Dialuilu 26 - O Mikanda Ikola

Nzambi u tuma dingi kualula anʼa Izalaiele enʼoso

¹ Mu kukala, kia zubha kubhita o kibuika kienhókio, Jihova u ambela Mozé ni Eleazale, monʼa nganga Alá, uixi:

² Alula dingi kilômbo kioso kia anʼa Izalaiele, oso ala mu makuinhi aiadi a muvu, mba ku makuinhi aiadi a muvu kua di te, ku mabhata ma jitata jâ, oso makuenze a Izalaiele a tena kuia ku ita.

³ Ni Mozé-phe ni Eleazale, nganga, hé a zuela-nâ mu dinhana dia Mouabhe, bhu mbandu ia Njolodá, sámbua dia lulama ni Jedikó, exi:

⁴ Alulenu kifuẋi, ala mu makuinhi aiadi a muvu, mba kua di te; kala kia tumu Jihova kua Mozé, ni ku anʼa Izalaiele, a tundu mʼoxi ia Ijitu.

⁵ Lubene, muene phande-kumbi ia Izalaiele; anʼa Lubene a mala Hanoko ua bhanga dibhata dia akua Hanoko; Palu ua bhanga dibhata dia akua Palu;

⁶ Hezelone ua bhanga dibhata dia akua Hezelone; Kami ua bhanga dibhata dia akua Kami.

⁷ Iá ene mabhata ma anʼa Lubene; o kialula-mu, a bhana makuinhi auana a midi, ni midi jitatu, ni hama sambuadi ni makuinhi atatu.

⁸ Palu uavu anʼê a mala, Eliiaba:

⁹ Eliiaba, anʼê a mala, Nemuuele, ni Datane, ni Abilamo. Ene Datane ni Abilamu a di tungula mu kionge; a kitukila Mozé ni Alá kumoxi ni kibuka kia Kola, kia kitukila Jihova,

¹⁰ mavu anga a jikuka, a a minha kumoxi ni Kola, kiafu kibuka kiókio; thembu iene imoxi kia bhi ku túbhia hama jiiadi ja mala ni makuinhi atanu, anga a di bhanga kijimbuete.

¹¹ Kienhiki-phe anʼa Kola kafu, kana.

¹² Anʼa Ximinhá a mala ku mabhata mâ: kua Nemuuele ua bhanga dibhata dia akua Nemuuele; kua Jamini ua bhanga dibhata dia akua Jamini; kua Jakini ua bhanga dibhata dia akua Jakini;

¹³ kua Zelehe ua bhanga dibhata dia akua Zelehe; Saúlu ua bhanga dibhata dia akua Saúlu;

¹⁴ enhá ene o mabhata ma anʼa Ximinhá, makuinhi aiadi a midi ni midi jiiadi ni hama jiiadi.

¹⁵ Anʼa Ngade a mala ku mabhata mâ: kua Zefoni ua bhanga dibhata dia akua Zefoni; kua Hangi ua bhanga dibhata dia akua Hangi; kua Suni ua bhanga dibhata dia akua Suni.

¹⁶ Kua Ojini ua bhanga dibhata dia akua Ojini; kua Edi ua bhanga dibhata dia akua Edi;

¹⁷ kua Alodi, ua bhanga dibhata dia akua Alodi; kua Adeli, ua bhanga dibhata dia akua Adeli.

¹⁸ Enhá ene o mabhata ma anʼa Ngade, a alula-mu a tena makuinhi auana a midi ni hama jitanu.

¹⁹ Anʼa Juda a mala: Hele ni Onane; Hele ni Onane-phe, a fuila mʼoxi ia Kanana.

²⁰ Anʼa Juda a mala ku mabhata mâ: kua Selahe ua bhanga dibhata dia akua Selahe; kua Peleze ua bhanga dibhata dia akua Peleze; kua Zelehe ua bhanga dibhata dia akua Zelehe.

²¹ Anʼa Peleze a mala: Kua Hezelone ua bhanga dibhata dia akua Hezelone; Hamule ua bhanga dibhata dibhata dia akua Hamule.

²² Enhá ene o mabhata ma Juda, a alula a tena makuinhi sambuadi a midi, ni midi jisamanu, ni hama jitanu.

²³ Anʼa Isakale a mala ku mabhata mâ: Kua Tola ua bhanga dibhata dia Tola; kua Puvah ua bhanga dibhata dia Puvah;

²⁴ kua Jasube ua bhanga dibhata dia akua Jasube; kua Ximidiioni ua bhanga dibhata dia akua Ximidiioni;

²⁵ enhá ene mabhata ma Isakale, a alula a tena makuinhi asamanu a midi ni midi jiuana, ni hama jitatu.

²⁶ Anʼa Nzebulone a mala ku mabhata mâ: kua Selede ua bhanga dibhata dia akua Selede; kua Elone ua bhanga dibhata dia akua Elone; kua Jaheleele ua bhanga dibhata dia akua Jaheleele.

²⁷ Enhá ene o mabhata ma anʼa Nzebulone, a alula a tena makuinhi asamanu a midi ni hama jitanu.

²⁸ Anʼa Zuze a mala ku mabhata mâ: Manasa ni Ifalaimi.

²⁹ Anʼa Manasa a mala: kua Makidi ua bhanga dibhata dia akua Makidi; Makidi u vuala Ngiliiade: kua Ngiliiade ua bhanga dibhata dia akua Ngiliiade.

³⁰ Anʼa Ngiliiade a mala: kua Iezele ua bhanga dibhata dia akua Iezele; kua Heleke ua bhanga dibhata dia akua Heleke;

³¹ kua Axidiiele ua bhanga dibhata dia akua Axidiiele; kua Xikeme ua bhanga dibhata dia akua Xikeme;

³² kua Semida ua bhanga dibhata dia akua Semida; Hefele ua bhanga dibhata dia akua Hefele.

³³ Zelofadi-phe monʼa Hefele, ua diiala, anga u vuala ahatu oso, ka moneka monʼa diiala; anʼê a ahatu majina mâ Makala, ni Noué, Hokala, Midika, ni Tidiza.

³⁴ Enhá ene mabhata ma Manasa: A alula a tena makuinhi atanu a midi ni midi jiiadi, ni hama sambuadi.

³⁵ Enhá anʼa Ifalaimi a mala ku mabhata mâ: kua Sutela ua bhanga dibhata dia akua Sutela; kua Bekele ua bhanga dibhata dia akua Bekele; Kua Tahane ua bhanga dibhata dia akua Tahane.

³⁶ Anʼa Sutela a mala enhá: Kua Elane ua bhanga dibhata dia akua Elane.

³⁷ Enhá ene mabhata ma anʼa Ifalaimi, a alula a tena makuinhi atatu a midi ni midi jiiadi, ni hama jitanu. Iá ene anʼa Zuze ku mabhata mâ.

³⁸ Anʼa Bejamí a mala, ku mabhata mâ: Kua Bela, ua bhanga dibhata dia akua Bela; kua Haxibele, ua bhanga dibhata dia akua Haxibele; kua Ahilamu, ua bhanga dibhata dia akua Ahilamu;

³⁹ kua Sufami, ua bhanga dibhata dia akua Sufami; kua Hufami, ua bhanga dibhata dia akua Hufami.

⁴⁰ Anʼa Bela a mala, Alede ni Naamane: kua Alede, ua bhanga dibhata dia akua Alede; Naamane ua bhanga dibhata dia akua Naamane.

⁴¹ Enhá ene anʼa Bejamí ku mabhata mâ; a alula a tena makuinhi auana a midi ni midi jitanu, ni hama jisamanu.

⁴² Enhá anʼa Dane a mala ku mabhata mâ: Kua Xuhamu, ua bhanga dibhata dia Kua Xuhamu. Enhá ene o mabhata ma Dane, kala kia tokala mu kuvuadiua kuâ, mu mabhata mâ.

⁴³ Mabhata moso ma akua Xuhamu, a alula a tena makuinhi asamanu a midi ni midi jiuana, ni hama jiuana.

⁴⁴ Anʼa Asele a mala ku mabhata mâ: Kua Imnahe, ua bhanga dibhata dia akua Imnahe; kua Ixivi, ua bhanga dibhata dia akua Ixivi; kua Bediia, ua bhanga dibhata dia akua Bediia.

⁴⁵ Anʼa Bediia, a mala: kua Hebele, ua bhanga dibhata dia akua Hebele; kua Malakiiele, ua bhanga dibhata dia akua Malakiiele.

⁴⁶ Monʼa Asele ua muhatu dijina diê Seia.

⁴⁷ Enhá ene o mabhata ma anʼa Asele, a alula a tena makuinhi atanu a midi ni midi jitatu, ni hama jiuana.

⁴⁸ Anʼa Nafitali a mala ku mabhata mâ: kua Jaziiele, ua bhanga dibhata dia akua Jaziiele; kua Nguni ua bhanga dibhata dia akua Nguni;

⁴⁹ kua Jezele, ua bhanga dibhata dia akua Jezele; kua Xileme ua bhanga dibhata dia akua Xileme.

⁵⁰ Enhá ene o mabhata a Nafitali, a alula a tena makuinhi auana a midi ni midi jitanu, ni hama jiuana.

⁵¹ Iá ene a alula ku anʼa Izalaiele, a tena hama jisamanu ja jimidi ni midi imoxi, ni hama sambuadi ni makuinhi atatu.

O kitumu kia kuuana ixi mu ibatu

⁵² Jihova anga u ambela Mozé, uixi:

⁵³ Enhá ene u u uanena ixi ia undundu uâ, u kaiela kioso kia bhana majina mu dialuilu.

⁵⁴ Ala kota mu kuvula ni undundu uâ u kala kota, ala ndenge mu kuvula ni undundu uâ, u kala ndenge; undundu a u sokesa ni dialuilu diâ.

⁵⁵ Maji-phe ixi a i uana ku muondona a lundula mu majina a mabhata a jitata jâ.

⁵⁶ Kulundula ku tunda mu muondona, kioso kia uanena iá avulu ni iá a tolo.

⁵⁷ Enhá ene a alula ku Jilevita, ku mabhata mâ: kua Ngelexone, ua bhanga dibhata dia akua Ngelexone; kua Kohate, ua bhanga dibhata dia akua Kohate; kua Meladi, ua bhanga dibhata dia akua Meladi.

⁵⁸ Enhá o mabhata ma Levi: akua Libini, akua Hebolone, akua Mahaline, akua Muxi, akua Kola. Kohate u vuala Analá.

⁵⁹ Analá, muhatuʼê dijina diê Jakobede, monʼa Levi ua muhatu; Levi ua mu vualela mu Ijitu; Jakobede, muhatu ua Analá, anga u mu vualela Alá, ni Mozé, ni Midiiana, phange iâ ia muhatu.

⁶⁰ Alá anga u vuala Nadabe ni Abihu, ni Eleazale, ni Itamale.

⁶¹ Nadabe ni Abihu anga a fua ki ejiie ni túbhia tuengi bhu pholo ia Jihova.

⁶² Kia alula a tena makuinhi aiadi a midi ni midi jitatu, mala oso ala mu mbeji imoxi, mba kua di te kiá; kuma ene ka alula mu anʼa Izalaiele ni akuâ, mukonda ene ka a bhana undundu ua kima mu anʼa Izalaiele.

⁶³ Enhá ene a alula kuala Mozé ni nganga Eleazale; alula anʼa Izalaiele, mu dinhana dia Mouabhe, bhu mbandu ia Njolodá, sámbua dia lulama ni Jedikó.

⁶⁴ Maji-phe mudiâ, ni muthu ngó kala-mu ua bokuene mu dialuilu dia bhangele Mozé ni Alá, kia alula anʼa Izalaiele mu kikangalakata kia Sinai.

⁶⁵ Mukonda Jihova ua ki ambele, uixi: Enhá kidi muene a kà fuila mu kikangalakata. Ni muthu ngó ka subhuka-ku, kale ngó Kalebe dia Jefune ni Josuué dia Nune; ene ngó a subhuka.