Dialuilu 29 - O Mikanda Ikola

Maujitu mu fesa ia jikoloneta

¹ O mu mbeji ia kasambuadi, kizuua kiê kia kamoxi, mu kala ni kionge; ki mu bhange kikalakalu kioso-kioso; ki kala kizuua kienu kia kuxika jikoloneta;

² anga mu bhakula sata ia kuoha, kuma dizumba diambote kua Jihova: Kangombe kamoxi ka ndumbe, kilumbe kimoxi kia mbudi, sambuadi dia tumbudi tua ndumbe, tua muvu umoxi, ki tu moneka dixaka:

³ ni sata iâ ia mákudia, fuba ia kábhia iólunge ni maji, tukuinhi tutatu tua efah ku kangombe, tukuinhi tuiadi tua efah ku kilumbe kia mbudi,

⁴ kakuinhi kamoxi ku kambudi, ka muvu umoxi, sambuadi dioso kiene;

⁵ ni kisutu kimoxi kia hombo, kia sata ia ituxi, kia ku mi bhangela kiamenga.

⁶ O jisata ja kuoha ja mbeji iathethama jengi, ni sata iê ia mákudia, o sata ia kuoha ia izuua ioso iengi, ni sata iê ia mákudia, ni sata ia mákunua, iamukuá iii ia di bandekeza, iene ioso ni ijiia iê, mu dizumba diambote, ujitu a u bhakula ni túbhia kua Jihova.

⁷ Kizuua-phe kia kakuinhi, kia mbeji ienhiʼii ia kasambuadi, mu kala ue ni kionge kikôla; mu tatesa mienhu ienu; ki mu bhange kikalakalu kioso-kioso;

⁸ maji-phe mu bhakula sata ia kuoha, ia Jihova, mu dizumba diambote: Kangombe kamoxi ka ndumbe, kilumbe kia mbudi, sambuadi dia tumbudi tua ndumbe, tua muvu umoxi; ki tu moneka dixaka; mu i kuata;

⁹ ni sata iâ ia mákudia, fuba ia kábhia, iólunge ni maji, tukuinhi tutatu tua efah ku kangombe, tukuinhi tuiadi tua efah ku kilumbe kia mbudi,

¹⁰ kakuinhi kamoxi ku kambudi, ka muvu umoxi, sambuadi dioso kiene;

¹¹ ni kisutu kia hombo, kimoxi, kia sata ia ituxi; kua di te sata ia ituxi ia kiamenga, kua di te sata ia kuoha ia izuua ioso, ni sata iê ia mákudia, ni sata iê ia mákunua.

Maujitu ma fesa ia jifundu

¹² Kiene kimoxi ue mu kizuua kia kakuinhi ni kitanu, mbeji iene ia kasambuadi, mu kala ue ni kionge kikôla; ki mu bhange kikalakalu kioso-kioso; mu bhanga fesa ia Jihova mu sambuadi dia izuua;

¹³ anga mu bhana sata ia kuoha, ujitu a u bhakula ni túbhia, u bhana dizumba diambote kua Jihova: Kuinhi niʼtatu dia tungombe tua ndumbe, ilumbe ia mbudi iiadi, kuinhi ni uana dia tumbudi tua ndumbe, tua muvu umoxi, ki tu moneka dixaka;

¹⁴ ela-phe ni sata ia mákudia, fuba ia kábhia, iólunge ni maji, tukuinhi tutatu tua efah ku kangombe kamoxi, kuinhi dioso ni kitatu kiene, tukuinhi tuiadi tua efah ku kilumbe kimoxi, iiadi ioso kiene,

¹⁵ kakuinhi kamoxi ka efah ku mbudi, ia muvu umoxi, kuinhi dioso ni kiuana kiene;

¹⁶ ni kisutu kia hombo kia sata ia ituxi; ienhiʼii ia di bandekeza, o sata ia kuoha ia izuua ioso, ni sata iê ia mákudia, ni sata iê ia kúnua, ki i kambe.

¹⁷ Mu kizuua kia kaiadi, mu bhana kuinhi ni kiiadi dia tungombe tua ndumbe, ilumbe iiadi, kuinhi ni uana dia tumbudi, tua muvu umoxi, ki tu moneka dixaka;

¹⁸ ela-phe ni sata iâ ia mákudia, ni sata ia kúnua, ni ku tungombe, ni ku ilumbe, ni ku tumbudi, tua muvu umoxi, sata iii mu i ta-ku, kimoxi kiene, kimoxi kiene, kala kia mi bhana kijila;

¹⁹ ni kisutu kia hombo kia sata ia ituxi; o sata ia kuoha ia izuua ioso iengi, ni sata iê ia mákudia, ni sata iê ia mákunua.

²⁰ Mu kizuua kia katatu, kuinhi niʼmoxi dia tungombe tua ndumbe, ilu-mbe iiadi, kuinhi niʼuana dia tumbudi, tua muvu umoxi, ki tu moneka dixaka;

²¹ ela-phe ni sata iâ ia mákudia, ni sata ia mákunua, ni ku tungombe, ni ku ilumbe, ni ku tumbudi, tua muvu umoxi, kala kia soko o dialuilu diâ, sata iii mu i ta-ku kala kia mi bhana kijila;

²² ni kisutu kia hombo kia sata ia ituxi; o sata ia kuoha ia izuua ioso iengi, ni sata iê ia mákudia, ni sata iê ia kúnua.

²³ Mu kizuua kia kauana, kuinhi dia tungombe tua ndumbe, ilumbe iiadi, kuinhi niʼuana dia tumbudi, tua muvu umoxi, ki tu moneka dixaka;

²⁴ ela-phe ni sata iâ ia mákudia, ni sata ia mákunua, ni ku tungombe ni ku ilumbe, ni ku tumbudi, tua muvu umoxi, sata iii mu i ta-ku, kimoxi kiene, kimoxi kiene, kala kia mi bhana kijila;

²⁵ ni kisutu kia hombo kia sata iâ ia ituxi; o sata ia kuoha ia izuua ioso iengi, ni sata iê ia mákudia, ni sata iê ia kúnua.

²⁶ Mu kizuua kia katanu, dívua dia tungombe tua ndumbe, ilumbe iiadi, kuinhi niʼuana dia tumbudi, tua muvu umoxi, ki tu moneka dixaka;

²⁷ ela-phe ni sata iâ ia mákudia, ni sata ia mákunua, ni tungombe, ni ku ilumbe, ni ku tumbudi, tua muvu umoxi, sata iii mu i ta-ku, kimoxi kiene, kimoxi kiene, kala kia mi bhana kijila;

²⁸ ni kisutu kia hombo kia sata ia ituxi; o sata ia kuoha ia izuua ioso iengi, ni sata iê ia mákudia, ni sata iê ia mákunua.

²⁹ Mu kizuua kia kasamanu, nake dia tungombe tua ndumbe, ilumbe iiadi, kuinhi ni uana dia tumbudi, tua muvu umoxi, ki tu moneka dixaka;

³⁰ ela-phe ni sata iâ ia mákudia, ni sata iâ ia mákunua, ni ku tungombe, ni ku ilumbe, ni ku tumbudi, tua muvu umoxi, sata iii mu i ta-ku, kimoxi kiene, kimoxi kiene, kala kia mi bhana kijila;

³¹ ni kisutu kia hombo kia sata ia ituxi; o sata ia kuoha ia izuua ioso iengi, ni sata iê ia mákudia, ni sata iê ia kúnua.

³² Mu kizuua kia kasambuadi, sambuadi dia tungombe tua ndumbe, ilumbe iiadi, kuinhi niʼuana dia tumbudi, tua muvu umoxi, ki tu moneka dixaka;

³³ ela-phe ni sata iâ ia mákudia, ni sata iâ ia mákunua, ni ku tungombe, ni ku ilumbe, ni ku tumbudi, tua muvu umoxi, sata iii mu i ta-ku, kimoxi kiene, kimoxi kiene, kala kia mi bhana kijila;

³⁴ ni kisutu kia hombo kia sata ia ituxi; o sata ia kuoha ia izuua ioso iengi, ni sata iê ia mákudia, ni sata iê ia kúnua.

³⁵ Mu kizuua kia kanake, mu kala ni kionge kia dithoka; ki mu bhange kikalakalu kioso-kioso;

³⁶ maji-phe mu bhana sata ia kuoha, ujitu a u bhakula ni túbhia, u bhana dizumba diambote kua Jihova: Kangombe ka ndumbe, kilumbe kia mbudi kimoxi, sambuadi dia tumbudi tua ndumbe, tua muvu umoxi, ki tu moneka dixaka;

³⁷ ela-phe ni sata iâ ia mákudia, ni sata iâ ia mákunua, ni ku tungombe, ni ku kilumbe, ni ku tumbudi, tua muvu umoxi, sata iii mu i ta-ku, kimoxi kiene, kimoxi kiene, kala kia mi bhana kijila;

³⁸ ni kisutu kia hombo kia sata ia ituxi; o sata ia kuoha ia izuua ioso iengi, ni sata iê ia mákudia, ni sata iê ia kúnua.

³⁹ Ienhiʼii iene i mu satela jinga Jihova mu jifesa jenu ja mi xindi, o ia ku di hambelela enuʼenu iengi, ni ia kubhana mibhaku ia kudifikixila, ni sata jenu ja kuoha, ni jisata ja mákudia, ni jisata ja mákunua, ni jisata ja paze.

⁴⁰ Mozé anga utangela anʼa Izalaiele ima ioso iii kala kia tumu Jihova kua Mozé.