokala ku anʼa Izalaiele, Mozé ki edi u bhana-ku o makuenze a ita o mbandu iâ, athu ku bhata mbandu,

⁴³ (mbandu-phe ia iá a xedi ku bhata: Ku jimbudi, hama jitatu ja jimidi, ni makuinhi atatu a midi, ni sambuadi dia midi, ni hama jitanu;

⁴⁴ ku jingombe: makuinhi atatu a midi ni midi jisamanu;

⁴⁵ ku jibulu, makuinhi atatu a midi ni hama jitanu;

⁴⁶ ku athu, kuinhi dia midi ni midi jisamanu);

⁴⁷ ku mbandu iii ia tokala ku anʼa Izalaiele, Mozé ua katula-ku muenhu umoxi mu makuinhi atanu a mienhu, ni ku athu ni ku ibhaku, anga u i bhana ku Jilevita, ene kulanga o balaka ia Jihova, kala kia tumu Jihova kua Mozé.

Lubhaku lua vondadi lua bhana jithuame

⁴⁸ Makesongo-phe a tumina kifuẋi kia ita, ni jithuame ja jimidi, ni jithuame ja jihama, a bhiẋila kua Mozé;

⁴⁹ anga ambela Mozé, exi; Abhikʼé alula kiá makuenze a ita, a kexi bhoxi dia lukuaku luetu, tua sange a tena, ni muthu ngó ka kambe-ku.

⁵⁰ Etu tua bheka-phe ujitu uetu kua Jihova, muthu ni muthu ua bhana kimbamba kioso kia kuata koko, ni ku makembu a ulu, ni malenge, ni jiselu ja maku, ni jinela, ni jibixa, ni malubhambu a xingu, mu sakidila mienhu ietu kua Jihova.

⁵¹ Mozé ni nganga Eleazale anga a tambula ulu uenʼiú kua ene, makembu oso a ufunu ua kusula.

⁵² Ulu uenʼiú-phe ua nomona ene anga a u bhakula kua Jihova, ua bhana jithuame ja jimidi ni jithuame ja jihama, kuinhi dia midi ja jixikulu, ni midi jisamanu, ni hama sambuadi ni makuinhi atanu.

⁵³ (Kuma makuenze a ita a bhundu imbamba kala iii, muthu ni iê, muthu ni iê.)

⁵⁴ Mozé ni nganga Eleazale anga a tambula o ulu iú ku jithuame ja jimidi ni jithuame ja jihama, anga a u lunda mu balaka ia kutakanena, mu kukala dixinganekenu dia anʼa Izalaiele bhu pholo ia Jihova.