Dialuilu 30 - O Mikanda Ikola

Kioso ahatu kia kumbidila o jihasa jâ

¹ Mozé anga u ambela adikime, o mítue ia miji ia anʼa Izalaiele, uixi: Kima kia tumu Jihova kienhiki:

² Se diiala di ta hasa kua Jihova, mba u loka mulôko ua ku di kuta o muenhu uê ni kikutu, ka tena kualuluka bhu dimi; ki kale u kumbidila kioso kia mu tundu ku dikanu diê, kiene kia bhanga.

³ O muhatu ue, se u ta hasa kua Jihova, anga u di kuta ni kikutu, o muene uala hanji mʼonzo ia tatʼâ, mu undenge uê,

⁴ o tatʼâ nʼa kʼivu kia te hasa, kia di kutu o muenhu uê ni kikutu, tatʼâ anga uivué ngó hé u di xibhé, hasa iê-phe ia kuata, o ikutu ioso ia di kutu na-iu muenhu uê, iemana muene.

⁵ O tatʼâ-phe kia muivua kuloka, se u mu kidika kuila ki kiene ki u zuela, jihasa jê ki ji kuata dingi, ni ikutu ioso ia di kutu na-iu muenhu uê, ia kutunuka; Jihova phe u mu loloka, mukonda tatâ ua mu kidika.

⁶ Se uai-phe mʼonzo ia muadi uê, o ku dihambelela kuê, kua di hambelela na-ku, ku-kuê, ni kuzuela kua lusolo kua zuela ni mizumbu ie, iú ua di kutu muenhu uê,

⁷ muadi uê kia kiʼvua, nʼa di xibhé kizuua kioso kia kʼivua; jihasa jê-phe ja kuata, ni ikutu ioso ia di kutu na-iu muenhu uê iemana.

⁸ Maji muadi uê-phe kizuua kia kʼivua, hé u mu kidika kuila kana kuzuela kiokio, hasa iê iala na-iu ua i suikika, ni kuzuela kua lusolo kua mizumbu iê, kua kukuta o muenhu uê, ua mu fudisa-ku; Jihova phe u mu loloka-kiu.

⁹ Muhatu-phe, hé mutudi, mba a mu senge, hasa iê i kuata muene, ikutu ioso ia di kutu na-iu muenhu uê iemana muene.

¹⁰ Ki ki kala-phe hasa iê ua i tele mʼonzo ia muadi uê, anga u di kuta muenhu uê ni kikutu mba mulôko,

¹¹ muadi uê hé ua kʼivu, iú ua di xibhé, ka mu kidika, jihasa jê ja kuata, ikutu ioso ia di kutu na-iu muenhu uê, iemana.

¹² Muadi uê-phe hé ua i selula, kizuua kia ivua, ioso ia mu tundu ku mizumbu, ia jihasa, mba ia kikutu kia kukuta o muenhu uê, ki i kuata dingi; mukonda muadi uê ua i selula; Jihova phe u mu loloka-kiu.

¹³ Hasa ioso mba mulôko uoso ua te, mu kutatesa muenhu uê, muadi ue u i kuatesa mba u i selula.

¹⁴ Muadi uê-phe se ua di xibhé ku tunda kizuua kuiza kizuua, jihasa jê mba ikutu ioso ia mu kala ku thandu diê, ua i kuatesa muene; ua i kuatesa mukonda kizuua kia ivu ua di xibhé, ka mu kidika.

¹⁵ O ki ela u i kidika, kia zubha ku ivua, kimbamba ki kala kiá kua muene muadi uê.

¹⁶ Iá ene o mabatuilu a tumu Jihova kua Mozé, bhu kaẋi ka diiala ni muhatuʼê, bhu kaẋi ka tata ni monʼê ua muhatu, uala hanhi mu undenge uê monzo ia tatʼâ.