Dialuilu 28 - O Mikanda Ikola

O maujitu a izuua ioso

¹ Jihova anga u ambela dingi Mozé, uixi:

² Tuma anʼa Izalaiele, ua a tangela, kuma: Ujitu uami, kúdia kuami kua jisata ja kuoha, ni dizumba diami diambote mu kala ni muanu ua ku ngi bhakuila-ju mu thembu ioso ia tokala.

³ Ua kà a tangela kiki: Sata iami ia kuoha i mu satela Jihova, ienʼiii: Tumbudi tua jindumbe, tua muvu umoxi, ki tu moneka dixaka, kizuua tuiadi, kizuua tuiadi, mu sata ia kuoha ia izuua ioso.

⁴ Mbudi imoxi mu i sata mu kimene, mbudi ia mukuá mu i sata mu ngoloxi;

⁵ ni kakuinhi ka efah ka fuba ia kábhia, (ia uabha kiambote), ia sata ia mákudia, iólunge ni mbandu ia kauana ia hine ia maji ózunze.

⁶ Kifua sata ia kuoha ia izuua ioso, ia mi lekelela ku mulundu ua Sinai, dizumba diambote, ujitu a u bhakula ni túbhia kua Jihova.

⁷ Sata iê ia kúnua, mbandu ia kauana ia hine mu mbudi imoxi; ua kà lundulula dikáu didi dia kúnua kua nguzu kua Jihova, bhu kididi kikôla mu lumbu lua balaka.

⁸ Mbudi ia mukuá mu i sata mu kumbi dia ngoloxi, kala sata iê ia mákudia, ni sata ia kúnua, kiene kimoxi ni mu kimene, ujitu a u bhakula ni túbhia, ua dizumba diambote kua Jihova.

Jisata ja sabhalu, ja mbeji ia thethama, ja phasu, ni ja kutomona ibundu

⁹ Mu kizuua kia sabhalu-phe, tumbudi tuiadi tua ndumbe, tua muvu umoxi, ki tu moneka dixaka, ni tukuinhi tuiadi tua efah tua fuba ia uabha kiambote, ia sata ia mákudia, iólunge ni maji, ni sata iê ia kúnua;

¹⁰ iene sata ia kuoha ia di te-ku ia kizuua kia sabhalu, o sata ia kuoha, ia izuua ioso ue ki i kambe.

¹¹ Ni mu kumateka jimbeji jenu, mu bhakula ue kua Jihova sata ia kuoha, tungombe tuiadi tua ndumbe, kilumbe kia mbudi, sambuadi dia tumbudi tua ndumbe, tua muvu umoxi, ki tu moneka dixaka;

¹² ni tukuinhi tutatu tua efah tua fuba ia kábhia ia sata ia mákudia, iòlunge ni maji, tu di bandekeze ku kangombe kamoxi ka ndumbe; ni tukuinhi tuiadi tua efah tua fuba ia kábhia ia sata ia mákudia, iólunge ni maji, tu di bandekeza ku kilumbe kia mbudi;

¹³ ni mbandu ia kakuinhi ia fuba ia kábhia, iólunge ni maji, ia sata ia mákudia, ia kà di bandekeza ku mbudi ia muvu umoxi, mbudi kiene, mbudi kiene; iene ioso iii sata ia kuoha ia dizumba diambote, a i bhakula ni túbhia kua Jihova.

¹⁴ O sata ia mákunua kaxaxi ka hine ka vinhu ku ngombe, mbandu ia katatu ia hine ku kilumbe kia mbudi, mbandu ia kauana ia hine ku mbudi ia muvu umoxi; sata iii, sata ia mbeji ia thethama, jimbeji joso ku muvu kiene.

¹⁵ Ni kisutu kia hombo, kia sata ia ituxi, ia kusatela Jihova; kioso kia ki bhakula, kifua kiengi ue, ki di bandekeza ku sata ia kuoha ia izuua ioso, ni sata iâ ia kúnua.

O maujitu ni jifesa ja tokala

¹⁶ O bhu mbehji ia kamoxi, kizuua kiê kia kakuinhi ni kiuana, Phasu iangene ia Jihova.

¹⁷ Kizuua kia kakuinhi ni kitanu ki kala kia kizokola, mu dia jimbolo ja kambe kifulufulu kia kinanesa mu sambuadi dia izuua.

¹⁸ Kizuua kiê kia dianga ki kala kionge kikôla; ki mu bhange kikalakalu kioso-kioso;

¹⁹ kikale-phe mu bhana ujitu ua kubhakula ni túbhia, sata ia kuoha i mu satela Jihova: Tungombe tuiadi tua ndumbe, kilumbe kimoxi kia mbudi, ni sambuadi dia tumbudi tua ndumbe, tua muvu umoxi, mu tu kuata tua kambe dixaka.

²⁰ Bhu kala ni sata ia mákudia, fuba ia kábhia iólunge ni maji; tukuinhi tutatu tua efah tuia ku ngombe, tukuinhi tua efah tuia ku kilumbe kia mbudi;

²¹ kakuinhi kamoxi ku mbudi, ia muvu umoxi, sambuadi dioso kiene;

²² ni kisutu kia hombo kia sata ia ituxi, ia ku mu bhangela kiamenga.

²³ Ienhiʼii iene i mu bhakula, kifua ia di bandekeza; o sata ia kuoha, ia kimene, ia izuua ioso, ki i kambe.

²⁴ Kiene ki nga xindʼiki, kiene ki mu bhanga jinga mu sambuadi dia izuua, mu bhana kúdia ni kúnua kua kubhakula ni túbhia, ku bhana dizumba diambote kua Jihova; kifua ioso iii ia di te-ku, o sata ia kuoha, ia izuua ioso, ki i kambe.

²⁵ Kizuua kia kasambuadi-phe, mu kala ni kionge kikôla; ki mu bhange kikalakalu kioso-kioso.

²⁶ Kiene kimoxi ue dingi, kizuua kia ibundu ia kutomona, mu bhana kua Jihova sata ia mákudia, mu kutana kuenu kua jisemana, mu kala ue ni kionge kikôla, ki mu bhange kikalakalu kioso-kioso.

²⁷ Benhobho-phe kiá, mu bhana sata ia kuoha, ia dizumba diambote kua Jihova: Tungombe tuiadi tua ndumbe, kilumbe kimoxi kia mbudi, sambuadi dia tumbudi tua ndumbe, tua muvu umoxi;

²⁸ ni sata iâ ia mákudia, fuba ia kábhia iólunge ni maji, tukuinhi tutatu tua efah ku ngombe, tukuinhi tuiadi tua efah ku kilumbe kia mbudi,

²⁹ kakuinhi kamoxi ku kambudi, ka muvu umoxi, kambudi kiene, kambudi kiene, ku sambuadi dioso;

³⁰ kisutu kimoxi kia hombo, kia ku mi bhangela kiamenga.

³¹ Iene ioso i di bandekeza ku sata ia kuoha ia izuua ioso, ni sata iê ia mákudia, mu i bhana, ki i moneka dixaka, kumoxi ni sata ia kúnua.